Exeni ambe enga jataka

Segundu menu jimbo nirani

Jeobaeri testiguecha

Purépecha

Librueri feria ma jimbo mítitarpisïndiksï jw.org

Librueri feria ma jimbo mítitarpisïndiksï jw.org

Feria Internacional del Libro Toronto anapu, úkuarhispti exibisioni ma libruecheri engaksï imprimirikata jakaia ka ístu elektroniku jimbo, i úkuarhispti Centro Metropolitano de Convenciones indeni ireta jimbo 13 a 16 de nobiembrini de 2014 ka nirasptiksï jima jukari 20,000 kʼuiripuecha.

Engaksï exponerini japka feriarhu ístuksï jarhaspti Jeobaeri testiguecha, engaksï puestu ma pérapka enga kánikua sési xarharaenga ka engaksï uánikua ambe jatsipka. Mostradorichanksï jatsiaspti tabletecha jingoni paraksï jorhentpini néna úrani pájina jw.org Internetirhu.

Achati ma enga úpka eska i feria úkuarhipiringa uandaspti: “Chári pájina Internetiri kánikua jimbanhisti. Máru representanticha imecheri engaksï libruechani uájka ka engaksï ixú jaka, sési japirindi eskaksï exepiringa na engajtsï cha exerpiajka publikasionichani”. Uánikuecha engaksï nípka uandasptiksï eska jw.org jindeska pájina ma enga kánikua sési xarharajka ka enga no úkua jukaka para úrani, nani engaksï jaka mókuntskuecha ima kurhamarhikuecheri engaksï kánikua jukaparhakueka. Ístuksï kánikua sési exesti eska i pájina íntspesïnga jarhuajperata para sési péntaani problemechani ka uandanhiatechani.

Jeobaeri testiguecha engaksï puesturhu japka kuenta íntskukuarhisptiksï eskaksï uánikuecha no mítispka pájinani jw.org. Sáno iáminduechaksï jiókuarhispti tarjeta ma paraksï úni uandajpanhani o tratadu ¿Nanijtsï exeantaua mókuntskuechani kurhamarhikuecheri tsípikueri? Ka ístu, uánikuechaksï uandaspti eskaksï ménderu inchapiringa pájinarhu, ka máteruechaksï kurhajkuarhispti eskaksï pʼorhembinhapiringa imecheri kʼumanchikuarhu.

Ka jimboka biernesï feriarhu úkuarhespka kʼuínchikua ma para sapiicha, Jeobaeri testiguechaksï exerpiaxapti bideuechani engaksï jw.org jimbo jaka ka enga arhinhajka jorhenguarhikuecha dibujuecha jingoni. Uánikua alumnuecha ka maestruecha engaksï grupu jimbo nirani japka anhaxurhisptiksï para exeani bideuechani.

Chicago anapu ma achati enga empresarhu ma ánchikuarhijka engaksï Bibliaechani imprimiriajka, felisitariuaspti Jeobaeri testiguechani jimboka kánikua sési úkata jarhaska Traducción del Nuevo Mundo de las Santas Escrituras engaksï exerpini japka. Ka kurhakuaspti tarjeta ma para úni uandajpaani imechani engaksï uájka Bibliaechani.

Juchari pájina Internetiri jukari 700 idioma jimbo jarhasti. Ka imecha engaksï nípka feriarhu exesptiksï 16 idiomecha jimbo: amárico, bengalí, chino, coreano, español, francés, griego, gujarati, hindi, inglés, portugués, sueco, tamil, tigriña, urdu ka vietnamita.

Jeobaeri testigu ma enga feriaeri puesturhu japka exespti eska sánderu sési jarhaspka exeraani pájina Internetiri kʼuiripuechani ka eska nomasi arhiani eska jarhaska inde pájina. Uandaspti: “I feria kánikua marhuasti parachi úni mítitarpini juchari pájina Internetiri”.

PARAJTSÏ SÁNDERU MÍTINI

¿NÉKSÏ ÚXAKI IÁSÏ AMBE ENGA JEOBA UÉKAJKA?

¿Ambejtsï exentaa Internetirhu juchari pájinarhu?

Chájtsï uáka exeni ambe engachi újka ka ambe engachi jakajkujka ka ístujtsï uáka mókuantani imani kurhamarhikuechani engajtsï cha úkuarhijka Bibliaeri ambe.

PÁJINA JW.ORG

Néna exentani informasioni máteru idiomecha jimbo

Jorhenguarhi je néna mójtakuni pájinani máteru idioma jimbo, jirinhani pájinani ma o jirinhani publikasioni ma máteru idioma jimbo.