Exeni ambe enga jataka

Jeobaeri testiguecha

Erakuni idiomani Purépecha

Dibujuechaksï sési jorhentpesïndi juchari publikasionicharhu

Dibujuechaksï sési jorhentpesïndi juchari publikasionicharhu

Uánikua Jeobaeri testiguecheri publikasionichaksï jukanharhiasti dibujuechani koloriri, para textu sánderu sési kurhangukuarhini, peru no méntkisï ísïspti. Primeru rebista La Atalaya, enga 1879 uérapka, no jukaaspti dibujuechani. Uánikua uéxurhinichani, juchari publikasionichaksï kánikua textu jukasïrendi ka namunitku dibujuecha; solu ménichanisïksï jukasïrendi ma ísï dibuju o fotu enga urapiti ka turhipiti jimboenga.

Iásï, uánikua juchari publikasionichaksï jukaasti uánikua dibujuechani. Sáno iámindu dibujuechani, ilustrasionichani ka fotuecha engaksï juchari publikasionicharhu úrakuarhijka ka engaksï Internetirhu jaka, juchari artistecha ka fotu pʼitajpitichaksï uásïndi. Kuidadu jingoni inbestigarini ka sési, jarhuajpesïndi paraksï úni únhani dibujuecha engaksï sési jorhentpijka jurhimbikua ambe Bibliaeri ka datuecheri istoriaeri engaksï kánikua jukaparhakueka.

Úraakachi komu ejemplu dibujuni enga i artikulurhu jukanharhika, ka enga uérapka primeru uelta kapitulurhu 19, librueri “Testimonio cabal” del Reino de Dios. Lugari jindesti ióntki anapu ireta Korintu. Eska na arhijka Ukuecha kapitulu 18, apostuli Pablu béma, o tribunaliri orhepani jarhasti. Imecha engaksï inbestigarijka, íntskusptiksï artistani informasioni ima amberi enga exenhantapka ima lugariri, nani enga japka ka na enga jásï koloripka ima plataforma marmoliri enga apostuli pánhapka. Ístuksï íntskuspti informasioni xukuparhakueri engaksï Roma anapuecha jukaenga siglu I despuesi de Jesusi. Ka ísï jimboksïsï úpti dibujarini juramutini Galión, (dibujurhu terujkani) juramutiri xukuparhakua jukarini: túnika ma, toga ma enga listoni moradu ma jukamupka ka sapatuechani engaksï cálceos arhinhaenga. Paraka artista úpiringa eranhaskani na enga jatsipiringa para xarharani i lugari, imecha engaksï inbestigarijka arhisptiksï naniasï eraaxapi plataforma ka eska jamberi Galión noroesterhu ísï eraani japka.

Katalogu sési organisadu ma ka enga marhuajka

Tánanhantasïndi ambe enga inbestigarinhajka ka dibujuecha jingoni patsanhasïndi, ordeni jimboksï patsanhasïndi paraksï úni sóntku exenhantani engaksï uétarhiaka. Uánikua uéxurhini, dibujuechaksï kʼérati sobrecha jimbo patsanhaspti seguni náki enga publikasionirhu uérapka, ka fotuechaksï temecha jimbo patsanhaspti. Peru eskaksï na sánderu uánipani japka, sánderu úkua jukasïrendi exentani dibuju ma o ménderu úrani.

Uéxurhini 1991 jimbo, kʼamaraspkachi úni base de datosi enga jukaka ambe engachi uétarhinchajka. Arhinhasïndi Image Services System ka asta iásï jamberi jukari 440,000 ilustrasionichaksï jarhastia. Aparti de imecha engaksï úrakuarhikia juchari publikasionicharhu, patsakatachi jatsiaska uánikua fotuechani para sánderu orhepatini úraani.

Archibuechaksï uánikua ambe jukasti, komueska na jatini ka nani úrakuarhiski mándani ilustrasioni, nombri dibujuecheri ka ambe tiempueri ambe uandantasïreni. Úni sóntku exeantani ilustrasionichani, kánikua jarhuajpesïndi jiáni engaksï prepararinhani jarhajka jimbanhi publikasionicha.

Ménisïchi úraasïnga fotuechani engaksï negosiuecharhu ísï úrakuarhijka. Ejemplu ma, engachi fotu ma uékaaka Saturnueri aniiuecheri para artikulu ma rebisteri ¡Despertad!, juchari jarhuajpirichaksï jirinhantasïndi fotu ma ka uandajpasïndiksï dueniuni paraksï permisu kurhakuni para úrani. Márujtsïni no kobrarisïndi, jimbokaksï mítiska eska juchari ánchikuarhita enga interu parhakpini úkuarhijka para Bibliaeri ambe jorhentpini gratisiska. Ka ménisï, uétarhisïndi meiampeni o eianhpini eskachi imecheri fotu ma úraxaka. Ka engachi na de akuerdu pakatperaakia, dibuju úrakuarhisïndi publikasionirhu ka patsakuarhisïndi juchari base de datuecheri.

Iásï, máru juchari publikasionichaksï sánderu dibujuechani jukaasti eska textu. Ejemplu ma jindestiksï istoriecha engaksï dibujuecha jingonika engaksï ini pájina Internetiri jimbo uérajka. Ístujtsï uáka exeantani publikasionichani engaksï uáni dibuju koloriri jukanharhika ka engaksï ambakiti ambe jorhentpijka namunitu uandakuecha jingoni, komueska foietu Kurhajcha je Tata Diosïni. Iámindu juchari publikasionicha engaksï imprimirinhajka ka engaksï Internetirhu jaka, úsïndiksï eska kʼuiripu uékaaka sánderu mítini Bibliaeri ambe.