Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Ambakiti ambe enga Tata Diosïrika

 JORHENGUARHIKUA 5

¿Ambe uékasïni úni Tata Diosï ini Parhakpinini jingoni?

¿Ambe uékasïni úni Tata Diosï ini Parhakpinini jingoni?

1. ¿Andisï kueraa Tata Diosï ini Parhakpinini?

Jeoba, kʼuiripuni íntskusti Echerini. Jimbochisï ixú irekani jaka. Adani ka Eba nóksï kueraanhaspti para auandarhu irekani, Tata Diosï tʼuini kueraauasptia ánjilichani paraksï auandarhu irekani (Job 38:4, 7). Jeoba peeraspti Adanini sési jásï jardini ma jimbo enga arhinhaenga Edeni (Génesis 2:15-17). Jeoba aiakuspti eska ima ka imeri uájpechaksï úpiringa irekani para méntkisï Echerirhu. Arhinta je Salmo 37:29 ka 115:16.

Uénakuarhu, jardini Edenijkusï jindepti paraisu ma. Adani ka Eba jatsisptiksï para kánguarhiani uájpechani astakaksï uinirapiringa echerini. Ka tátsekua Adani ka imeri uájpecha, sánhani arhipirindiksï sési jántskani astaka iámu echeri paraisu máepiringa (Génesis 1:28). Echeri no méni kʼamajkunhaati. Kʼuiripu méntkisï ixú irekaati. Arhinta je Salmo 104:5.

2. ¿Andisï iásï Echeri no jindee paraisu ma?

Adani ka Eba nóksï kurhajchaspti Jeobani, ísï jimbosï Jeoba petaantapti jardinirhu. Jardini tsïnchisti ka no ma kʼuiripu ústi ménderu úntani. Jiáni uénasti jarhani ixú Echerirhu puru ima kʼuiripuecha engaksï no sési jásï ambe újka (Job 9:24). Arhinta je Génesis 3:23, 24.

¿Mirikurhiskia Jeoba ambe enga uékaenga úni ini Echerini jingoni? ¡Nómbe! No nema jarhasti enga sánderu uinhapitika eska ima. Ima méntkisï úsïndi ambe enga eiatspijka (Isaías 45:18). Ima uáti eska sési irekanhaaka ixú Echerirhu ísï eska na uékaenga. Arhinta je Salmo 37:11, 34.

3. ¿Néna ménderu sési jándentaa Parhakpini?

Echeri jiáni sési jándentaati enga Jesusi juramuni jauaka Tata Diosïri Reinurhu. Uarhiperakua ma jimbo enga Armajedoni arhinhajka, Jesusi orhekupauati Tata Diosïri ánjilichani para kʼamajkuani iámindu imechani engaksï no újka ambe enga Tata Diosï uékajka. Tátsekua, Jesusi mili uéxurhini ónhaati Satanasini. Tata Diosïri ireta tsípiti pakaraati jimboka Jesusi kuájchakuauaka  ka no jurajkuauati. Ka íksï Paraisurhu irekaati para méntkisï. Arhinta je Jaŋaskuecha (Apocalipsis) 20:1-3 ka 21:3, 4.

4. ¿Káni kʼamakurhia iámu no sési jásï ambe?

¿Káni kʼamajkua Tata Diosï iámindu no sési jásï ambeni? Jesusi uandaspti eska japiringa ambe ma enga xarhatapiringa eskachi ultimu jurhiatikuechani jimbo jarhaska. Iámindu no sési jásï ambe enga iásï nitamani jaka parhakpinirhu, úpirindi kʼamajkuani kʼuiripuechani, i ambe xarhatasïndi eska kʼamakurhixamkia “iámindu ambe enga úkuarhini jaka parhakpinirhu”. Arhinta je Mateo 24:3NM ka Mateu 24:7-14, 21, 22.

Jesusi auandarhu uératini mili uéxurhini juramuati Parhakpinirhu, ka imani tiempuni jimbosï kénditaati iámindu no sési jásï ambeni (Isaías 9:6, 7; 11:9). Jesusi juramutiuati ka ístu kʼéri saserdoti ma, ísï jimbosï uáti eskaksï nóteru pekadu jukarakia imecha engaksï uékajka Tata Diosïni. Tata Diosï, Jesusini jimbo kénditauati pʼamenchakuechani, tʼarhepikuani ka uarhikuani. Arhinta je Isaías 25:8 ka 33:24.

5. ¿Neechaksï ireka Paraisurhu?

Jima engaksï Jeobaeri testiguecha tánguarhijka, mítiauakajtsï imechani engaksï Tata Diosïni uékajka ka engaksï jánguarhintajka kurhajchani

Imaksï irekaati Paraisurhu engaksï kurhajchaaka Tata Diosïni (1 Juanu 2:17). Jesusi arhiaspti imeri chúxapatichani eskaksï nipiringa jirinhaani kʼuiripuechani engaksï ambakiti mintsita jataka ka eskaksï jorhendaapiringa ambeksï úni para Jeoba jaiapanhiantaani. Ini jurhiatikuechani jimbo, Jeoba miioni jimbo kʼuiripuechani jorhendaaxati parakaksï uáka sési irekani Paraisurhu (Sofonías 2:3). Jima engaksï Jeobaeri testiguecha tánguarhijka, temungurhiricha jorhenguarhisïndi néna sánderu sési kámberani ka jorhenguarhisïndiksï néna sési kámaani uájpechani. Sapicha ka tátembecha márkuksï kómarhisïndi Tata Diosïni ka Bibliani jimboksï jorhenguarhisïndi sánderu sési irekani. Arhinta je Miqueas 4:1-4.

 

PARAJTSÏ SÁNDERU MÍTINI

¿AMBEMINDUSÏ JORHENTPEJKI BIBLIA?

¿Ambe uá Tata Diosï Echerini jingoni?

¿Úkuarhia ambe enga Tata Diosï uékajka úni, eska echeri paraisu máeuaka? Enga ísïuaka, ¿káni ísï úkuarhia?