Iásï no ióni, Jeobaeri testiguechaksï kʼamarasti kʼéri úntani Asiendani Watchtower enga Wallkill (Nueva York) jaka, enga seisi uéxurhini ióndanhaka kʼamaranhani. Ka sánderu uinhamu ánchikuarhinhaspti tsimani últimu uéxurhini, jimbosï uétarhipti jirinhani naniksï pakarani japirini ánchikuarhiricha engaksï boluntariuepka. Jimboksïsï rentarinhapti 25 kʼumanchikuecha engaksï jima no iauani japka.

Imecha engaksï jima pakarani japka

¿Ambeksï uandasïni dueniuecha engaksï rentarikuapka Jeobaeri testiguechani?

  • Duenia ma uandaspti: “Kánikuachi sési pʼikuarheraspka imecha jingoni. Juchiti achati ka ji, jima ma laduchi irekaska [kʼumanchikuarhu engachi rentarijka], ka imecha engaksï jima rentarini japka, méntkisïksï kánikua jarhuajpisïrendi ka sésiksï kámpini”.

  • Máteru duenia, enga ístu no iauani irekaka imani kʼumanchikuarhu enga rentarini japka, karaspti: “Kánikuachi sési pʼikuarherasïrenga imecha jingoni jarhani. Juchari kʼumanchikuarhu tátsepani, lagu sapichu machi jatsiska enga ma újka nadarini, ka tumbichaksï seguidu jurhasïrendi engachi pʼímarhiauenga. Kánikuaksï sési kámpisïrendi ka respetu jingoni. Kánikuachi tsitisïrenga imecha jingoni jarhani, ka jirinhantauakachi jimbokachi nóteru exeauakia uirini jarhani kampurhu ísï”. I duenia ístu uandaspti: “I experiensia no úpirindi sánderu sési jáxeni”.

  • Dueniu ma uandaspti: “Kánikua sési jarhaspti ixú jatsiani kʼuiripuechani engaksï rentarini japka ka engaksï ístu besinuepka”.

Kʼumanchikuecha

¿Ambeksï uandaspi dueniuecha, na engaksï jurajkuapka boluntariuecha kʼumanchikuechani?

  • “Nójtsïni méni ióndaspti meiamuni; kʼumanchikua sési kuidadu jarhaspti ka kánikuajtsïni sési íntskuntaspti”.

  • Dueniu ma kʼumanchikueri engachi orhetku uandakia, arhispti Testiguni ma: “Kánikuaksïni agradeserichesïnga chánksïni ka ístu iámu organisasionini Watchtower, jimbokajtsïni kánikua kuidaricheska juchari kʼumanchikuani”. Ka ístu uandaspti eska no na jatini eratsispka eskaksï Jeobaeri testiguecha “xáni sési limpiarisïrenga”.

  • Uarhiiti ma uandaspti: “Jimbokani mítispka eska chári kúnguarhikua jurhimbitiska, nochi [kurhakuaspka] eskaksï orhetku meiampipiringa. Kánikuajtsïni sési járhati íntsantaspti tsimani kʼumanchikuechani engachi rentarikuapka”.

  • “¿Néna uá kontratariuani chári ánchikuarhirichani?”, kurhanguarhispti dueniu ma ísï tátsekua engaksï Jeobaeri testiguecha arreglaripka máru ambe imeri kʼumanchikuarhu. Ístu uandaspti: “Méntkisï engajtsïni aiachenga eskaksï úpiringa ánchikuarhita ma, jimaksï jarhasïrendi ima jurhiatikua engachi pakatperenga. Ji no úsïnga úni eskaksï ima kʼuiripuecha engaksï jurhajka juchiti kʼumanchikuani arreglarini, kumpliriuaka ambe engaksï uandaka”.

Ambe engaksï últimu uandapka

  • Antesi de kʼamakurhini kontratu kʼumanchikueri ma engaksï rentarini japka, dueniu karaspti para arhiani Jeobaeri testiguechani eska engaksï uékapiringa ménderu kontratu úntani, “eska kánikua menosi kobrariuapiringa”.

  • Máteru dueniu uandaspti: “Kánikuachi tsípipiringa rentarini ménderu juchari kʼumanchikuani para organisasioni Watchtower enga ménderu uétarhipiringa”.