Jurhiatikua 4 de oktubri de 2014, 19,000 kʼuiripuecha ísïksï niraspti tánguarhikuarhu númeru 130 enga mándani uéxurhini Watch Tower Bible and Tract Society of Pennsylvania újka. I tánguarhikua úkuarhispti kʼumanchikuecharhu para Kʼéri tánguarhikuecha engaksï Jeobaeri testiguecha jatsika jini Jersey City (Nueva Jersey, Estados Unidos) ka ístu telebisioni jimbo nitamataranhaspti para máteru iretecha.

Mark Sanderson, enga jindeka Grupueri enga Orhejtsïkuajka iámindu kúnguarhikuechani Jeobaeri testiguecheri, orhejtsïkuspti tánguarhikuani. Uénaspti uandaparini eska ima jurhiatikua kánikua jukaparhakuespka, jimboka sieni uéxurhini andanguskia enga uénaka juramuni Tata Diosïri Reinu auandarhu.

Erachi Sanderson uandasti tanimu ambe enga Tata Diosïri Reinu úkia asta iásï jamberi:

  • Eianhperakua enga interu parhakpini úkuarhijka. Jeobaeri jarhuajperata jingoni, Testiguechaksï kánikua jánguarhintasïndi para interu Parhakpinisï eianhpini Reinueri ambe. Uéxurhini 1914 jimbo, namunitku publikadorichajkuksïsï japti, peru uéxurhini 2014 jimbo, jukari ochu miioni publikadorichestiksïa. Ka seguiriuakachi tsípiparini eianhpini astaka Jeoba uandaaka eska ánchikuarhita kʼamakurhiskia.

  • Kuájchakukua para imecha enga Reinu juramukuauaka Echerirhu. Relijioniri orhejtsïkuticha ka politikuecha, kánikuaksï no sési kaasïndi Jeobaeri testiguechani. Máruksï asta uékasïrendi kʼamajkuani. Peru Jeoba méntkisï kuidariasïndi iámindu imeri marhuarichani komu kúnguarhikua. Ka xáni uáni asuntosi legalesi engaksï andakia komu Tribunal Supremo de Estados Unidos jimbo ka Tribunal Europeo de Derechos Humanos jimbo, xarhatasïndi eska Jeoba seguirixaka kuájchakuani.

  • Eskaksï májku kʼéri jauaka iámindu jasï kʼuiripuecha. Tata Diosïri Reinu ústia eskaksï májku kʼéri jauaka kʼuiripuecha engaksï mámaru járhati pʼindekuechani jatsiaka, engaksï iápurisï anapueka, engaksï mámaru jásï idioma uandajka ka ístu jarhuatastia paraksï úni orhepani uérakuani mámaru járhati uandanhiatechani. “Milagru máesti enga solu Jeoba újka úni”, uandaspti Mark Sanderson. Ka ístu uandaspti eska para iámindu imecha engaksï pʼímarhikata japka, kʼéri kóntperata máespka ini tánguarhikuarhu jarhani enga xáni jukaparhakueka.

Serie Jeobaeri amigu úkuarhi.

Máteru parti i programaeri, puru serie karikaturaeri ambe uandaspti, enga tsimani uéxurhini uérakia. Primeru, erachi Sanderson nitamataraspti bideuni ma entrebistecha jingoni engaksï sapiicha úminhapka interu parhakpini, nani engaksï uandantapka ambe engaksï jorhenguarhikia. Iáminduechani sési pʼikuastaspti exeni na engaksï pʼikuarhinhikua jingoni uandantaenga.

Tátsekua, presentarinhaspti jimbanhi bideu ma enga arhinhajka “Jeobakini balori íntskuati” enga 12 minutu durarijka ka enga uandantajka nanaka israeliteri enga no sáni chéparini eiangupka Jeobaeri ambe Naamaniri témbani (2 Reyes 5:1-14). Bideu karhatanhaspti jw.org lunesï 6 de oktubri de 2014, ka jukari 20 idioma jimbo jarhasti.

Aplicación JW Language.

Erachi Sanderson uandaspti i jimbanhi aplikasioniri para telefonuecha, komputadorecha ka tabletecha, enga jarhuatauaka Jeobaeri testiguechani engaksï uéjka jorhenguarhini idioma ma paraksï úni sánderu uánikua kʼuiripuechani jarhuatani aianhpikuarhu. Aplikasioni jukari 4,000 uandakuechani ka fresechani jukasti 18 idioma jimbo. Ka ístu uáxatiksï arregluechani paraksï sánderu uandakuechani, frasecha ka presentasionichani jatsikuani para eianhpikuarhu ka ístu máteru ambe.

JW Broadcasting.

