Exeni ambe enga jataka

Segundu menu jimbo nirani

Jeobaeri testiguecha

Purépecha

Graduasioni klaseri 137 Bibliaeri Jorhenguarhikua Galaadiri enga Watchtoweririka

Graduasioni klaseri 137 Bibliaeri Jorhenguarhikua Galaadiri enga Watchtoweririka

Graduasioni klaseri 137 Bibliaeri Jorhenguarhikua Galaadiri enga Watchtoweririka úkuarhisti 13 de septiembri 2014 jimbo, nani engaksï Jeobaeri testiguecha uájka jini Patterson (Nueva York). I eskuela jindesti para jarhuataani Jeobaeri testiguechani engaksï kánikua jánhaskatika, paraksï úni uinhaperakuantani erachicheri jakajkukuechani ima kúnguarhikuecharhu ka sukursalicharhu engaksï axanhajka. I programa nitamatarakuarhispti Patterson ka ístuksï exespti telebisioni jimbo jini Canadá, Estados Unidos, Jamaica ka Puerto Rico. Úsptiksï exeni ini programani 12,333 kʼuiripuecha.

Samuel Herd, enga jindeka Grupueri enga Orhejtsïkuajka iámindu kúnguarhikuechani Jeobaeri testiguecheri, jindespti enga orhejtsïkupka ini programani. Enga uénapka ini tánguarhikuani xarhataspti eska Tata Diosïri eratsikua sánderu kʼéska ka eska juchari (Isaías 55:8, 9). Uandaspti eska nájtukaksï sinku kutsï jánguarhintapka uánikua ambe jorhenguarhini Jeobaeri ambe, solu niárasptiksï sántku ambe jorhenguarhini imeri ambe (Job 26:14). Ka ístu uandaspti eska méntkisï engachi tánguarhintajka para uandontskuarhini ambe enga Tata Diosï eratsijka, uánikua kóntperatechanchi jatsiasïnga. Ka ini programani jimbojtu májkueni úkuarhepirindi.

“Enga Espiritu Santu úrpijka, jindesti para [...] ióni tekaantani” (Galasia 5:22). Arhijtsïkperata enga John Larson nitamatarapka, enga jindeka Komite de sukursali Estados Unidos anapu, uandasti tsimani amberi engachi uáka xarhatani, ma ambe enga Tata Diosïri espiritu santu úrpijka: ióni tekaantani. Orhetachi jatsiska para tekaantani eskajtsïni Jeoba jorhendaaka, enga jamberi uinhaperantajka juchari jakajkukuani (1 Pedru 5:10). Abraani tekaantasti enga Jeoba jorhendani japka ka enga jamberi erokuarhini japka eska Jeoba úpiringa ima ambe enga eiakupkia Abraanini(Ebreu 6:15).

Ístuchi jatsiska para tekaantani jucha mísmu jingoni. Úpirindi úkuarhini eskaksï alumnuecha kánikua ambe erokuarhipiringa para iámindu ambe sési uérakuani engaksï na kʼamaraakia eskuela Galaadiri. Engaksï na jini jauakia engaksï axaaka, ka no úni sési uérakuani ambe ma, úpirindiksï kurhamarhikuarhini: “¿Ambe úkuarhixaki jíndini jingoni?”. Erachi Larson, imani ambe jimbo enga ima úkuarhinchapka, arhispti alumnuechani eskaksï uáka uérakuani uandanhiatechani, engaksï tekaantaska ka engaksï seguirini jauaka ánchikuarhini enga jamberi Jeoba jorhendaani jauaka(Ebreu 6:11, 12).

