Exeni ambe enga jataka

Jeobaeri testiguecha

Erakuni idiomani Purépecha

Graduasioni klaseri 138 Bibliaeri Jorhenguarhikua Galaadiri enga Watchtoweririka

Graduasioni klaseri 138 Bibliaeri Jorhenguarhikua Galaadiri enga Watchtoweririka

Sábadu 14 marsu 2015 jimbo, klase 138 Bibliaeri Jorhenguarhikua Galaadiri, úkuarhesti graduasioni jini Kʼumanchikuarhu nani enga Watchtoweri Jorhentpejka, enga Patterson jaka (Nueva York). Jukari 14,000 kʼuiripuechaksï ústi exeni ini programani ístu miiupariani imechani engaksï konektarikuarhipka paraksï bideu jimbo exeni engaksï máteru nanisï japka. I programa uénakuarhispti kústakua ma jingoni engaksï jindeka tʼámu kántiku jimbanhicha engaksï sánderu orhepatini pirenhapka. *

Geoffrey Jackson, enga jindeka Grupueri enga Orhejtsïkuajka iámindu kúnguarhikuechani, ima orhejtsïkuspti ini programani. Imeri uandakuechani jingoni para uénani, pʼímarhiaspti estudiantichani eskaksï no mínguarhipiringa jorhentperakuani engaksï intsïnhapka, sino eskaksï úrapiringa para jarhuataani máteruechani (2 Timoteo 2:2).

Erachi Jackson, Moisesiri ejempluni úraspti. Ma tiempu jimbo, kʼumanchikua i profeteri jindespti nani enga ireta Israeli tánguarhienga para kómarhini. Peru enga na kʼamaranhapkia únhani tabernakulu, iásï jima úranhapirindia para kómarhinhani. Peringa Moisesi no sésikua jatsipka para inchani tabernakulurhu asta jima enga ísï mítikatepka komu kuartu sánderu Pímbinhasï jimboka i kóntperata, solu jindespka para kʼéri saserdoti. Peru nájkiruka ísï úkuarhipka, Biblia no nani uandasïndi eska Moisesi no jiókuarhispka ini ambe enga úkuarhipka. Sánderu sési, sési apoiarispti Aronini imeri jimbanhi ánchikuarhita jimbo komueska kʼéri saserdoti (Éxodo 33:7-11; 40:34, 35) ¿Ambechi jorhenguarhisïni i ejemplueri? Erachi Jackson uandasti: “Jukaparharaa je chári pribilegiuechani, peru asï mínguarhia je”.

“¿Chérakuarhiajtsï enga chkurhi ma kúskaaka?” I jindespti títulu diskursueri enga erachi Kenneth Flodin nitamatarapka, enga jindeka jarhuajpiri ma Comité de Enseñanza Grupueri enga Orhejtsïkuajka iámindu kúnguarhikuechani. Ima arhiaspti estudiantichani eskaksï sánderu orhepatini úpiringa jatsiani problemechani, komueska no sési kánhani o ánchikuarhitechani engaksï úkua jukapiringa. Tátsekua úraspti uandakua ma enga Levítico 26:36 jaka, para arhistakuani estudiantichani eskaksï ísï exeapiringa problemechani komueska chkurhi kʼarhirichani, no komueska tsʼéjkukuechani engaksï no uáka orhepani uérakuani. Tátsekua, apostuli Pablueri ejempluni úraspti, enga ima úpka tekaantani uánikua problemechani jimboka mintsikasïrenga Jeobani (2 Korintu 1:8, 10).

“¿Ambejtsï jirinhasïni?” Mark Sanderson, enga jindeka Grupueri enga Orhejtsïkuajka iámindu kúnguarhikuechani, ístu nitamataraspti máteru diskursu. Úraspti uandakuechani engaksï Proverbios 13:12 uandajka: “Erokuarhikua enga ióndajka niárani pʼamenchatarasïndi mintsitani”. Ini ambe jimbo, uánikua kʼuiripuechaksï no sési pʼikuarherasïndi jimbokaksï no úsïnga mítikateni uánikuechani jimbo o nóksï úni konseguirini tumina engaksï xáni jánguarhintajka jirinhani.

Jesusiri jurhiatikuechani jimbo, máruksï erokuarhixapti máru ambe Juanu Bautisteri enga no ísïpka (Lukasʌ 7:24-28). Ejemplu ma, máruksï jamberi erokuarhini japti exeni filosofuni ma (o kʼuiripuni ma enga kánikua jánhaskatipka) enga jorhentperakuechani ambe jorhentpini japiringa engaksï no xarharajka. Engaksï i ambe erokuarhini japka, kómu pʼikuarheraptiksï jimboka Juanueri jorhentperakuechaksï jindespka eianhperakuecha engaksï meru jaka ka jurhimbitini. Máteruksï jamberi eratsipti eska jukaparhakua ambe xukuparhapiringa, peru ima ísï xukuparhasïrendi eska kʼuiripu pobriicha. Peru ima engaksï erokuarhini japka exeni profetani ma, nóksï kómu pʼikuarheraspti, jimboka Juanu no solu profetajku máespti; sino jindespti ima enga prepararipka xanharuni paraka Jesusi janopiringa (Juanu 1:29).

