Exeni ambe enga jataka

Segundu menu jimbo nirani

Jeobaeri testiguecha

Purépecha

¿Andiksïsï Jeobaeri testiguecha no jiókuarhijki iurhiriri jatantani?

¿Andiksïsï Jeobaeri testiguecha no jiókuarhijki iurhiriri jatantani?

Ambe enga uandanhajka ka ambe enga jurhimbikueka

Ambe enga uandanhajka: Jeobaeri testiguechaksï no nirasïndi doktoricha jingoni jimbokaksï no jakajkusïnga eskaksï uáka jarhuataani.

Ambe enga jurhimbikueka: Testiguechachi jánguarhintasïnga jirinhani eskajtsïni ambakiti doktori ma exeaka. Enga ma ísï jucha —o nema juchari familiarhu anapu— pʼamenchajka o jatsijka para operarinhani, nirasïngachi doktoricha ka sirujanuecha jingoni engaksï jorhenaka operarpini no úraparini iurhiri. Ka kánikuachi agradeserisïnga engaksï sánderu tratamientuecha jakaia para no úrani iurhiri. Ístu, tratamientuecha engaksï no úrajka iurhiri engaksï únhaka para jarhuatani Testiguechani, úranhaxati uánikua paisicharhu para máteru kʼuiripuechani jarhuataani. Iásï, né uéjki uáti erakuani tratamientuechani engaksï no peligru máeuaka para tsípikua, komueska pʼamenchakua ma pʼirani iurhirini jimbo, no sési úkuani juchari defensechani o eska nema ekibokarikuarhiaka.

Ambe enga uandanhajka: Jeobaeri testiguechaksï tsinajpesïndi jakajkukua jimbo.

Ambe enga jurhimbikueka: Jucha no méni tsinajpeska jakajkukua jimbo.

Ambe enga uandanhajka: Úrani máteru ambe para no iurhiri jatantani kánikua jukaparhasti.

Ambe enga jurhimbikueka: Né uéjki úsïndi meiampiani tratamientuechani para no úrani iurhiri. *

Ambe enga uandanhajka: Uánikua Testiguechaksï, asta sapiicha jamberi, uarhisïndiksï mándani uéxurhini jimbokaksï no jiókuarhisïnga jatantani iurhiri.

Ambe enga jurhimbikueka: I ambe enga uandanhajka no nani uaxastakata jarhasti. Iásïksï sirujanuecha pʼindesti uaani operasionichani engaksï úkua jukaka —komueska operasionicha ortopedikas o mintsitaeri ka mójtakuani organuechani— engaksï no uétarhijka iurhiri. * Pʼamenchaticha engaksï no jiókuarhijka iurhiri jatantani májkuenksï o sánderu sési tsinakuarhisïndi eska ima engaksï jiókuarhijka iurhiri jatantani, asta sapiicha jamberi. * Ka no nema úsïndi asegurarini eska pasienti ma uarhiaka enga no jatantaaka iurhiri ni eska irekaaka enga jatantaska.

¿Andiksïsï Jeobaeri testiguecha no jiókuarhijki iurhiri jatantani?

Jindesti relijioniri ambe jimbo, no jimbokachi no mintsikasïnga medisinani. Ka Antiguo ka Nuebu Testamentu juramuchisïndijtsïni eskachi no jiókuarhiaka iurhiri (Génesis 9:4; Levítico 17:10; Deuteronomio 12:23; Ukuecha 15:28, 29). Ístu, para Tata Diosï, iurhiri arhikuekasïndi tsípikua (Levítico 17:14). Ísï jimbo Testiguechachi kurhajchasïnga Bibliaeri juramukuani de no jiókuarhini iurhiri, jimbokachi respetarisïnga Tata Diosïni, ima engajtsïni íntskuka tsípikua.

Ménderueni eratsinhasïndia

Iásï úsïndiksïa úkuarhini operasionicha engaksï úkua jukaka no úraparini iurhiri

Jarhaspti ma tiempu engaksï doktoricha eratsienga eska úrani medisina no iurhiri jingoni —ambe enga úranhajka para no jatantani uirhiri— kánikua peligrosuespka ka astaksï uandasïrendi eskaksï pasienticha engaksï no uékaenga iurhiri jatantani uékasïrenga uarhikuarhini. Peru inde eratsikua mójtakurhistia últimu uéxurhinichani. Ejemplu ma, 2004 jimbo, rebistarhu ma medisineri uérasti artikulu ma enga uandaenga: “Uánikua ambe enga úranhajkia para Jeobaeri testiguechani atenderiuani, uéxurhinichani engaksï jurhani jakaia jindeuati ambe enga úranhaakia para iáminduecha”. * Ka 2010 jimbo, libru Medicina transfusional uandaspti eska ini ambe jimbo enga únhajka para no úrani iurhiri “uákachi eska ‘operasioni no úraparini iurhiri’ jindeuaka ambe ma enga méntkisï úrakuarhiaka ísï eska operasioni enga no uétarhijka eska pasienti pakaraaka ospitalirhu”.

Uánikua doktoricha interu parhakpini anapuecha úxatiksïa ambe enga uétarhijka para no tsïtani iurhiri para uáni operasionichani engaksï úkua jukaka no úraparini iurhiri. I ambe jarhastia asta paisicharhu engaksï pobrika, ka uánikua kʼuiripu enga no Testigueka kurhajkuarhiasïndi.

^ párr. 8 Medicina transfusional, pájina 14; Transfusion and Apheresis Science, bolumeni 33, númeru 3, pájina 349.

^ párr. 10 Revista Española de Cardiología, bolumeni 59, númeru 5, pájina 507 a 509; Acta Médica Colombiana, bolumeni 26, númeru 5, pájina 261; The Journal of Thoracic and Cardiovascular Surgery, bolumeni 134, númeru 2, pájina 287 ka 288; Texas Heart Institute Journal, bolumeni 38, númeru 5, pájina 563; Basics of Blood Management, pájina 2; Continuing Education in Anaesthesia, Critical Care & Pain, bolumeni 4, númeru 2, pájina 39.

^ párr. 10 Revista de la Federación Argentina de Cardiología, bolumeni 34, númeru 3, pájina 407 ka 408; Revista Española de Cardiología, bolumeni 60, númeru 7, pájina 727 a 731.

^ párr. 14 Continuing Education in Anaesthesia, Critical Care & Pain, bolumeni 4, númeru 2, pájina 39.