Exeni ambe enga jataka

Segundu menu jimbo nirani

Jeobaeri testiguecha

Purépecha

Karta Grupueri enga Orhejtsïkuajka iámindu kúnguarhikuechani 2017

Karta Grupueri enga Orhejtsïkuajka iámindu kúnguarhikuechani 2017

Juchari erachicha:

Dosi mili seisientu uéxurhini ísïstia enga profeta Esekieli exepka bisioni ma: kʼéri karruajeni ma enga Juramuti iámu amberi manatenga. Ambe enga sánderu ísku pakatpenga imani karruajeri, jindespti néna enga manakuarhienga. Xáni uinhamu nirasïrendi eska piritakua ma, asta jiáni jamberi enga mójtakuenga direksioni ka para mójtakuni direksioni no sáni anhaxurhisïrendi ni kʼuntsïkurhini (Ezeq. 1:4, 9, 12, 14, 16-27).

¿Ambejtsïni miátantasïni i bisioni? Eska Jeobaeri organisasioni auandarhu anapu no na jatini anhaxurhisïnga. ¿Ka ambechi úpirini uandani echerirhu anapu organisasioniri? Ambe enga úkuarhika jiniani aniu de serbisiu jimbo, xarhatasïndi eska Jeoba úxaka eska imeri ireta ixú Echerirhu uinhamu nirani jauaka.

Jini Estados Unidos, uánikua erachicha engaksï Beteli jaka, kánikuaksï okupadu jarhaspti jimbokaksï mótsixapka Brooklyn uératini sentrali mundialirhu, enga Warwick (Nueva York) jaka o máteru lugaricharhu engaksï Betelirika. Ka máruksï máteru nani ísï axanhastia. Máteru paisicharhu, betelitechaksï kánikua ánchikuarhisti para uáni sukursalichani, sési jájkuantani ka májku kʼéri uántani, oksï máteru nani ísï mótsini. Ka jamberijtsï cha no niáraka mótsini máteru kʼumanchikuarhu, peru seguru eskajtsï chájtu uánikua máteru ambe jimbo okupadu japka.

Grupuni enga Orhejtsïkuajka iámindu kúnguarhikuechani, sési pʼikuastasïndi ka uinhaperantani, exeni na engaksï interu Parhakpini anapu erachicha xáni jánguarhintajka paraksï seguirini Jeobaeri organisasionini. Mítiskachi eskaksï uánikuecha niraska marhuani nani engaksï sánderu uétarhijka eianhpiricha. Máteruksï erakusti máteru idioma jimbo eianhpini o jimbanhi ambe úrani. Ka uánikuaksï útasï mámaru ambe úxati paraksï sánderu sési marhuakuni Jeobani. Ístu, iámindu erachicha engaksï no jurajkujka Jeobani, asta ima engaksï jatirikia oksï pʼamenchani jarhani, seguirixatiksï no kuatantaparini uiriani karrerarhu enga tsípikuarhu pájpijka, méntkisï jánguarhintaparini marhuakuni Jeobani ka seguru japarini eskaksï uékasïnga xarhatani eska Satanasi chkuandera máeska (1 Kor. 9:24).

Uákajtsï mintsikani eska Jeoba exesïnga na engajtsï xáni jánguarhintajka iáminduecha para imani marhuakuni (Eb. 6:10). Chájtujtsï májkueni úsïnga eska Abraani ka Sara. Enga Abraani jukari 70 uéxurhini jatiripkia, tsípekua jingoni uékaspti jurajkuni imeri iretani Uri ka asta Kanaani mótsini imeri familia jingoni. Jima, jatsispti para sieni uéxurhini kʼumanchikua sïkuiriricharhu irekuarhini astaka uarhipka. ¡Xáni uánikua ambeksï úpka Abraani ka Sara paraksï Jeobani marhuakuni! (Gén. 11:31; Uku. 7:2, 3).

