Exeni ambe enga jataka

Segundu menu jimbo nirani

Jeobaeri testiguecha

Purépecha

Bideuecha engaksï tsíperaajka mintsitechani

Bideuecha engaksï tsíperaajka mintsitechani

Enga na exeapkia bideuechani para sapiicha Jeobaeri amigu úkuarhi táti ma enga Malasia irekaka uandasti: “Ísïspti enajki Jeoba mintsita exekuapi tátichani”.

I bideuecha engaksï uéraka karikatura jimbo engaksï Jeobaeri testiguecha úka, tataka sapichu ma xarharasïndi enga arhinhajka Kalebi ka imeri familia. Iámindu bideuechaksï pájinarhu jarhasti jw.org ka jorhendaasïndi sapiichani na enga xáni jukaparhakueka sési jámani ka uékani Tata Diosïni. Ma ejemplu jindesti, ma bideu xarhatasïndi andisï sïpiani no sési jaki, ka máteru néna kómarhini Tata Diosïni.

Para úni marhuakuani iámu parhakpinirhu anapu sapiichani, primeru bideu tradusikuarhistia 131 idioma jimbo.

Kʼuiripu kánikua tsitisïndi

Uarhiiti ma enga sinku sapiichani kaajka uandasti: “Ma semanaestia engachi intsïnhaka DVD Jehová bendice al que escucha y obedece, ¡ka sinkuenta ueltachi exeskia!”. I DVD, jataasti primeru jorhenguarhikuecha i karikaturaeri.

Millie 12 uéxurhini jatiriisti ka Inglaterra irekasti. Ermanuemba Thomas, 15 jatiriisti, ka síndrome de Down kámasïndi. Millie karasti: “Thomas imeri iPad kaasïndi iámindu bideuechani Kalebiri ka exeraasïndi eskuelarhu imeri kompanieruechani. Kánikua tsitiasïndi pirekuechani ka sési pireasïndi. Pirenchi ma kúnguarhikuarhu anapu, pʼiáraspti uérani enga kurhajchapka. ¡Kánikua sési pʼikuarherakuarhisïndi kurhajchani!”.

Ava imeri karta jimbo uandasïndi eska ochu uéxurhini, nuebi kutsï ka beintisinku jurhiatikua jatiriska. Ka uandasti: “Kalebi ka imeri pirenchi sésiksï jorhendaasïndi sapiichani”.

Ka karta enga Mikaylah axaka uandasïrendi: “Seisi uéxurhini jatiriska. Diosmeiamukuaksïni arhisïnga DVD jimbo Jehová bendice al que escucha y obedece. Jorhenguarhiska eska Jeoba sési pʼikuarheraaka engani kurhajchaaska juchiti tátichani”.

Sánderu ambe eska karikatura ma

Tumbi ma enga mítika karikaturechani uáni ka enga no Jeobaeri testigueka, exespti bideuni No sési jarhasti sïpani ka ísku pakaraspti, sánderu enga mítipka eska grupu sapichu ma úspka ini karikaturani enga mítikuka i amberi. Ima uandaspti: “Mítiaska kʼuiripuechani engaksï ánchikuarhijka kʼérati ka sapirhati estudiuechani jimbo engaksï karikaturaechani uájka, ka ménisï kurhamarhikuarhisïnga néna jindee ánchikuarhini indeni estudiuechani jimbo. Peruni mítiska eska ima ánchikuarhita enga jima úkuarhijka, marhuasïnga nomasi para kʼuiripu tsípini ma ratu. Peru inde bideuecha engajtsï cha uájka, marhuakuasïndi sapiichani, jimboka jorhendaasïnga ambe enga sési jaka ka ambe enga no sési jaka, ka jarhuataasïndi paraksï ambakiti ambe erakuni úni. Chájtsï kʼóru úxaka ambe marhuakuani jaka máteruechani, ka inde ambakiti ánchikuarhita máesti”.

Iámu parhakpinirhu anapu tátichajtuksï kánikua jaiapanhintaxati ini karikaturaechani. Uarhiiti ma enga sapini ma kámajka enga tanimu uéxurhini jatiriika, karasti: “Ma jurhiatikua juchiti sapi Quinn exexapti bideuni La amistad con Jehová. Enga terujkani nirani japkia pirekua, imeri jájkini mintsitarhu peeraspti ka arhisptirini: ‘Ma, i ambe úsïndi eska kánikua tsípiaka juchiti mintsita’”.