Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Ambe engani jorhenguarhijka Bibliaeri

 JORHENGUARHIKUA 46

Jeoba xarhatasïndi eska imasï jurhimbitiika

Jeoba xarhatasïndi eska imasï jurhimbitiika

Israeliri reinu engaksï 10 tribuechepka, uánikua reichani jatsiaspti engaksï no sési úripka, peru Akabi sánderu no ambakispti. Uarhiiti no sési úri ma jingoni tembuchaspti enga Baalini kómarhienga. Jesabeli arhinhasïrendi. Akabi ka Jesabeli, úsptiksï eska uánikua kʼuiripu Baalini kómarhipiringa. Ístuksï uánikua Jeobaeri profetechani uándikuaspti. ¿Ambe úspi Jeoba? Profeta Elíasini axaspti para mensaji ma íntskuni Akabini.

Elíasi arhispti Akabini eska Israeli no janipiringa jimboka ima no sési úrispka. Jukari tanimu uéxurhini no ma ambe tsikispti kampuecharhu, ka kʼuiripu úndaspti kánikua kʼarhimani. Jeoba ménderu axaspti Elíasini Akabi jingoni. Ka rei Akabi arhispti Elíasini: “Tʼuri solu problema ambe juásïnga. Iámindu i ambe chíti kulpa jimboesti”. Elíasi arhispti: “No ji kulpa jatsiska enga no janijka. Chíti kulpesti jimbokari Baalini kómarhisïnga. Tánanta iretani ka Baaliri profetechani Karmelu juátarhu karhakua. Ka exeakachi néski Tata Diosï jurhimbiti”.

Ireta, juátarhu tánguarhispti ka Elíasi arhiaspti: “Jatsiskajtsï para erakuni. Enga Jeoba Tata Diosï jurhimbitiika, chúxapa je. Peru enga Baali jindeeka, imani chúxapa je. Ju je úni ambe ma: 450 Baaliri profetechaksï jatsisti para prepararini kéjtsïtakua ma ka ioarhini imecheri diosïni. Jíjtuni preparariuaka kéjtsïtakua ma ka uandajpaaka Jeobani. Ima enga chpiri jimbo mókuntaaka, xarhataati eska Tata Diosï jurhimbitiska”. Ka ireta jiókuarhispti.

Baaliri profetechaksï prepararispti kéjtsïtakuani. Chúskutasptiksï uandani: “¡Oh Baali, mókuchentajtsïni!”. Peru komu Baali no mókuntenga, Elíasi teresmarhuspti ka uandaspti: “Uinhachaku je eskajtsï xáni uáka. Jamberi kʼuiirati ka uétarhini eska nema tsínharhitaaka”. Chúrixaptia ka Baaliri profetechaksï útasï uandajpaxapti, peru no nema kurhakuasïrendi.

Elíasi altarirhu ma péraspti imeri kéjtsïtakuani ka kánikua itsï atajchakuraspti. Tátsekua, kómarhispti: “Oh Jeoba, eska ireta mítiaka eskari tʼusï Tata Diosï jurhimbitiika”. Ka Jeoba sóntku uekopaspti chpiri para kurhirani kéjtsïtakuani. Kʼuiripu uinhachaspti: “¡Jeoba jindesti Tata Diosï  enga jurhimbitiika!”. Ka Elíasi uandaspti: “Eska no ma Baaliri profeta sïpakuarhiaka”. Ima jurhiatikuaksï 450 Baaliri profetechani uándikuaspti.

Tátsekua, nube sapichu ma xarharaspti marirhu ka Elíasi arhispti Akabini: “Kʼéri janikua ma jurhaxati. Preparari chíti karruni ka nínta”. Auanda iámu turhipenchespti nubecha jimbo, tarhiaspti ka uénaspti janini. Ísï jámani, kʼamakurhispti kʼarhindekua. Akabi niraspti imeri karru jingoni xáni sóntku eska na úpka. Jeoba jarhuataspti Elíasini paraka sánderu sóntku uiriapiringa eska karru. Peru ¿kʼamakurhipiksïa iámindu Elíasiri problemecha? Ju exeni.

“Eska kʼuiripu mítiaka eska tʼu, engari arhinhajka Jeoba, tʼujkuri jindeska enga Sánderu Kʼéri ambeeka iámu parhakpinirhu” (Salmo 83:18).