Exeni ambe enga jataka

Segundu menu jimbo nirani

Jeobaeri testiguecha

Purépecha

Graduasioni klaseri 136 Bibliaeri Jorhenguarhikua Galaadiri

Graduasioni klaseri 136 Bibliaeri Jorhenguarhikua Galaadiri

Enga na kʼamakurhipkia ambakiti Bibliaeri jorhenguarhikua ma enga sinku kutsï duraripka, klase 136 Bibliaeri Jorhenguarhikua Galaadiri úspti graduasionini sábadu 8 de marsu de 2014 jimbo. I eskuela jindesti para jorhendaani Jeobaeri testiguechani engaksï ióni eianhpikia, néna sánderu sési eianhpini ka únksï uinhaperantani imecheri erachicheri jakajkukua. Ini programani, exesptiksï 11,548 kʼuiripuecha. Uánikuechaksï úspti exeni ini programani kʼumanchikuarhu nani enga Watchtoweri jorhentpejka Jeobaeri testiguecheri, jini Patterson (Nueva York), ka máteruechaksï tánguarhispti para exeni grabasionini auditoriuecharhu jini Canadá, Estados Unidos, Jamaica ka Puerto Rico.

“Ísï eratsi je chájtu”. David Splane, enga jindeka Grupueri enga Orhejtsïkuajka iámindu kúnguarhikuechani Jeobaeri testiguecheri, jindespti enga presidiripka ini tánguarhikuani. Para uénani úraaspti ini uandakuechani: “Ísï eratsi je chájtu eska Kristu Jesusi na eratsienga” (Filipusʌ 2:5-7, TNM). Enga Jesusi Echerirhu japka, no uandanhiasïrendi imeri puestu jimbo; sánderu sési, kaxumbitispti ka mintsita jingoni úspti imani ánchikuarhitani enga Tata Diosï íntskupka.

Ístu, erachi Splane xarhataspti eska Jesusi kánikua jukaparharaasïrenga máteru Tata Diosïri marhuarichani. Ejemplu ma, tanimu uelta enga Noambakiti tsʼéjkupka desierturhu, Jesusi mókuntaspti “karakata jarhasti” ka úraaspti uandakuechani enga Moisesi arhipka diskursu ma jimbo Israeli anapu nasionini (Mateu 4:4, 7, 10; Deuteronomio 6:13, 16; 8:3). Jesusi, Tata Diosïri Uájpesti ka Mesiasi, ísï jimbo úpirindi mókukuntani Noambakitini imeri juramukua jimbo. Peru kaxumbikua jingoni xarhataspti eska jukaparharasïrenga Moisesiri ánchikuarhitani. Juchajtuchi jatsiska para jukaparharani ambe engaksï újka máteruecha ka méntku úndani felisitariauani imecheri ánchikuarhita jimbo.

Erachi Splane uandaspti na enga Jesusi ambakiti jángua ma xarhatapka enga na kʼamarhutani jámaengia imeri jorhenguarhikua ixú Echerirhu. Kómarhikua ma jimbo, Jesusi arhispti imeri Tátini: “Ji úska eskari tʼu kʼéri ambe arhinhapiringa parhakpinirhu ka kʼamakuskania ini úkuani engarini tʼu íntskuka para eskani úpiringa. Ka iásï Táti, ú eskani ji kʼéri ambe arhinhaaka májku jásï tʼunguini jingoni imani mísmu tsíntskuani jimbo engani ji jatsipka tʼunguini jingoni desdeka parhakpini nótki jindenga” (Juanu 17:4, 5). Jesusi no uékasïrendi eska sánderu kʼéri puestu ma intsïnhapiringa enga na kʼuanhatsintapiringia auandarhu, ima solu uékasïrendi imeri orhetku anapu ánchikuarhitarhu niántani. Galaadi anapu graduaduechaksï májkueni uáti eska Jesusi engaksï enbesi de sánderu uandanhiani imecheri puestu jimbo, sánderu uandanhiauaka imecheri ánchikuarhita jimbo. Ísïksï uáti tsípini pʼikuarherani nájkirukaksï no sánderu kʼérati responsabilidadichani intsïnhaauaka engaksï kʼuanhatsintaaka jima engaksï marhuani japka.

“Ú je ambe enga xáni uétarhiaka”. William Malenfant, enga jindeka jarhuajpiri Komite Jorhentperakueri Grupueri enga Orhejtsïkuajka iámindu kúnguarhikuechani, pʼímarhiaspti estudiantichani paraksï ísïini eska apostuli Pablu, enga uánikua ambe jurajkupka para úni Tata Diosïni marhuakuni. Pablu no jirinhantasïrendi imani ambe enga jurajkupka. Ima uandaspti: “Mirikurhixaka indeni ambe enga nitamakia, ka jánguarhixaka parani andani imani ambe enga orhepani jaka, ka seguirixaka uiriani ini karrerani” (Filipusʌ 3:13, 14).