Imecha engaksï nípka, ískuksï pakaraspti enga anunsiarinhapka jimbanhi kanali ma Jeobaeri testiguecheri enga újka exekuarhini Interneti jimbo. Jindesti kanali ma pruebaeri enga solu inglesi jimbo jaka. Desde sede mundiali Brooklyn (Nueva York, Estados Unidos) uératini, i kanali xarhatauati bideuechani, pirekuechani, ka Bibliaeri arhintskuechani engaksï uandantskueni arhikuarhintajka. Ístu, mándani kutsï uáti exekuarhini programa espesiali ma enga nitamatarani jauaka erachi ma Grupueri enga Orhejtsïkuajka iámindu kúnguarhikuechani o jarhuajpiri ma komiteri ma.

Erachichaksï ústi exeni parti ma primeru programaeri mándani kutsïri, enga nitamatarapka Stephen Lett enga jindeka Grupueri enga Orhejtsïkuajka iámindu kúnguarhikuechani, i programarhu ístu xarharaspti reportaji ma de na enga xáni ánchikuarhinhaka para organisarini ini kanalini. JW Broadcasting uénaspti xarharani 6 de oktubrini de 2014, ka ístu uáti exenhani tv.jw.org jimbo.

“Reinu: sieni uéxurhinistia ka seguirixati”.

Samuel Herd enga jindeka Grupueri enga Orhejtsïkuajka iámindu kúnguarhikuechani, uandantaspti bideurhu ma na enga Tata Diosïri Reinu sánhani arhika jarhuajpeni para sánderu sési aianhpinhani. Ini bideu jimbo, xarharasptiksï ióntki anapu imajenicha, representasionicha, ka máru uandantskuecha engaksï uandantaapka Jeobaeri testiguecha engaksï ióni páni jakaia marhuakuni Jeobani. Ístu, xarhataspti máru ambe enga úrakuarhienga aianhpikuarhu komu “Foto-Drama de la Creación” enga únhapka ka enga iápuru etsakunhenga, gramofonuecha ka tarjetecha para eianhpini, marchecha pankartecha jingoni ka karruecha bosinecha jingoni para diskursuechani jatsikuani. Ístu uandaspti náki eskuelechaksï uénaspi para jorhentpini néna eianhpini.

¿Nénajtsïni marhuachisïni eratsintani iámindu imani ambe enga Tata Diosïri Reinu úkia ini sieni uéxurhini jimbo? Sánderuchi jakajkusïnga Tata Diosïri Reinuni ka sánderuchi uékasïnga mítini ambe uá sánderu orhepani.

Pirekuecha para kʼéri ambe arhini Jeobani.

Iáminduechaksï tsípispti enga David Splane enga jindeka Grupueri enga Orhejtsïkuajka iámindu kúnguarhikuechani, uandapka eska juchari libru pirekuecheri Cantemos a Jehová rebisarinhapiringa. Jimboka para jucha kánikua jukaparhakueska kʼéri ambe arhini Jeobani pirekuecha jingoni, libru pirekuecheri sánderu ambakiti materiali jimbo únhaati. Ísï jáxeati eska jimbanhi Biblia.

Erachi Splane ístu uandaspti eskaksï inchaatanhaaka jimbanhi pirekuecha. Peru no uétarhiati erokuarhini astaka imprimirinhaaka jimbanhi libru para pireani, jimbokaksï pérapanhaaka jw.org eskaksï na uérapani jauaka.

Tánguarhikuarhu mándani uéxurhiniri, pirenhastiksï tanimu jimbanhi pirekuecha enga familia Beteli ensaiariuapka ima semana. Erachi Splane orherukuspti koruni ma enga pirepka pirekuani ¡Qué venga el Reino establecido por Dios!, i pirekua únhaspti para jiáni enga Tata Diosïri Reinu sieni uéxurhini andagutapiringa. Tátsekua, iáminduechaksï pirespti koru jingoni. Ístu pirenhaspti jimbanhi pirekua Danos fuerzas y valor.

Entrebista.

Gerrit Lösch enga jindeka Grupueri enga Orhejtsïkuajka iámindu kúnguarhikuechani, nitamataraspti bideu ma entrebistecha jingoni enga tanimu temungurhirichani úkuapka engaksï ióni páni jakaia Beteli marhuani. Uandantasptiksï na engaksï xáni mójtakukuechani exeakia, ka i ambe xarhatasïndi eska Tata Diosïri ireta seguirixaka orhepani uérani. Erachi Lösch uandaspti eska Bibliarhu uandakata jarhaspkia eska Jeobaeri kúnguarhikuarhu sánderu ambakiti ambe úkuarhini japiringa ka arhiaspti iáminduechani eskaksï seguiripiringa orhepani Jeobaeri ireta jingoni (Isaías 60:17).

“Tiposi ka antitiposi”.

Erachi Splane explikarispti ini diskursurhu andiksïsï juchari publikasionicha nóteru xáni uandajki tipos ka antitiposiri ambe.

