Exeni ambe enga jataka

Segundu menu jimbo nirani

Jeobaeri testiguecha

Purépecha

Jeobaeri testiguechaksï aianhpisïndi París na enga Biblia eiatspijka eska jauaka planeta ma sini kontaminasioni

Jeobaeri testiguechaksï aianhpisïndi París na enga Biblia eiatspijka eska jauaka planeta ma sini kontaminasioni

De 30 de nobiembri a 12 de disiembri de 2015, París (Francia), úkuarhispti tánguarhikua númeru 21 de las Naciones Unidas, para uandontskuarhinhani kambiu klimatikueri ambe (COP21). Orhejtsïkuticha 195 nasionicheri, tánguarhintasptiksï para uandontskuarhini ambeksï uá úni paraka ima ambe enga kʼuiripu újka, no xáni no sési úkuaka klimani. Sáno 38,000 kʼuiripu tánguarhispti, máruksï gobiernurhu anapuespti, sientifikuecha, ekolojistecha ka empreseri orhejtsïkuticha. Ka ístu uánikua kʼuiripu tánguarhispti jima no iauani, nani enga preparadu jatsinhapka informasioni kambiu klimatikueri ambe.

Nájkirukaksï Jeobaeri testiguecha no nípka imani tánguarhikuarhu, imajtuksï uandanhiasïndi mediuambienti jimbo. Jimboksïsï imani jurhiatikuechani, uánikua testiguecha úpti kampania espesiali ma jini París, para mítitarkuarhini ambakiti aiatsperakuani enga Bibliarhu jaka, eska nóteru ióni jimbo, nóteru jauakia kontaminasioni juchari planetarhu.

Enga uarhiiti ma enga Jeobaeri testigueka biajarini japka, uandontskuarhispti achamasï ma jingoni enga Perú anapueka ka enga ísï xukuparhatini japka eskaksï Perú anapuecha. Ima achati aianguspti eska nájkiruka no ma ambe pʼamenchenga ka tsípikua jingoni irekuarhini sési jásï ma juátarhu, uandanhiasïrenga ambe enga úpiringa úkuarhini sánderu orhepatini juchari parhakpini jingoni. Kánikua tsípispti mítini imani xáni ambakiti erokuarhikuani enga Biblia íntspijka, ka kánikua tsípekua jingoni, jiókuarhispti tarjeta ma para inchani juchari pájinarhu jw.org.

Trenirhu ma, tsimani Jeobaeri testiguechaksï uandontskuarhispti Estados Unidos anapu sientifiku mediuambientali ma jingoni. I, ísku pakaraspti enga mítipka eska institusioni Green Building Initiative íntsaspka klasifikasioni ma de kuatru Globos Verdes, tsimani edifisiuechani engaksï Testiguecha uápka Wallkill (Nueva York). Ini ambe jimbo, i institusioni íntsaspti premiu ma jimbokaksï jánguarhintaspka úraani imani metoduechani diseniueri ka konstruksioniri engaksï no kontaminarijka, para i jimbanhi edifisiuechani uaani jini sukursalirhu de Estados Unidos. I achatijtu tsípekua jingoni jiókuarhispti tarjeta ma.

Exeparini eskaksï Testiguecha kánikua uandanhiasïnga mediuambienti jimbo, uánikua kʼuiripuechaksï uandaspti eskaksï inchapiringa juchari pájinarhu Internetiri. Ejemplu ma, uarhiiti ma Canadá anapu enga representantipka, mítispti eskaksï Jeobaeri testiguecha jánguarhintaspka paraka pájaru azulejos garganta canela o venturas azulillos, úpiringa seguirini uaani xerekua jimbanhi sede mundialirhu terrenuecharhu jini Warwick (Nueva York). Ima uandaspti: “Antesi de uénani kuájchakuni mediuambientini, ji ornitóloga máespka (kʼuiripu ma enga abechani estudiariuajka). No mítispka eskaksï Jeobaeri testiguecha xáni respetarisïrenga naturalesani. Arhiantauaka imecheri publikasionichani ka inchaaka imecheri pájinarhu Internetiri parani sánderu sési mítiani”.

PARAJTSÏ SÁNDERU MÍTINI

AMBAKITI AMBE ENGA TATA DIOSÏRIKA

¿Ambe uékasïni úni Tata Diosï ini Parhakpinini jingoni?

Bibliajtsïni eiangusïndi andisï kueraa Tata Diosï parhakpinini, káni enga kʼamakurhiaka no sési jásï ambe, ka ambe enga úkuarhiaka ini echerini jingoni ka imeecha jingoni engaksï ixú irekaka.