Exeni ambe enga jataka

Segundu menu jimbo nirani

Jeobaeri testiguecha

Purépecha

¿Andiksïsï Jeobaeri testiguecha no úntajki Nabidadini?

¿Andiksïsï Jeobaeri testiguecha no úntajki Nabidadini?

Ambe enga uandanhajka ka ambe enga jurhimbikueka

Ambe enga uandanhajka: Jeobaeri testiguechaksï no úntasïndi Nabidadini jimbokaksï no jakajkusïnga Jesusini.

Ambe enga jurhimbikueka: Kristianuecheskachi ka seguruchi jarhaska eska solu Kristuni jimbo úsïnga ma pʼímutantskateni (Ukuecha 4:12).

Ambe enga uandanhajka: Xereantasïndiksï familiechani jorhendaaparini imechani engaksï jorhenguarhini jaka eskaksï no jatsiska para úntani Nabidadini.

Ambe enga jurhimbikueka: Familia kánikua jukaparhakuesti para jucha; ka úrasïngachi Bibliani para uinhaperani familiechani.

Ambe enga uandanhajka: Nóksï tsípikuarhisïndi imani ambe jimbo enga Nabidadirhu úkuarhijka, komueska intsïmpini, pínandikua jatsini ka májku kʼéri jarhani imani jurhiatikuechani.

Ambe enga jurhimbikueka: Jánguarhisïngachi pínandikua jirinhani ka pauani pauani intsïmpini (Proverbios 11:25; Roma 12:18). Ejemplu ma, nochi kurhajkuarhisïnga tumina juchari tánguarhikuecharhu ni engachi eianhpijka, jimbokachi úsïnga ambe enga Jesusi uandapka: “Chájtsï no meiampiska indeni ambe jimbo engajtsï intsïnhaka, jimajkani chájtu íntspinta je ka no kobrarpini” (Mateu 10:8). Ístuchi eianhpisïnga eskajtsïni Tata Diosïri Reinujkusï íntskujka erokuarhikua ma para jarhani pínandikua (Mateu 10:7).

¿Andiksïsï no úntajki Jeobaeri testiguecha Nabidadini?

  • Jesusi juramuspti eska miánhantapiringa imeri uarhikua, no imeri andajpenukua (Lucas 22:19, 20, Traducción del Nuevo Mundo [TNM]).

  • Ni Jesusiri apostulicha ka ni orheta kristianuechaksï úntaeni Nabidadini. Seguni Diccionario del cristianismo, i kʼuínchikua “Roma uaxastanhasti uéxurhini 330 ísï” despuesi de Jesusi, jukari dosientu uéxurhini tátsekua enga últimu apostuli uarhipka.

  • No ma ambe jarhasti enga xarhatajka eska Jesusi 25 de disiembrini andajpenuska; ísïsti, Biblia no uandantasïndi na jatini andajpenuski.

  • Kurhangusïngachi eska Tata Diosï no jeiapanhintasïnga Nabidadini, jimboka pʼindekuecharhu uéraska ka kʼuiripueri úkuecharhu engaksï no marhuakuenga Tata Diosïni (2 Korintu 6:17).

¿Andiksïsï no májkueni ambe újki eska sáno iámindu kʼuiripu?

Nájkirukaksï mítika eska Nabidadi no terokuntasïnga Biblia jingoni ka eska uaxastakata uéraska kʼuiripu jimbo enga no marhuakuenga Tata Diosïni, uánikua kʼuiripu úntasïndi eratsiparini eska no xáni no sési ambeska ka eska no no sési jarhaska ísï úni.

Bibliajtsïni pʼímarhisïndi parachi úrani juchari eratsitarakuani parachi erakuni ambe úni (Romanos 12:1, 2, TNM). Ístujtsïni jorhendasïndi jukaparharani jurhimbikuani (Juanu 4:23, 24). Jukaparharasïngachi ambe engaksï máteruecha eratsijka juchari ambe, peruchi no no kurhajchaauaka Bibliaeri prinsipiuechani nomasi parachi sési pakarani kʼuiripu jingoni.

Nájkirukachi jucha no úntajka Nabidadini, mándani kʼuiripu uáti erakukuarheni ambe úni ini ambe jimbo. Mítiparini ini ambe, nochi úsïnga eskaksï máteruechajtu no úntaaka.