Exeni ambe enga jataka

Segundu menu jimbo nirani

Jeobaeri testiguecha

Purépecha

Uánikua bosichaksï úsïndi eskaksï Bibliaeri uandantskuecha ísï kurhaakuarhiaka enajki meru ísï úkuarhini jaki

Uánikua bosichaksï úsïndi eskaksï Bibliaeri uandantskuecha ísï kurhaakuarhiaka enajki meru ísï úkuarhini jaki

“Kánikua sési jáxesti, eratsitarantasïndikini ka ísï kurhaakuarhesïndi enajki meru ísï úkuarhini jaki”.

“Ísïsti enajkijtsïni personajecha uandontskuarhichini jarhajki”.

“¡Kánikua tsitisïnga! Iásï sánderuni ísï exeasïngia Bibliaeri uandantskuechani engani méntkisï kurhauaka, enajkiksï meru ísï”.

I jásï ambeksï uandasti uánikua kʼuiripuecha engaksï kurhaakia grabasionini enga Bibliarhu pʼitakata jaka, librueri de Mateu enga audiu jimbo jakaia pájinarhu jw.org inglesi jimbo.

Uéxurhini 1978, Jeobaeri testiguechaksï uénaspti grabarini primeru audiuni Bibliaeri. Ka ísï tátsekua, únhasptiksï grabasionicha iámu Bibliaeri o parti jimbo, 20 idiomecha jimbo.

Uéxurhini 2013 jimbo, uérasti Biblia rebisada Traducción del Nuevo Mundo inglesi jimbo, ísï jimbosï uétarhijti ménderu uántaani grabasionichani. Grabasionicha engaksï orhetku úkuarhipka tanimu bosichajkuksïsï úrakuarhipti. Peru iásï, para mándani personaje jukari miliri engaksï Bibliarhu jaka erakunhasti mándani bosi.

Kurhauani mámaru járhati bosichani úsïndi eska sánderu fásiliuaka eranhaskaani Bibliaeri uandantskuechani. Ka nájkirukaksï grabasionicha no ísï arhikuarhintajka komueska Bibliaeri arhintskuecha engaksï uandantskueni arhikuarhintajka ––jimbokaksï no jukaska sonidu ni kústakua––, ísïksï kurhaakuarhesïndi enajkiksï meru ísï úkuarhini jarhajki.

Uénani jámani, sési inbestigarinhaspti para mítinhani né uandasïni mándani uandantskuarhu, ambe arhikuekasïni ima textu ka náki pʼikuarhinhikuecha jingoni uandaxapi. Ejemplu ma, uandantskuarhu ma uátiksï jarhani uandakuecha apostuliri ma, peru enga no mítikuarhika nérispiksï. Enga i ambe úkuarhijka, ¿náki bosi jatsipirini para úrakuarhini? Enga ma uandakua no káni seguru kurhaakuarhiaka úpirindi Tomasirini, ka enga no chémupiringa uandani úpirindi Pedruerini.

Ístu, exenhasti na engaksï xáni jatiripka personajecha. Ejemplu ma, tsimani bosichaksï úrakuarhisti para apostuli Juanueri bosini úni, ma para enga tumbiipka ka máteru para enga tʼarhepipkia.

Ka ístu uétarhisïrendi imechani erakuani engaksï sési arhintaenga. Sáno iámindu ima engaksï arhintajka ánchikuarhisïndiksï no ma tumina jimbo, Jeobaeri testiguecheri sede mundialirhu enga Estados Unidos jaka. Para erakuani, úkuasïndiksï prueba imechani engaksï erakuauaka para arhintani. Arhiasïndiksï eskaksï arhintaaka párrafu ma rebisteri ¡Despertad! ka máru partichani engaksï Bibliarhu pʼitakata jaka engaksï ikiatapu, kómu pʼikuarherakua, tsípikuarhita o no sési pʼikuarherakua xarhatajka. Ini ambe úparini, úsïndi exenhani né uá sánderu sési arhintani ka exeni náki arhintskua sánderu sési pakarakusïni.

Engaksï na erakuakia né arhinta, imaksï grabarisïndi imecheri partini jima enga grabarinhajka Brooklyn o Patterson. Direktori ma grabasioniri exesïndi eska ima enga arhintaaka, imani bosi úraaka enga uétarhiaka ka eska sési kurhaakuarhiaka. Ísï jimbo, direktori ka ima enga arhintaaka, kámani jarhasïndiksï karakata ma enga arhijka nani anhaxurhini o nani sánderu uinhamu arhintani. Ístuksï jatsisti jarhuajperata ma engaksï újka úrani, enga jindeka grabasioni de la Traducción del Nuevo Mundo enga primeru uéraka.

Ma parti jiáni mísmu sési péranhasïndi enga grabarinhani jauaka. Ménisï, para sánderu sési uérani, uétarhisïndi kúndantaani uandakuechani o frasechani engaksï máteru toma jimbo grabarikuarhika.

No mítikuarhisti na jatini kʼamarakuarhia grabasioni Biblia rebisaderi Traducción del Nuevo Mundo inglesi jimbo enga 2013 uéraka. Peru, méni enga kʼamarakuarhiaka libru ma, uáti kurhaakuarhini jw.org jimbo. Ikonu ma xarharaati audiueri, jima ma ladu enga Bibliaeri libru ma jauaka ka enga arhinhajka “Libros de la Biblia”.