 Sésichi úsïnga kurhamarhikuarhini sinchi juchajtu jánguarhintaxaki. Iámindu engaksï no jurajkujka Jeobani ini últimu jurhiatikuechani jimbo, kumplirixatiksï ambe enga Jesusi erokuarhijka eskachi uáka. Imajtsïni juramuchisti: “Ísï jimbo ní je jorhendaani iámindu kʼuiripuechani, ka bautisaria je Tátiri ka Uájperi ka espiritu santueri nombri jimbo” (Mat. 28:19).

Enga Jesusi uandapka “ní je”, arhikuekaxapti eskachi jatsiska para okupadu jarhani. ¡Ka xáni engachi sési pʼikuarherajka exeni ambe engaksï xáni úka Kristueri chúxapaticha engaksï xáni ánchikuarhiriika, uéxurhini enga nitamakia! Sési jimbo, xarharasïndi eska Jeoba újchakuraxaka ambakiti eianhperakuani Reinueri ka eska imeri jájki jimbosï orhepani uérani jaka (Mar. 13:10).

Uánikua kʼuiripu jiókuarhixati ini eianhperakuani. Uéxurhini enga nitamakia, niáraspkachi 8,340,847 aianhpiricheni ka 10,115,264 estudiu bíblikuechaksï íntspinhaspti mándani kutsï. I ambe xarhatasïndi eska Jeobaeri karru no anhaxurhisïnga, ¡ka ni cha! Ísï jimbo, seguiri je úni chári ambakiti ánchikuarhitani, ini tiempu jimbo enga pakarani jaka ante de Jeoba míkani puertani enga pʼímutantskuarhu pájpijka.

¡Xáni ambakiti ambejtsïni miátantajka i uéxurhini anapu textu 2017! I arhisïndi: “Mintsika Jeobani ka ambakiti ambe ú” (Sal. 37:3). Engachi ambakiti ambe újka eska na arhijka i textu, Jeobani marhuakuparini, xarhatasïngachi eskachi mintsikasïnga imani. Asï méni mirikurhi je eskachi no jandiajku jarhaska. Jesusijtsïni eiachisti: “Ji méntkisï jauaka chánksïni jingoni astaka jamberi kʼamaraaka parhakpini” (Mat. 28:20). ¿Cha exesïni eska Jesusi ménisï nóteru kumpliriuakia imeri eiatsperakuani?

Miá je: Jeoba seguiriuati újchakurani juchari ambakiti ánchikuarhita eianhpikuarhu. Sea engachi kánikua úska o sánititku, ambe enga sánderu jukaparhakueka para Jeoba, jindesti eskachi íntskuni jauaka xáni eskachi xáni uáka ka eskachi mintsita jingoni uáka. Engachi ísï újka, tsíperakusïngachi mintsitani ka sésichi pʼikuastasïnga (2 Kor. 9:6, 7). Ísï jimbo, ju je seguirini Jeobani kómarhini, estudiarini imeri Karakatani ka tsípekua jingoni aianhpeni. Engachi ísï úska, juchari pájperakua Jeoba jingoni sánderu uinhapiati.

Satanasi mítisti “eska nóteru ióni” irekaakia ka jánguarhintaxati parakachi jucha jurajkuaka Jeobani (Jaŋ. 12:12). Na enga jatini jamberi úska, Satanasi seguiriuati úrani ambe enga xáni uáka parajtsïni jarharitani Jeobaeri. Peru engachi jucha andarheratini jauaka Jeobani, Noambakiti no méni uáti úni ambe enga uéjka (Sal. 16:8). Asï mirikurhi je eskaksïni kánikua uékasïnga ka eskaksïni agradeserichesïnga ambe engajtsï xáni újka parajtsïni jarhuatani kuidarini Jeobaeri Reinueri ambe, ini últimu jurhiatikuechani jimbo.

Chári erachicha,

Grupu enga Orhejtsïkuajka iámindu kúnguarhikuechani Jeobaeri Testiguecheri