Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Ambakiti ambe enga Tata Diosïrika

 JORHENGUARHIKUA 4

¿Néski tata Jesukristu?

¿Néski tata Jesukristu?

1. ¿Nani uératini jurhaski Jesusi?

¿Andiksïsï iáminduecha tsitiaeni Jesusini jingoni jarhani? (MATEU 11:29; MARKUSɅ 10:13-16)

Jeoba, Jesusini uénasti kueraani. Jesusi no májkuenispti eska kʼuiripuecha, jimboka ante de Echerirhu jurhani auandarhu irekaspti komueska ánjili ma (Juanu 8:23). Jesusi jarhuatasti imeri Tátini kueraani iámindu ambe. Jeoba jandiajku kueraasti Jesusini, jimbosï arhinhajti, “máechakua Uájpa” (Juanu 1:14). Ístu Jesusi, Tata Diosïri uandakua párispti, jimbosï arhinhajti, “Uandakua”. Arhinta je Proverbios 8:22, 23, 30 ka Kolosasi 1:15.

2. ¿Andisï jupi Jesusi Parhakpinirhu?

Tata Diosï axasti imeri Uájpani Parhakpinirhu, úspti eska uátsï judia ma enga arhinhaenga Maria, kánguarhipiringa Jesusini. Ísï jimbo, Jesusiri tátijemba no kʼuiripu máespti (Lukasʌ 1:30-35). Jesusi jurhaspti Echerirhu para: 1) jorhentpini jurhimbikua Tata Diosïri ambe, 2) parajtsïni xarhatacheni nénachi uá marhuakuni Tata Diosïni nájkirukachi no sési nitamakuarhini jauaka, ka 3) para íntspini imeri pímbinhasï tsípikuani para “uánikuechani euajpiantani”. Arhinta je Mateu 20:28.

3. ¿Andisï uétarhieni eskajtsïni nema euajpintapiringa?

Ménichani uétarhisïndi íntspini ambe ma, paraka nema jurajkunhaaka ka no uándikunhani (Éxodo 21:29, 30). Tata Diosï no méni uékasti eska kʼuiripu uarhipiringa ka ni eska pʼamenchapiringa, ¿nénachi mítiski i ambe? Jimboka Jeoba arhispka Adanini eska uarhipiringa enga no kurhajchapiringa imani, enga Adani no pekaripiringa, no méni uarhipirindi  (Génesis 2:16, 17; 5:5). Biblia uandasïndi eska Adanini jimbosï “juka” pekadu. Ísï jimbo, Adanijtsïni kéritasti pekaduni ka uarhikuani, jimbochisï uétarhinchajka eskajtsïni nema euajpintaaka uarhikuarhu. Arhinta je Roma 5:12 ka 6:23.

¿Néjtsïni úpirini euajpintani uarhikuarhu? Engachi uarhijka, juchari pekaduechantkuchi meiampiantasïnga. No ma kʼuiripu úsïndi meiampini máteruecheri pekaduechani. Arhinta je Salmo 49:7-9.

4. ¿Andisï uarhi Jesusi?

Jesusi no ísïspti eska jucha, ima no pekadu jukaraspti. Jimbosï no uétarhinchaendi uarhini imeri pekaduechani jimbo, peru uarhisti máteruecheri pekaduechani jimbo. Tata Diosïjtsïni kánikua uékperakua xarhatachesti enga axaka imeri Uájpani para uarhini juchantsïni jimbo. Ka ístujtsïni Jesusi uékperakua xarhatachesti, jimboka tsípikua jingoni kurhajchaska imeri Tátini ka íntspesti imeri tsípekuani juchantsïni jimbo. Arhinta je Juanu 3:16 ka Roma 5:18, 19.

5. ¿Iásï Jesusi ambe úxaki?

Enga Jesusi Echerirhu japka, tsinaaspti pʼamenchatichani, tsítantaaspti uarhirichani, ka uánikuechani jarhuataaspti. Ima xarhatasti ambe enga uaaka sánderu orhepatini imechani jimbo engaksï kurhajchaaka Tata Diosïni (Mateu 15:30, 31; Juanu 5:28). Enga Jesusi uarhipkia, Tata Diosï tsítantaspti komueska ánjili ma (1 Pedru 3:18NM). Jiájkani Jesusi, Tata Diosïri jurhijkandani ladu erokuarhispti astaka Jeoba íntskupka uinhapikua para juramuni Parhakpinirhu (Ebreu 10:12, 13). Ka iásï Jesusi juramuxatiia jini auandarhu, ka imeri chúxapatichaksï eianhpixati ini ambakiti ambe iápurhu parhakpinirhu. Arhinta je Daniel 7:13, 14 ka Mateu 24:14.

Jimboka Jesusi juramutiskia, ima uraati imeri uinhapikuani para kʼamajkuni iámindu no sési jásï ambeni ka ístu imechani engaksï no sési jásï ambe újka. Iámindu imecha engaksï jakajkujka Jesusini ka kurhajchanksï, uaatiksï ambakiti irekakua ma jatsini paraisu ma jimbo ixú Echerirhu. Arhinta je Salmo 37:9-11.

 

PARAJTSÏ SÁNDERU MÍTINI

¿AMBEMINDUSÏ JORHENTPEJKI BIBLIA?

Euajpintskua, sánderu ambakiti regalu Tata Diosïri

¿Ambeski euajpintskua? ¿Nénaksïni uá marhuachini?