Engaksï estudianticha seguiriuaka úni ambe enga uétarhiaka no arrepentiriparini, májkuenksï úni jauati eska ióntki ka iásï anapu marhuaricha engaksï no méni jurajkujka Jeobani. Erachi Malenfant uandaspti pirenchiri Clara Gerber Moyer, enga sapichuetini uénapka marhuakuni Jeobani ka enga karapka: “Kʼéri kóntperata máesti miántani ochenta uéxurhini engani mintsita jingoni marhuakuka Tata Diosïni, ka no arrepentirini. Engani úpiringa ménderu uéntani irekani, uékapiringa májkueni ambe úni”.

“Eianhpi je Reinueri ambe ánjilicha jingoni ka komueska ánjilicha”. Gerrit Lösch, máteru enga jindeka Grupueri enga Orhejtsïkuajka iámindu kúnguarhikuechani, úspti eskaksï estudianticha eratsiantapiringa tsimani ambakiti kóntperatechani engaksï jatsiajka eianhpiricha. Ma parti jimbo, engaksï eianhpijka ambakiti eianhperakua Reinueri, májkuenksï úsïndi eskaksï ánjilicha, jimbokaksï uandakuecha enga Biblia úrajka griegu ka ebreu jimbo para tradusirini “ánjili”, arhikuekasïnga “uandakua pári”. Ka ístu, ánjilichaksïsï orhekupajti eianhpikuarhu, májkueni eskaksï na jarhuatapka disipulu Felipini (Ukuecha 8:26-35).

Erachi Lösch uandantaaspti máru eianhperakuarhu anapu experiensiechani. Uandaspti Gabinueri, Jeobaeri testigu ma México anapu enga sáno méntkisï ma o tsimani ueltajku kústajka puertarhu ma. Peru ma xanharhi, kʼumanchikuarhu ma tʼámu uelta kústaspti. Achati ma mítaspti ka arhispti: “¿Exexakijtsï sïndarini enga karhakua jaka? Engajtsï últimu kústapka, ji jukajchatixapkia indeni sïndarini. Peruni pʼíjchantaspka parani mítani. Diosmeiamu je engajtsï méntku úndapka kústani, jimboka engajtsï no ísï úpiringa, ji pirajchakuarhipiringa”.

Nájkiruka i ambe úpiringa ísku jatini úkuarhini, no méntkisï ísïsïndi. I ambe xarhatasïndi eskaksï Tata Diosïri ánjilicha orhekupaasïnga eianhpirichani eianhpikuarhu interu parhakpini (Jaŋaskuecha [Apocalipsis] 14:6).

“Ima engaksï janhanharhikueka, újchakuranhaatiksï”. Michael Burnett, enga jindeka jorhentpiri Eskuela Galaadiri, pʼitaspti imeri diskursuni Jabesiri ejemplurhu, Juda anapu desendienti ma. Biblia arhisïndi eska ima jindespka enga ‘sánderu janhanharhinhenga eska imeri ermanuecha’. Ma xanhari, Jabesi kurhakuspti Tata Diosïni eska újchakurapiringa, eska úpiringa eska imeri territoriu sánderu kʼépiringa ka eska kuájchakupiringa no sési amberi (1 Crónicas 4:9, 10).

¿Nénaksï uá estudianticha májkueni úni eska Jabesi? Kurhakuparini Tata Diosïni ambe engaksï meru uékaaka. Ma ambe engaksï uáka kurhakuni jindesti jarhuajperata para úni kumplirini ambe engaksï jorhenguarhikia Galaadi. Ístu, uátiksï kurhakuni eska kuájchakuauaka, no kénditaparini iámu no sési jásï ambe, sino eska íntskuauaka uinhapikua paraksï úni tekantani engaksï kómu pʼikuarherani jauaka ka paraksï úni orhepani uérakuani uandanhiatechani. Ísï eska Tata Diosï na kurhaapka Jabesiri komarhikuani, ístu kurhaauati Galaadi anapu estudianticheri komarhikuani.

“Asï jurajku je eska chpiri pátakuarhiaka”. I jindespti títulu diskursueri enga erachi Mark Noumair nitamatarapka, enga jindeka jorhentpiri Eskuela Galaadiri ka jarhuajpiri Komite Jorhentperakueri. Textu enga úrapka jindesti 1 Tesalonika 5:16-19. Ima uandaspti eska para chpiri no pátakuarhini, tanimu ambe uétarhisïnga: kombustible, oxijenu ka eska jorhepikuarhiaka. Májkueni, estudiantichaksï uétarhinchasïndi tanimu ambe paraksï seguirini tsípikua jingoni eianhpini.