“Eskaksï chári mintsitecha méntkisï kaxumbitiuaka ka eskaksï méntkisï irekaaka.” Anthony Morris, máteru enga jindeka ima Grupueri enga Orhejtsïkuajka iámindu Kúnguarhikuechani, nitamataraspti diskursu ma enga pʼitakata japka Salmo 22:26 jimbo, enga ma parti uandajka: “Irekeksï para méntkisï mintsitecha”. Parachi úni intsïnhani ini kóntperatani, jatsiskachi para kaxumbitiini. Erachi Morris uandasti eskajtsïni Jeoba jiántkujtsïnisï úraaka engachi kaxumbitiuaka. Iámindu jacha, nájkirukachi ióni marhuakukia Tata Diosïni, uákachi mirikurhini eska jukaparhakueska eskachi ísïuaka eska Jesukristu(2 Pedru 1:9).

Biblia uandasïndi kʼuiripuecheri engaksï kaxumbitipka ka máteruecheri engaksï kʼéramakuarhienga. Ari jindesti ma: Erodesi Agripa kánikua kʼéramakuarhispti ka jimbosï jiókuarhipti eskaksï imani kʼéri ambe exepiringa kʼuiripuecha ka no Tata Diosïni. I ambe jimbo, ánjili ma úkuspti ambe ma ka gusanuechaksï antaspti (Ukuecha 12:21-23). Ka ístu enga tata Jesukristu jurhimberantapka Pedruni jimboka “no eratsisï[re]nga indeni ambe enga Diosïrika sino solu enga kʼuiripuecherika”, ka pénga apostuli no no sési pʼikuarherapka ka ni ikiani (Mateu 16:21-23). Xarhataspti kaxumbikua ka jiókuarhispti jurhimberantskua. ¡Xáni ambakiti ejemplu ma para jucha! (1 Pedru 5:5.)

Máru alumnuechaksï marhuapirindi Jeobaeri testiguecheri sukursalicharhu. Erachi Morris arhiaspti, eska engaksï no kaxumbitipiringa nóksï úpirindi tsípikua jingoni irekani Beteli. Ménisï úpirindi úkua jukani kuenta íntskukuarhini eska ma no xáni kaxumbitiska eska ma na jakajkuenga. Para explikarini ini ambe, erachi uandantaspti eska uánikua uéxurhiniskia enga orhejtsïkuti ma intsïnhapka konseju jimboka kʼéramakuarhisïrenga, ka ima karaspti sukursalirhu: “No jarhasti kʼuiripu ma enga sánderu kaxumbitika eskani ji”. Erachi Morris arhispti alumnuechani eskaksï no méni jámapiringa ísïini eska i erachi. Jiókuarhini eska Jeoba ka Jesusi sánderuksï juramukua jatsiska, uáti úni eskajtsï no xáni ísï exekuarhiaka eskajtsï juramukua jatsiska ka ísïjtsï uáka kaxumbiti jarhani.

“Diosï no tsʼéritakata íntspisïndi imeri Espirituni” (Juanu 3:34). Enga jorhentpipka eskuelarhu, Michael Burnett, arhiaspti alumnuechani eska espiritu santu jarhuatauaka paraksï sési péntaani uandanhiatechani ka ambe engaksï úpiringa jatsini. Inde espiritusï úpti jarhuatani Bezalelini para uérakuani ójkutakuechani enga jatsiapka enga úni japka tabernakuluni (Éxodo 35:30-35). Jarhuataspti para sánderu sési úni imeri ánchikuarhitani, komueska artesanu ka ístu jarhuataspti para ima jorhendaani máteruechani. Ka ístu májkueni uáti úni imecha jingoni engaksï graduarikuarhikia, engaksï jánguarhintaska ísï úni eska Biblia na jorhentpijka, ísï eskaksï na estudiarikia eskuelarhu.

Ióntki Bezaleliri jurhiatikuecha jimbo, uarhiiti israelitechaksï kánikua jarhuajpispti jiáni enga únhani japka tabernakulu (Éxodo 35:25, 26). Ístu, i klasirhu anapu pirenchichaksï xarhatasti jindeni ambakiti jarhuajpiricha imeri uámbecheri para iámindu ambe jimbo. Enga na kʼamarapkia diskursu, erachi Burnett uandaspti: “Ú je iámindu ambe engajtsï jorhenakia úni kaxumbikua jingoni ka kurhandiparini. Engajtsï ísï úska, Jeobaksïni sánderu íntskuati imeri espiritu”.

