Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Ambe engani jorhenguarhijka Bibliaeri

 JORHENGUARHIKUA 101

Romaksï pásïndi Pabluni

Romaksï pásïndi Pabluni

Terseru biaji enga Pablu úpka para aianhpini, Jerusaleni kʼamaraspti. Jimaksï jupikaspti. Ma chúri enga ónhakata japka, Jesusi arhispti bisionirhu ma: “Romari niuaka ka jimari eianhpiaka”. Jimajkani, pásptiksï Pabluni de Jerusaleni a Sesarea. Jima, tsimanksï uéxurhini ónhaspti. Enga jusgarinhapka juramuti Festu japarini, Pablu uandaspti: “Uékasïnga eskarini Sésari jusgariuaka Roma”. Festu arhispti: “Engari uéjka eskakini Sésari jusgariuaka, Sésari jingonikini axaaka”. Jimboksïsï barkurhu ma jatsirapti enga Roma niraenga. Tsimani kristianuechaksï pámbitaspti: Lukasï ka Aristarku.

Engaksï marirhu japkia, tormenta ma úkuarhispti enga uánikua jurhiatikua duraripka. Iáminduksï eratsispti eskaksï uarhipiringia. Peru Pablu arhiaspti: “Achaticha, ánjilirini ma arhisti tsánharhikua ma jimbo: ‘Asï ché. Niáraakari Roma ka iáminduechaksï salbarikuarhiati’. Ísï jimbo, ¡asï ché je! Nochi uarhiaka”.

Tormenta 14 jurhiatikua durarispti astakaksï exentapka echeri. Jindespti isla de Malta. Barku itsïrhu pakamespti ka iámu xerekuarhintaspti, peru 276 kʼuiripu enga jima nirani japka, úspti islarhu uanamukuni jamberi niántani. Máruksï nadaripaspti ka máteruksï úraspti barkueri ambe paraksï no uekameni. Malta anapuechaksï kuidariuaspti ka kurhikasptiksï paraksï jorhepentani.

Tanimu kutsï tátsekua, soldaduechaksï Roma páspti Pabluni máteru barku jimbo. Erachichaksï niraspti erokani. Enga Pablu exeapka, agradeserikuspti Jeobani ka sési pʼikuarheraspti. Nájkiruka Pablu jupikakata japka, jiáretasptiksï para kʼumanchikuarhu ma irekani enga rentarikatepka ka enga soldadu ma kuáni japka. Tsimani uéxurhini jarhaspti jima. Kʼuiripu nirasïrendi pʼorhembini ka ima aianguasïrendi Tata Diosïri Reinueri ambe ka Jesusiri ambe. Pablu ístu karaaspti kartechani para kúnguarhikuecha engaksï Asia Menori ka Judea japka. Xarharasïndi eska Jeoba Pabluni úraspka para aianhpini Tata Diosïri ambakiti ambe máteru nasionicharhu.

“Iámindu ambe jimbo jucha sési jámasïnga eska na jatsika para jámani ma Diosïri jarhuajpiri, kánikua tekaantskua jingoni engachi no sési kánhajka ka kómu nitamanchi ka mískuarhita jatsinchi” (2 Korintu 6:4).