Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Ambe engani jorhenguarhijka Bibliaeri

 JORHENGUARHIKUA 59

Tʼámu tumbiicha engaksï kurhajchajka Jeobani

Tʼámu tumbiicha engaksï kurhajchajka Jeobani

Nabukodonosori, Babilonia páspti Juderi prínsipechani ka arhispti ofisialini ma enga Aspenasi arhinhaenga eska kuidariapiringa. Ístu, arhispti eska erakuapiringa sánderu jánhaskati ka ambakiti tumbiichani ima prínsipecheri. I tumbiichaksï ambakiti jorhentperakua ma intsïnhapirindi tanimu uéxurhini paraksï kʼérati puestuechani jatsiani Babilonia. Jatsisptiksï para jorhenguarhini arhintani, karani ka uandani Babilonia anapu idiomani. Ka ístuksï jatsispti para imani mísmu tʼirekuani arhani enga reiri palasiurhu íntspinhenga. Tʼámu i tumbiicha, arhinhasïrendiksï Danieli, Ananiasi, Misaeli ka Asariasi. Peru Aspenasi Babilonia anapu nombri jatsikuaspti: Beltsasari, Sadraki, Mesaki ka Abednegu. ¿Eratsisïniri eska ima jorhentperakua  úpiringa eskaksï mirikurhipiringa Jeobani?

I tʼámu tumbiicha, uékasïrendiksï Jeobani kurhajchani. Mítisptiksï eskaksï no jatsispka para arhani reiri tʼirekuani, jimboka Jeobaeri Lei arhisïrenga eskaksï no jatsispka para arhani máru ambe ima tʼirekueri. Jimboksïsï kurhakupti Aspenasini: “Jimboetakua, asïjtsïni afuersa íntsku ambe enga rei tʼirejka”. Peru Aspenasi arhiaspti: “Engajtsï no sési tʼireska ka reiksïni ísï exeni enajkijtsï pʼamenchajki, uándikuatirini”.

Danieli eratsispti ma ambe. Arhispti imeri guardiani: “Jimboetakua, berdura ka itsïjkujtsïni íntsku 10 jurhiatikua. Ka tátsekua, imani tumbiicha jingontsïni terokutanta engaksï imani mísmu tʼirekua auaka eska rei”. Guardia sési exespti i ambe.

Enga nitamapkia 10 jurhiatikua, Danieli ka imeri tanimu amiguechaksï sánderu sési xarharasïrendi eska máteru tumbiicha. Jeoba kánikua tsípixapti jimbokaksï tumbiicha kurhajchaspka. Ístu, íntskuspti Danielini jánhaskakua para úni kurhanguani bisionichani ka tsánharhikuechani.

Enga kʼamakurhipka ima tanimu uéxurhini jorhentpekueri, Aspenasi paaspti tumbiichani Nabukodonosori jingoni. Rei uandontskuarhikuaspti ka exespti eska Danieli, Ananiasi, Misaeli ka Asariasi, sánderuksï jánhaskatispka eska máteru tumbiicha. Jimbosï rei erakuapti paraksï palasiurhu ánchikuarhini. Tátsekua, rei méntku úndaspti kurhakuani imecheri konseju para ima ambe enga jukaparhakuepka. Jeoba sánderu jánhaskakua íntskuaspti imechani eska reiri maguechani ka jánhaskatichani.

Danieli, Ananiasi, Misaeli ka Asariasi, nóksï imecheri iretarhu jarhaspti, peruksï no mirikurhispti eskaksï útasï Jeobaeri ireta jingonispka. ¿Ka tʼuia? Engaksï chiiti táticha no tʼunguini jingoni jauaka, ¿tʼujturi méntkisï miáua Jeobani?

“Asïkini nema no janhanharhie jimbokari nótki jatirisïnga, sino jinde tʼu ma ejemplu para jakajkuticha chíti uandakuechani jimbo, sési jángua jimbo, uékperakua jimbo, [...] engari mintsikajka Diosïni ka pímbinhaxendi” (1 Timoteo 4:12).

PARAJTSÏ SÁNDERU MÍTINI

Ambe engani jorhenguarhijka Bibliaeri

Nóksï tinguixurhikusïndi estatuani

Sadraki, Mesaki ka Abednegu nóksï tinguixurhikusïndi estatuani orueri enga Babilonia anapu rei úpka.

Ambe engani jorhenguarhijka Bibliaeri

Danieli leonicheri posurhu jarhasti

Pauani pauani kómarhi Jeobani ísï eska Danieli.