Antesi, uandanhasïrendi eska uánikua ióntki anapu Tata Diosïri marhuaricha, iásï anapu kristianuechani arhikuekaasïrenga. Ístuksï jakajkusïrendi eskaksï kasi iámindu Bibliaeri uandantskuecha, arhikuekasïrenga máru ambe iásï anapu Jeobaeri testiguecheri. Ísïsti, úpirindi kánikua sési ambeni terokutantani ini ambe. Jimajkani, ¿andiksïsï juchari publikasionicha nóteru xáni uandajki tipos ka antitiposiri ambe?

Ísïsti eska Bibliarhu arhisïnga eskaksï máru personajecha ka ambe enga úkuarhipka, arhikuekasïnga ambe ma o nemani sánderu kʼéri. Enga Biblia xarhatajka eska uandantskua ma profetikueska, tsípikua jingonchi jiókuarhisïnga. Erachi Splane uandaspti: “Peru enga Biblia no ma ambe uandaaka, juchajtuchi nómbe”. Ísï jimbo, nochi jatsiska para jirinhantani jarhani ambe arhikuekasïni mándani parti uandantskueri ma. Engachi ísï úska, uákachi no kuenta íntskukuarhini ambejtsïni jorhendasïni uandantskua ma, ia sea enga juchari erokuarhikua jindeka auandarhu o Echerirhu irekani (Roma 15:4). *

“¿Cha uá jingontku jarhani?”

Ini diskursurhu, erachi Lett explikarhispti na engachi jatsikia para kurhanguni iásï, eranhikuani 10 iurhitskiricheri (Mateu 25:1-13). Iásïchi arisï kurhangusïngia ini eranhikuani: nobiu Jesusisti ka iurhitskirichaksï erakukatechesti engaksï chúxapajka Jesusini (Lukasʌ 5:34, 35; 2 Korintu 11:2). I eranhikua, últimu jurhiatikuecheri ambe uandasïndi ka última parti, grani tribulasioni jimbo úkuarhiati. Enga Jesusi uandapka eskaksï sinku iurhitskiricha no eratsikua jukarispka, no arhikuekaxapti eskaksï uánikua erakukatecha jurajkupiringa Jeobani ka eskaksï jatsipiringa para máteruechani erakuantani. Sánderu sési, arhiaxapti eskaksï jingontku japiringa. Mándani erakukata tsimani opsioni jatsisti: preparadu jarhani ka jingontku jarhani ísï eskaksï sinku iurhitskiricha engaksï eratsikua jukaripka o jurajkuni Jeobani ísï eskaksï sinku iurhitskiricha engaksï no eratsikua jukaripka.

Ísï eska na explikarinhapkia máteru diskursurhu, nochi jatsiska para jirinhantani ambe arhikuekasïni mándani parti i eranhikueri. Sánderu sési, jatsiskachi para imani ambe jirinhantani engajtsïni marhuachijka. Iámindu jucha, ia sea engachi erakukateka o “máteru karichicha” jingoni, jatsiskachi para jingontku jarhani ka úni eska eramarhandikua meremerejkuaka (Juanu 10:16; Markusʌ 13:37; Mateu 5:16). No nema uáti no jurajkuni Jeobani juchantsïni jimbo. Mándani kristianu jatsisti para “erakuni tsípikuani”. ¿Néna? Jingontku japarini ka tsípikua jingoni eianhpiparini (Deuteronomio 30:19).

“Talentuecheri eranhekua”.

Erachi Anthony Morris enga jindeka Grupueri enga Orhejtsïkuajka iámindu kúnguarhikuechani, jarhuataaspti iámindu imechani engaksï jima japka paraksï úni kurhanguni jimbanhi explikasionini talentuecheri (Mateu 25:14-30). Iásïchi kurhangusïngia eska patroni enga i eranhikua uandajka (Jesusi) íntsauaka kóntperatechani imeri jántspirichani (erakukatecha engaksï no méni jurajkuaka Jeobani engaksï Echerirhu jaka) sánderu orhepatini, jiáni enga janonguaka ka íntsani tsípikua para méntkisï auandarhu. Enga Jesusi explikarini japka ambe enga úkuarhinchapiringa jántspiri malu o xepiti, no arhikuekaxapti eskaksï uánikua erakukatecha jurajkupiringa Jeobani. Sánderu sési, arhikuekaxapti eskaksï jatsispka para uinhamu ánchikuarhini ka no imani ambe úni enga no sési jaka.

¿Ambejtsïni jorhendasïni i eranhikua? Patroni enkargarispti imeri jántspirichani ma ambe enga kánikua jukaparhakuepka. Májkueni, Jesusi enkargaristi imeri marhuarichani ma ambe enga kánikua jukaparhakueka: eianhpini ka disipulu uáni. Ima erokuarhisïndi eskachi iáminduecha uinhamu ánchikuarhiaka ini ánchikuarhitarhu, xáni eskachi xáni uáka. Kʼamarhukuni jámani, erachi Morris felisitariuaspti iáminduechani jimbokaksï tsípikua jingoni úxaka ánchikuarhita Reinueri.