Úraparini i jorhentperakuani, erachi Sanderson pʼímarhiaspti estudiantichani eskaksï jurhimbikua jingoni jámapiringa. Enbesi de erokuarhini eskaksï kʼéri ambe exenhaaka o eskaksï sési kánhaaka nani engaksï axanhaaka, sánderu sési, jatsistiksï para jarhuataani erachichani jorhendapariani ambe engaksï jorhenguarhikia Eskuela Galaadiri, uinhaperakuantani imecheri mintsikakuani ka xarhatakupariani uékperakua. “Kaxumbikua jingoni jarhuataa je erachichani, jánguarhinta je úni ambe enga Jeoba uékajka, ka nójtsï méni kómu pʼikuarheraaka”, ísï uandaspti erachi Sanderson.

“¿Tʼirerauajtsï imechani engaksï kʼarhimani jaka?” Ísï arhinhasïrendi diskursu erachiri James Cauthon, enga jindeka jorhentpiri ma de Departamentu para Organisasioniri Eskuelecha. Erachi Cauthon uandaspti eskachi iáminduecha jatsiska para xénchakateni ka jukaparharanhanchi. Asta tata Jesukristu uétarhinchaspti i ambe, ka Jeoba xarhatakuspti enga uékperakua jingoni uandajpapka imani jurhiatikua enga itsï atakuarhipka (Mateu 3:16, 17).

Jeobajtsïni ísï kueraasti parachi úni uinhaperantaani ka jarhuataani juchari uandakuecha jimbo, ka ima erokuarhisïndi eskachi ísï uáka (Proverbios 3:27). Erachi Cauthon uandaspti: “Jánguarhinta je ambakiti ambe jirinhani máteruecheri ka arhiani ambakiti ambe enga engaksï újka”. Engajtsï mintsita jingoni arhiaska ambe ma, uáti úni eskaksï juchari erachicha mítiaka eska jukaparhakueska imecheri ánchikuarhita.

“Íntspi je xáni eskajtsï xáni uáka.” Mark Noumair, enga jindeka jarhuajpiri ma Komiteri enga Jorhentperakuerika, nitamataraspti máteru diskursu. Apostuli Pablueri ambakiti ejempluni úraspti, para pʼímarhiani estudiantichani eskaksï no konformarikuarhipiringa nomasi sántku jánguarhintani. Májkueni eska apostuli, tsípintsï pʼikuarheraaka engajtsï íntspiaka iámu eskajtsï xáni uáka máteruechani jimbo (Filipusʌ 2:17, 18).

Nájkiruka Pablu uánikua problemechani jatsiapka no méni chketakukuarhispti. Jimboka íntspiska xáni eska xáni úpka, o jánguarhintani asta uarhikuarhu jamberi, jimbosï úpti uandani: “Kʼamataskania ini karrerani” (2 Timoteo 4:6, 7). Erachi Noumair pʼímarhiaspti estudiantichani eskaksï seguiripiringa Pablueri ejempluni para apoiarini Reinueri ánchikuarhitani jini engaksï marhuauaka.

Experiensiecha. Michael Burnett, enga jindeka jorhentpiri Eskuela Galaadiri ístu nitamataraspti máteru diskursu, nani engaksï máru estudianticha xarhataapka experiensiechani engaksï nitamakuarhinchapka eianhpikuarhu imani jurhiatikuechani engaksï Patterson japka.

Ménderu estudiantichani sési nikuaspti jimboksï jingontku jarhaspka para eianhpini ka jimbokaksï uékaspka Bibliaeri ambe jorhentpini imani idioma jimbo engaksï mintsitarhu niárakuapiringa kʼuiripuechani. Ejemplu ma, estudianti ma, kuenta íntskukuarhispti eska imani territoriurhu enga nipiringa eianhpini, uánikua kʼuiripuechaksï utusï uandasïrenga. Ísï jimbo ante de ni nirani, jorhenguarhispti máru uandakuechani arini aplikasioni jingoni JW Language. Imani mísmu jurhiatikua, sánisï ambe enga jorhenguarhipkia, úndaspti uandontskuarhini achatini ma jingoni enga xanharu jimbo mítipka. Iásï ima achati, ka tʼámu imeri familiarhu anapu, estudiarixatiksïa Bibliani.

Entrebistecha. Tátsekua, William Turner, jarhuajpiri ma enga jindeka Comité de Servicio Grupueri enga Orhejtsïkuajka iámindu kúnguarhikuechani, kurhamarhiaspti tʼámu estudiantichani, náki experiensiauechanksï jatsiaspi ante de niárani Galaadi ka ístu ambe engaksï xáni jorhenguarhipka jima.