“¿Uarhaari jíndini jingoni?” Mark Noumair, enga jindeka jarhuajpiri Komite Jorhentperakueri, rei Dabidiri ambe uandaspti jiájkani enga úpka eska pánhapiringa arka paktueri Jerusaleni (2 Samuel 6:12-14). Enga arka inchaakuni japkia iretarhu, rei Dabidi kaxumbikua xarhataspti enga uarhapka “imeri marhuatspiricheri esklabaecha” jingoni (2 Samuel 6:20-22). Jamberi imechaksï no méni mirikurhipti imani jurhiatikuani. Jimajkani, erachi Noumair pʼímarhiaspti ima klasirhu anapuechani eskaksï uarhapiringa esklabaecha jingoni. Kurhamarhiaspti: “¿Ísïjtsï mítinha eska imecha engaksï jarhuataajka imechani engaksï nótki jatsiajka pribilegiuechani kúnguarhikuarhu? [...] ¿Jukaparharauajtsï máteruechani imecheri kualidadichani jimbo?”.

Engaksï graduaduecha i jásï uékperakua xarhataaka, májkuenksï úni jauati eska Jeoba (Salmo 113:6, 7). Nájkirukaksï ima kʼuiripuecha jingoni jauaka engaksï kʼéramakuarhijka, nóksï jatsisti para jurajkuni eska inde ambe no sési pʼikuastauaka. ¿Nénaksï uá ísï úni? Erachi uandaspti: “Uákajtsï ísï úni engajtsï ísï exekuarhiska enajkijtsï no ma ambe máe”. Ka ístu uandasti: “Ísï káma je Jeobaeri iretani eska Jeoba mísmu na kaapiringa”.

“Méntkisïchi eianhpiaka.” William Samuelson, enga orhejtsïkujka Departamentu para Organisasioniri Eskuelecha, úraspti apostuli Pablueri ejempluni, enga aianhpienga nani uéjkisï enga jámani jarhaenga (Ukuecha 17:17). Tátsekua pʼímarhispti máru alumnuechani eskaksï xarhatapiringa na engaksï nitamakuarhipka aianhpikuarhu imani jurhiatikuecha jimbo engaksï klasecharhu japka. Ejemplu ma jindesti, ma temungurhiri uandontskuarhispi uarhiiti ma jingoni enga merkadurhu ma ánchikuarhienga. Erokuarhisptiksï eska nóteru xáni okupada japiringia ka exerasptiksï bideuni ¿Andisï uétarhijki jorhenguarhini Bibliaeri ambe? Tátsekua arhisptiksï eska inchapiringa pájinarhu Internetiri, jw.org, nani enga úpiringa exentani informasioni imeri idioma jimbo enga jindeka: lao. Máru jurhiatikuechani tátsekua, nirasptiksï ménderu pʼorhembini imani uarhiitini para eska tsitipiringa sánderu jorhenguarhini Bibliaeri ambe.

“Seguiri je apoiarini Tata Diosïri Reinueri ambe.” William Nonkes, enga ánchikuarhijka Grupurhu enga exejka na enga Eianhpinhani jaka, entrebistariuaspti tʼámu alumnuechani. Íksï erachicha jánguarhintaxapti ísï úni eska na uandajka Isaías 6:8 ka uékasptiksï jarhuajpini ánchikuarhita Reinuerini úni, peru eskuela jarhuataaspti paraksï sánderu ambe úni. Pirenchi Snolia Maseko uandaspti eska Galaadi jarhuataspka para exekuarhini nani enga úpiringa sánderu sési úni ambe ma, komueska néna úrani sánderu sési tiempuni enga jatsijka jiáni enga kʼamarajkia aianhpini. Uandaspti: “Diosmeiamu ini eskuela jimbo iásï uáka sánderu ambe úni ka eska engani eranhaskani japka”. Ka erachi Dennis Nielsen uandaspti eska Sofonías 3:17 jarhuataspka para no kuatantani aianhpini. Ima uandaspti: “Engani ménisï no ma kʼuiripuni exentajka enga uékaaka kurhaani Bibliaeri ambe, jatsiska para miántani eska Jeoba kánikua tsípisïnga jimbokani xarhatakuxaka na engani xáni uékajka, jimbosïni jatsika para tsípini jarhani.”

