Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Ambakiti ambe enga Tata Diosïrika

 JORHENGUARHIKUA 8

¿Andisï Jeoba jurajkuni jaki eska jauaka kómu nitamakua ka no sési jásï ambe?

¿Andisï Jeoba jurajkuni jaki eska jauaka kómu nitamakua ka no sési jásï ambe?

1. ¿Néna uénaski jarhani no sési jásï ambe?

Jeoba jurajkuxati eska kʼuiripu juramuaka ma tiempu, para xarharani eska kʼuiripu no uáka sési peentani uandanhiatechani

Jiáni uénasti no sési jásï ambe jarhani enga Satanasi úndapka chikuanderani. Uénakuarhu, Satanasi ambakiti ánjili máespti, peru no “jurhimbitku uandas[pti]” (Juanu 8:44). Úndaspti uékani kómarhikuani enga Tata Diosïrika. Satanasi chikuanderakuspti Ebani, ka úspti eska Eba imani kurhajchapiringa ka no Jeobani. Tátsekuajtu Adani no kurhajchaspti Jeobani ísï eska Eba. Inde ambe enga Adani úpka, juásti kómu nitamakuani ka uarhikuani. Arhinta je Génesis 3:1-6, 19.

Enga Satanasi arhipka Ebani eska no kurhajchapiringa Tata Diosïni, Satanasi xarhataxapti eska nóteru jiókuarhisïrengia Jeobani komueska imeri juramuti, o komueska ima enga Sánderu Kʼéri Ambeka. Sáno iámindu kʼuiripu no uékasïndi eska Jeoba juramukuauaka, ka ísïksï niárasïndi Satanasini jingoni úkuarhini. Ka jimbosï Satanasi jindeeti “i parhakpini anapu juramuti”. Arhinta je Juanu 14:30 ka 1 Juanu 5:19.

2. ¿No sési úkata jarhaspi ambe enga Tata Diosï kueraapka?

Iámindu ambe enga Jeoba kueraaka sési úkata jarhasti. Ánjilicha ka orheta kʼuiripuecha, úpirindiksï sési kurhajchani Tata Diosïni (Deuteronomio 32:4, 5). Jeobajtsïni kueraasti parachi úni erakuni sési jásï ambe úni o no sési jásï ambe úni. Ini ambechi jimbo úsïnga xarhatani na engachi xáni uékajka Jeobani. Arhinta je Santiagu 1:13-15 ka 1 Juanu 5:3.

3. ¿Andisï Tata Diosï jurajkuni jaki kómu nitamakuani?

Jeoba jurajkuxati eska ma tiempu Satanasi ka imecha engaksï imani jingoni úkuarhijka nóksï kurhajchaaka. ¿Andi? Para xarhatani eska no nema úsïnga sési irekani enga no jurajkujka eska Tata Diosï juramukuaka  (Eclesiastés 7:29; 8:9). Ini seisi mili uéxurhini jimbo enga nitamakia, xarharasïndi eska ísïska. Juramutichaksï no úsïndi kénditaani guerrechani, atajperakuechani, pʼamenchakuechani ka ambe enga no jurhimbitika. Arhinta je Jeremías 10:23 ka Roma 9:17.

Engachi jurajkuska eskajtsïni Tata Diosï juramuchiaka, kánikuajtsïni sési nicheati (Isaías 48:17, 18). No ióni jimbo, Jeoba kʼamajkuauati gobiernuechani. Ka imechajkuksï irekaati Echerirhu engaksï jiókuarhiaka eska Tata Diosï juramukuauaka (Isaías 11:9). Arhinta je Daniel 2:44.

4. ¿Ambechi uá úni engajtsïni útasï Tata Diosï tiempu íntskuni jaka?

Satanasi uandasti eska no ma kʼuiripu mintsita jingoni marhuakuaka Jeobani. Peru Tata Diosïjtsïni íntskuxati tiempu parachi xarhatani juchari irekakuani jingoni eska Satanasi chikuanderari máeska ka eskachi Tata Diosïri gobiernuni jingoni jarhaska ka no kʼuiripuecheri gobiernuni jingoni. Arhinta je Job 1:8-12 ka Proverbios 27:11.

5. ¿Nénachi uá Tata Diosïni jingoni úkuarhini?

Juchari irekakuani jingoni, xarhataakachi eskachi uékasïnga eskajtsïni Jeoba juramuchiaka

Engachi jorhenguarhiska Tata Diosïri ambe ka engachi kómarhiska ísï eska Biblia na uandajka, xarhatanchi jauaka eskachi uékasïnga eskajtsïni Tata Diosï juramuchiaka (Juanu 4:23). Parachi xarhatani eskachi no jiókuarhisïnga Satanasiri gobiernuni, ísï eska Jesusi na úpka, nochi jámaaka inchamukuni politikarisï ka guerrecharisï. Arhinta je Juanu 17:14.

Satanasi úrasïndi imeri uinhapikuani paraka jauaka ísku jándikua ambe ka no sési jásï ambe. Engachi no uáka i jásï ambe, juchari parienticha, ka juchari amiguechajtsïni uáti teresmarhuni o ikiachintsïni (1 Pedru 4:3, 4). Ísï jimbo, jatsiskachi para imechani jingoni jámani engaksï uékajka Tata Diosïni ka engaksï kurhajchaajka imeri juramukuechani. Engachi ísï úska, xarhataakachi eska Satanasi chikuanderaxapka enga uandapka eska no nema marhuakupiringa Tata Diosïni enga no sési nitamakuarhini japiringa. Arhinta je 1 Korintu 6:9, 10 ka 15:33.

Mítini eskajtsïni Tata Diosï uékasïnga, mintsikakuajtsïni íntskusïndi eska kʼamakurhiaka no sési jásï ambe ka kómu nitamakua. Imecha engaksï jakajkujka eska i ambe ísïska, irekaatiksï Echerirhu para méntkisï. Arhinta je Juanu 3:16.