Estudiantichaksï uandantaspti ambe engaksï jorhenguarhipka klaserhu ka enga marhuakuapka. Ejemplu ma, ma uandaspti eska uánikua ambe jorhenguarhispka Bibliaeri ixú Lukasʌ kapitulu 10 jimbo. Ima 70 chúxapaticha enga Jesusi axapka paraksï nirani eianhpini, kánikuaksï tsípiparini kʼuanhatsintaspti jimboka sési nikuaspka. Nájkiruka tata Jesukristujtu tsípipka, arhiaspti eska tsípikuarhita no indeni ambe jimbojku úsïnga jurhani engaksï ima úpka, sino jimbokaksï jaiapanherantaspka Tata Diosïni imani ambe jimbo engaksï úpka. Inde ambejtsïni miátantasïndi eska sési jimbo tsípikuarhita no indeni ambe jimboeska engachi uájka úni, sino eskajtsïni Jeoba jaiapanhintaaka.

Erachi Turner úraspti arhini uandakuechani para estudiantichani arhiani engaksï ixú jaka Filipusʌ 1:6, ka arhiaspti eska Jeoba uénaspkia úni ambakiti ánchikuarhita ma imecha jingoni, ka eska seguiripiringa ísï úni.

“Méntkisï Jeobani eraaparini jáma je.” Samuel Herd, enga jindeka Grupueri enga Orhejtsïkuajka iámindu kúnguarhikuechani, nitamataraspti diskursu espesialini. Ka ixú explikarispti na engachi uáka úni parachi Tata Diosïni eraaparini jámani nájkirukachi no exeaka.

Ma ambe jimbo engachi uáka úni, jindesti exeni imani ambe enga kueraaka, nani engachi uáka jorhenguarhini uánikua ambe imeri ambe. Ka ístu Jeobajtsïni íntskusti eramarhandikua juchari mintsitecharhu (Efesu 1:18). Engachi sánderu arhintaska Bibliani, sánderuchi jorhenguarhiaka Jeobaeri ambe. Ka engachi sánderu jorhenguarhiska Jeobaeri ambe, sánderuchi andarheraaka imani.

Jatsiskachi para sánderu exeani Ebanjeliuechani, jimboka uandakuecha ka úkuecha tata Jesukristueri, jarhuatasïndijtsïni parachi sánderu sési eranhaskani na enga jásïka Tata Diosï. Tata Jesukristu sési xarhatasti na enga jásïka Jeoba enga uandapka: “Ima engarini exeka jíndini, exesti Diosï Tátini” (Juanu 14:9).

Erachi Herd pʼímarhiaspti imechani engaksï jima japka eskaksï no solu exepiringa Jeobani tata Jesukristueri ejempluni jingoni, sino eskaksï seguiripiringa Jesusiri ejempluni. Ísï eska Jesusi na jánguarhintapka tʼirerani máteruechani, juchajtuchi jatsiska para jánguarhintani jorhendaani máteruechani Tata Diosïri ambe engachi jucha intsïnhajka.

Engachi juchajtu Jeobani eraaparini jarhaska, uákachi juchajtu seguru jarhani ísï eska salmista enga karapka: “Méntkisï juchiti orhepatini jimbo péraska Jeobani. Jimboka ima juchiti jurhijkandani ladu jarhaska, no nemarini uáti no sési úcheni” (Salmo 16:8).

Para kʼamarani. Engaksï na intsïnhantapkia diploma, estudianti ma, karta ma arhintaspti para diosmeiamukua arhijpintani. Jimajkani erachi Jackson arhiaspti estudiantichani eskaksï no eratsipiringa arhiani erachichani imani ambe enga úkua jukapiringa o enga jimbanhi ambepiringa jimbokaksï ima kasi iámindu ambe mítiskia. Erachi Jackson ístu uandaspti na enga xáni jukaparhakueka kaxumbitini. Enbesi de imecheri ambejkuksï uandani o ambe engaksï xáni jorhenguarhikia Galaadi, imecha engaksï graduarikuarikia jatsistiksï para sánderu jukaparharani Bibliani ka juchari publikasionichani. Ka ístu enbesi de no sési pʼikuastaani imechani engaksï no méni uáka nirani Eskuela Galaadiri, jatsistiksï para jarhuataani paraksï úni sési úraani iámindu Tata Diosïri jarhuajperatechani engaksï uáka jatsiani. Enga na kʼamarapkia tánguarhikua, iáminduecha engaksï jima japka tsípixaptiksï, ka kánikuaksï uékaxapti jarhuataani erachichani.

^ párr. 2 Imecha engaksï nípka tánguarhikuarhu imani semana jimboksï intsïnhaspti jimbanhi kántikuechani.

^ párr. 32 Nóksï iámindu paisicha xarhatanhasïndi maparhu.

^ párr. 34 Nóksï iámindu jarhasti.