“Exea je pájaruechani” (Mateu 6:26). Stephen Lett nitamataraspti diskursuni enga sánderu jukaparhakuepka programaeri, enga jindeka Grupueri enga Orhejtsïkuajka iámindu kúnguarhikuechani. Úraparini Jesusiri konsejuni enga uandapka eskaksï jingontku exeapiringa pájaruechani, erachi xarhataspti mámaru ambe engajtsïni jorhendajka inde uandakuecha (Job 12:7).

Ísï eska Jeoba na tʼirerajka pájaruechani, imajtujtsïni íntskusïndi ambe engachi jucha uétarhinchajka para irekani. Juchachi jindeska Tata “Diosïri kʼumanchikuarhu” anapuecha, ka Bibliarhu aiatspesïndi eska ima íntsaauaka “imeri kʼumanchikuarhu anapuechani” (1 Timoteo 3:15; 5:8). Peru ístu, juchajtuchi jatsiska para ambe ma úni. Májkueni eska pájaruecha na jirinhajka tʼirekua enga Tata Diosï íntsaajka, juchajtuchi jatsiska para seguirini “jirinha[ni] Diosïri juramukueri ambe” parachi úni intsïnhani imeri kóntperatechani (Mateu 6:33).

Erachi Lett ístu uandaspti eskaksï jarhaska uánikua pájaruecha engaksï mintsirajka engaksï pʼikuarherajka eskaksï no sési ambe úkuarhinchaaka. Ístuchi jucha uáka jarhuataani erachini ma, engachi ménisï exeaka “pekadu úni jarhani” eianguparini na enga xáni no sési nitamakuarhiaka indeni ambe jimbo (Galasia 6:1). Ístu, aianhpikuarhu mítitaraasïngachi kʼuiripuechani eska “Jeobaeri jurhiatikua” axuterku jarhaskia (Sofonías 1:14). Ístu erachi uandaspti, eska ísï eskaksï pájaruecha engaksï máteru nani ísï mótsijka, na újka iauani iótakuarhu kárani ka jamberi uanhajchakuani kʼérati juátechani, májkueni juchajtuchi uáka uérakuani kʼérati uandanhiatechani Jeobaeri jarhuajperata jingoni (Mateu 17:20).

Kʼamarhukua. Engaksï intsïnhantani japka diplomechani, alumnu ma arhintaspti karta ma engaksï imecha úpka para diosmeiamukua arhijpintani. Kʼamarhukuni jámani erachi Herd uandaspti eska patsaani Tata Diosïri eratsikuechani juchari mintsitarhu ísïska komueska klabu chátakuni jarhani ima chkarichani jimbo engaksï trenirhu anapu biárhu jarhajka. Uétarhisïndi uánikua uelta atani paraka inde chkaricha uáka uiuinhasï pakarani. Májkueni, graduaduechajtuksï jatsisti para eratsintani jarhani ambe engaksï eskuela Galaadiri jimbo jorhenguarhika. “Tiempu arhuta je parajtsï sési chátakuni chári mintsitecharhu, pori ísï arhini, indeni ambe engajtsï jorhenguarhikia”, ísï terokutantaspti erachi Herd. Ka ístu uandaspti: “Engajtsï ísï eratsiska eska Jeoba, kʼéri kóntperata máeuakajtsï”.