Primeru ambe engaksï uétarhinchajka jindesti tsípikua jingoni úni. “Tsípi je méntkisï” uandasïndi 1 Tesalonika 5:16. Paraksï úni sánderu tsípini pʼikuarherani, estudiantichaksï jatsisti para eratsintani na enga xáni kʼéri kóntperateka jatsini Jeobaeri jarhuajperata. Ísï eska kombustible, tsípikua jingoni úni ambe ma, uáti eskaksï no kuataraaka. Segundu, jindesti kómarhikua. Bersikulu 17 arhisïndi: ‘Méntku jauena je kómarhini’. Kómarhikua ísïsti eska oxijenu enga uétarhijka para chpiri sánderu tixarani. Sésisti eskachi uáuaka kómarhikuechani nani engachi uáka aiangukuarhini iámu ambe Jeobani ka mintsita jingoni. Últimu ambe engaksï uétarhinchajka, bersikulu 18 jarhasti: “Diosmeiamukua arhi je Diosïni iámindu ambe jimbo”. Agradesidu pʼikuarherani, jindesti enga újka eskachi méntkisï tsípini pʼikuarheraaka. Agradesidu pʼikuarherani, úsïndi eskachi méntkisï jatsiaka sési pájperakua Jeoba jingoni ka erachicha. “Méntkisï agradesidu pʼikuarhera je —arhiaspti erachi Noumair estudiantichani—. Ísïjtsï uáka pʼíngukuarhini ka no jámani arhinchpini”.

“Kʼéri ambe arhi je Jeobani májkueni eska ambe enga auandarhu jaka”. Sam Roberson, enga jindeka jorhentpiri eskuelecheri engaksï Bibliaeri ambe jorhentpijka, uénaspti imeri parti máru bersikuluecheri particha jingoni engaksï uandajka eska Jurhiata, Luna ka jóskuecha kʼéri ambeksï arhisïnga Jeobani (Salmo 19:1; 89:37; 148:3). Enga explikaripkia eska engaksï estudianticha jorhenguarhini japka, úspkaksï kʼéri ambe arhini Jeobani eianhperakuarhu, erachi Roberson presentariuaspti máru estudiantichani engaksï nitamantaraapka máru ambakiti experiensiechani engaksï nitamanchaapka. Por ejemplu, estudianti ma enga manejarini japka, anhaxurhispti paraka achati ma enga siia de ruedasi jingoni nirani japka úpiringa parhikuni. Achati agradeserikuspti, ka tátsekua estudianti exentaspti achatini ka felisitarispti imeri ambakiti jángua jimbo. I ambe úspti eskaksï úpiringa ambakiti uandontskuarhita ma jatsini, ka achati jiókuarhispti estudiu bíbliku ma. Enga Galaadi anapu estudianti nirenga estudiu íntskuni, úsïrendi aianguani Bibliaeri ambe imechani engaksï pʼorhembienga achatini. I ambakiti uandontskuarhita jimbo, ústiksï siete estudiu bíblikuecha uénakuarhini.

“Aprobechari je Tata Diosïri jorhentperakuani parajtsï uinhapiti jarhani”. Donald Gordon, enga jindeka jarhuajpiri Komite Publikasionicheri, entrebistariuaspti tsimani temungurhirichani engaksï klaserhu japka. Ma erachi uandantaspti eska iámu jorhenguarhikuarhu, úrakuarhispkaksï uandakuecha engaksï Efesu 3:16-20 jaka. Jorhenguarhistiksï eska engaksï kaxumbitiska ka jurajkunksï eska né uéjki uáka andarheraani, ka jiókuarhinksï eska Jeoba útasï kánikua ánchikuarhita jatsiska para iámu imeri marhuaricha, ima uáka eskaksï ‘uinhapiaka’. Pirenchi ma kánikua tsitispti ilustrasioni ma enga jorhentpiri ma úrapka. Jorhentpiri arhiaspti estudiantichani eskaksï uékapiringa ísïni komueska kurucha sapichu ma kʼéri oseanurhu ma, no komueska kʼéri kurucha ma, pesera sapichurhu ma enga no ambandeka para kʼéni. Pirenchi uandaspti: “I amberini jorhendasïndi eska enga ji uékaaka ísïini eska sánderu sapichu ma Jeobaeri kúnguarhikuarhu, imarini jarhuataaka parani ji kʼuiripeni Tata Diosïri ambe jimbo”.