“¿Né atakariua no ióndani Tata Diosïri iretani?”

Títulu i últimu diskursueri enga erachi Geoffrey Jackson nitamatarapka, enga jindeka Grupueri enga Orhejtsïkuajka iámindu kúnguarhikuechani, úspti eska iáminduecha engaksï jima japka jingontkuksï japiringa. Erachi Jackson uandaspti na enga sánderu orhepani Gog de Magog atakariuaka Tata Diosïri iretani (Ezequiel 38:14-23).

Antesi, jakajkunhasïrendi eska Gog jindespka Satanasi enga petanhantapkia auandarhu. Peru, erachi Jackson explikarispti eska i ambe úsïrenga eskaksï uánikua kurhamarhikuecha japiringa. Por ejemplu, Jeoba uandaspti eska enga Gog na kʼamajkunhaakia, jindeuaka tʼirekua para ‘iámindu járhati pájaruecha engaksï kʼereskua jukaka ka para animalicha engaksï juátarhisï jámajka’ (Ezequiel 39:4). Jeoba ístu uandaspti eska ‘Gog ka iámindu ima engaksï imani jingonika’ jatsinhantaakaksï Echerirhu (Ezequiel 39:11). Peru, ¿úpirini i ambe úkuarhinchani nema enga espiritu máeka? Satanasinksï ónhaati kʼéri posurhu mili uéxurhini ka no nema antaati, ni jatsinhantaa (Jaŋaskuecha [Apocalipsis] 20:1, 2). Ka enga mili uéxurhini nitamaakia, Satanasi petanhantaati kʼéri posurhu uératini ‘para kʼarhaani kʼuiripuechani engaksï irekani jauaka iápuru parhakpinirhu, Gog ka Magogini’ (Jaŋaskuecha 20:7, 8). Ísï jimbo, Satanasi no uáti enganiarini Gogini enga ima mísmu jindeka Gog.

Erachi Jackson explikarispti eska Gog de Magog enga profesiarhu de Ezequiel jaka, no uáka Satanasini arhikuekani sino grupuni ma nasionicheri enga sánderu orhepani atakariuaka Tata Diosïri iretani. Ístu i ambe xarhatasïndi eska Gogiri atake ima mísmueska enga “norti anapu rei” uáka ka engaksï ‘parhakpini anapu reicha’ uáka (Daniel 11:40, 44, 45; Jaŋaskuecha 17:12-14; 19:19).

¿Ka néski “norti anapu rei”? Jatsiskachi para erokuarhini parachi mítini. Peru, exeni na engachi sánderu sési kurhangukia ambe enga úkuarhiaka sánderu orhepatini, uinhaperantasïndi juchari jakajkukuani. Tata Diosïri ireta no chérhesïndi Gog de Magogiri atakeni, jimboka mítiska eska enga Gog de Magog atakariuaka, tsïtaaka ka kʼamajkunhani. Peruchi jucha irekaaka para méntkisï. *

Kʼamarhukua.

Erachi Sanderson uandaspti eska jimbanhi Biblia Traducción del Nuevo Mundo ístu uéraaka tamaniu bolsiiu jimbo. Ístu uandaspti eskaksï preparariuaxaka grabasionichani Bibliaeri. Ini grabasionicharhu, úrakuarhiati ma bosi para ma personaje ka máteru bosi para máteru personaje. Íksï grabasionicha uérapani jauati jw.org ka libru de Mateu jingoni uénakuarhiati.

Erachi Sanderson uandaspti eska textu uéxurhiniri 2015 jindepiringa Salmo106:1: “Diosmeiamu arhi je Jeobani, jimboka ima ambakitiska”. Erachi Sanderson pʼímarhiaspti iáminduechani paraksï pauani pauani jirinhani ambe jimboksï úpirini diosmeiamu arhini Jeobani.

Para kʼamarhukuni tánguarhikuani, sieti erachicha engaksï jindeka Grupueri enga Orhejtsïkuajka iámindu kúnguarhikuechani, tánguarhintasptiksï paraksï iáminduecha koru jingoni pireni jimbanhi pirekuani El gran nombre de Jehová. ¡Kánikua sésiksï kʼamarhukuspti ini xáni ambakiti tánguarhikuani!

^ párr. 22 I diskursu ka máteru tsimani engaksï seguirijka, explikarhinhasïndiksï rebistarhu La Atalaya de 15 marsu de 2015.

^ párr. 30 I diskursu explikarhinhasïndi rebistarhu La Atalaya de 15 maiu de 2015.