Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Ambe engani jorhenguarhijka Bibliaeri

 JORHENGUARHIKUA 62

Reinu ma enga ísïka eska kʼéri anhatapu ma

Reinu ma enga ísïka eska kʼéri anhatapu ma

Chúrikua ma, Nabukodonosori tsánharhispti ambe ma enga kánikua chérapka. Uandajpaaspti imeri jánhaskatichani paraksï arhini ambe arhikuekasïreni tsánharhikua, peruksï no úspti explikarikuni. Últimu, rei, Danieli jingoni uandontskuarhispti.

Nabukodonosori arhispti Danielini: “Anhatapu ma tsánharhiska enga asta auandarhu jamberi niárapka kʼéni. Interu parhakpini uératini xarharasïrendi. Sési járhati chkurhi jukaaspti ka uánikua fruta. Animalichaksï imeri kʼumandarhu mintsikuarhisïrendi ka pájaruechaksï imeri ramecharhu uásïrendi xerekua. Tátsekua, ánjili ma kétsispti auandarhu uératini ka uinhachaspti: ‘¡Chʼapa je anhatapuni ka pʼikua je ramechani! Peru jurajku je tronkonini sïranguecha jingoni. Ka jóku je sintu jingoni tiámueri ka kobriiri. Anhatapueri mintsita mójtakurhiati. Nóteru kʼuiripueri máeuatia, sino animaliri ma. Ka siete tiempu ísï pakaraati. Iáminduksï exeati eska Tata Diosï jindeska Juramuti ka eska uáka íntskuni reinu ma, néni enga ima uékaaka’”.

Jeoba aianguspti Danielini ambe enga arhikuekenga tsánharhikua. Enga Danieli kurhangupka tsánharhikuani, chéspti ka uandaspti: “Oh, rei, uékapiringa eskaksï chíti enemiguecha nitamanchapiringa ambe engari tsánharhika, peruri tʼu nitamanchaaka. Kʼéri anhatapu engaksï chʼapaka, tʼuiskari. Tsïtaakari chíti juramukuani ka uitsakuari auaka juátarhu, ísï eska animali ma. Peru ánjili uandaspti eskaksï jurajkupiringa tronkuni sïranguecha jingoni. Inde ambe arhikuekasïndi eskari ménderu reintaaka”.

Ma uéxurhini tátsekua, Nabukodonosori, imeri palasiueri asotearhu jámaxapti ka uénaspti exeni na enga xáni sési jándipka Babilonia. Ima uandaspti: “¡Xáni sési jáxeka ireta engani úka! ¡Xáni engani kʼéri ambeka!”. Enga útasï ísï uandani japka, bosi ma arhispti auandarhu uératini: “¡Nabukodonosori! Iáiasïri kʼamaraska tsïtani chíti juramukuani”.

Imani ratu jimbo, Nabukodonosori loku úkuarhispti ka uénaspti ísï jámani eska animali ma. Jimboksïsï petantapti imeri palasiurhu ka juátarhu anapu animalicha jingoni irekaspti. Xáni iórhataspti jauiri enga  ísï xarharenga eska águileri pʼunguari ka imeri téjkichaksï xáni kʼéraspti eska pájarueri ma.

Enga siete uéxurhini nitamapkia, Nabukodonosori sési niántaspti ka Jeoba ménderu Babiloniaueri rei úspti. Jiájkani, Nabukodonosori uandaspti: “Kʼéri ambe arhisïnga Jeobani, auandarhu anapu Reini. Mítiskia eska Jeobasï Juramutiika. Ima kʼuratsetasïndi imani enga kʼéri exekuarhijka ka úsïndi íntskuni reinu ma, néni enga ima uékaaka”.

“Kʼéramakuarhikua jurhasïndi ante de ma no sési pakarani ka sési exekuarhikua, ante de no sési kʼamarhukuni” (Proverbios 16:18).