“Eskaksïni Jeoba miáuaka chánksïni para ambakiti ambe”. Mark Sanderson, enga jindeka Grupueri enga Orhejtsïkuajka iámindu kúnguarhikuechani, nitamataraspti diskursu prinsipalini graduasionirhu. Para títulu, úraaspti uandakuechani enga Neemiasi arhipka Tata Diosïni. Ima karaspti: “Miárini, jo, oh juchiti Tata Diosï, para ambakiti ambe” (Nehemías 5:19; 13:31). Neemiasi no chésïrendi eska Jeoba mirikurhipiringa imani ka imani ambe enga úpka. Sánderu sési, ambe enga kurhakuni japka Tata Diosïni, jindespti eska uékperakua jingoni miápiringa ka eska újchakurapiringa.

Estudiantichajtuksï uáti seguru jarhani eska Jeoba miáuauaka para ambakiti ambe, engaksï ísï úska eskaksï na jorhenguarhika eskuelarhu. Ma ambe engaksï jorhenguarhika, jindesti eska sánderu jukaparhakua ambe enga jimbo ma marhuakujka Tata Diosïni jatsiska para jindeni uékperakua enga ma pʼikuarherajka imani jimbo (Markusʌ 12:30). Por ejemplu, Abraani uékaspti Jeobani iámu imeri mintsita jingoni, ka Jeoba uékperakua jingoni miásïndi. Mili uéxurhini tátsekua enga Abraani na uarhipkia, Jeoba arhispti “juchiti amigu” (Isaías 41:8).

Tátsekua, erachi Sanderson miátantaaspti estudiantichani eskaksï jatsiska para uékani kʼuiripuni ka sánderu erachichani (Markusʌ 12:31). Komueska ambakiti samaritanu —enga jarhuatapka judiuni engaksï sïpajkurhecha euakuarhipka—, estudiantichaksïsï jatsiti para uénani jarhuataani imechani engaksï uétarhinchajka (Lukasʌ 10:36). Arhijtsïkpiti uandaspti Nicholas Kovalak amberi, enga graduarikuarhika Galaadi ka enga marhuapka komu distritueri orhejtsïkuti ma ka enga mítikatepka imeri pʼamojperakua ka uékperakua jimbo. Ma xanhari, para úni pʼímarhini sirkuitueri orhejtsïkutini ma ka imeri témbani paraksï sánderu eianhpini, i ambe arhiaspti: “Xarheni uénani jurhiatikuarhu, xarheni uénani semanarhu, xarheni uénani mesirhu ka xarheni uénani uéxurhini”. Peru, enga exepkia pirenchini máru jurhiatikuechani, arhispti: Asï uandanhia imani ambe jimbo engani kándiski uandaka. Kánikuari ambe úsïngia. Asï xáni uiriakuarhi, ka ísïri uáka sánderu ióni marhuani ini ánchikuarhitarhu”. Imeri ambakiti uandakuecha, jarhuatastiksï i pirenchini para marhuani tiempu kompletueri uánikua uéxurhinichani.

Para kʼamarani, erachi Sanderson arhiaspti estudiantichani eskaksï jorhendaapiringa ka preparariuani máteruechani engaksï jamberi úpiringa imani ánchikuarhitani engaksï intsïnhapiringa (2 Timoteo 2:2). Engaksï ísï úska, uátiksï kumplirini ambe engaksï jorhendanhakia Galaadiri kursurhu: uinhaperantaani erachichani ka jarhuajpeni para Tata Diosïri ireta sési jarhani, mítiparini eska Jeoba miáuauaka para ambakiti ambe (Salmo 20:1-5).

Para kʼamarani. Engaksï na intsïnhantapkia diplomechani, graduadu ma arhintaspti karta ma enga klase úpka para diosmeiamukua arhijpintani. Para kʼamarani, 15 engaksï graduarikuarhipka piresptiksï no kústakua jingoni pirekua 123, librueri Cantemos a Jehová, enga arhinhajka “Nuestros pastores son un regalo de Dios”.

PARAJTSÏ SÁNDERU MÍTINI

¿NÉKSÏ ÚXAKI IÁSÏ AMBE ENGA JEOBA UÉKAJKA?

¿Ambeksï jorhendanhasïni prekursoricha?

¿Ambeksï jorhendanhasïni prekursoricha paraksï úni pauani pauani aianhpini Tata Diosïri Reinueri ambe?

DOCUMENTARIES

Asta jima enga sánderu iauanika Parhakpinirhu

Bibliaeri Jorhenguarhikua Galaadiri enga Watchtoweririka apoiarisïndi imani ánchikuarhita para nirani eianhpini ambakiti eianhperakua Tata Diosïri Reinueri. Exe je ambe engaksï uandantajka máru misioneruecha engaksï nikaia ini eskuelarhu.