Exeni ambe enga jataka

Índisi jimbo nirani

Jeobaeri testiguecha

Erakuni idiomani Purépecha

 JORHENGUARHIKUA 37

Jeoba uandajpasïndi Samuelini

Jeoba uandajpasïndi Samuelini

Kʼéri saserdoti Elí, tsimani uájpechani kaasïrendi: Ofní ka Fineási. Íksï saserdotespti ka tabernakulurhuksï ánchikuarhisïrendi. Peru nóksï kurhajchaasïrendi Jeobaeri leichani ka ístuksï kánikua no sési kámpisïrendi. Engaksï israelitecha pákuenga kéjtsïtakua Jeobani, Ofní ka Fineási, pakatakuarhisïrendiksï sánderu sési jásï kʼuiripita. Elí mítispti eskaksï uájpecha no sési ambe úxapka, peru no ma ambe úsïrendi para jurhimberantaani. ¿Jurajkupirini Jeoba eska i ambe seguiripiringa úkuarhini?

Nájkiruka Samueli sánderu sapichuepka eska Ofní ka Fineási, no májkueni jámasïrendi eskaksï ima. Jimbosï Jeoba kánikua sési pʼikuarheraendi Samueli jingoni. Ma chúri, Samueli kʼuíxapti ka bosi ma kurhaspti enga uandajpenga. Jauaraspti ka sóntku niraspti Elí jingoni ka arhispti: “Ixú jarhaska”. Peru Elí arhispti: “Jíkini no uandajpaska. Ní kʼuíntani”. Ka Samueli niraspti apondintani. Ka ménderu májkueni úkuarhispti. Ka enga Samueli kurhaapka bosini tanimu úni jámani, Elí kuenta íntskukuarhispti eska Jeobasï uandajpani japka Samuelini. Jimbosï arhipti eska enga ménderu kurhaapiringa bosini, mókuntapiringa: “Arhirini Jeoba. Chíti jántspirikini kurhajchaxati”.

Samueli apondintaspti ka kurhaaspti bosini: “Samueli, Samueli”.  Ima mókuntaspti: “Arhirini Jeoba. Chíti jántspirikini kurhajchaxati”. Ka Jeoba arhispti: “Arhi Elíni eskani kastigariuaka imani ka imeri familiani. Elí mítisti eskaksï uájpecha no sési ambe úxaka juchiti tabernakulurhu, peru no jurhimberantaasïndi”. Pauandikua, Samueli mítaaspti tabernakulurhu anapu puertechani, ísï eska méntkisï. Chéxapti aianguni kʼéri saserdotini ambe enga Jeoba arhipka. Peru Elí uandajpaspti ka kurhamarhini: “Iju, ¿ambekini arhiski Jeoba?”. Ka Samueli iámindu ambe aianguspti.

Enga Samueli kʼépkia, Jeoba seguirispti imeri amigueni. Iámindu israelitecha paisirhu anapu, mítispti eska Jeoba Samuelini erakuspka para profeteni ka juesi.

“Miá chíti Ambakiti Kuerajpirini iásï engari sapichkueka” (Eclesiastés 12:1).