Exeni ambe enga jataka

Segundu menu jimbo nirani

Jeobaeri testiguecha

Purépecha

¿Ambeksï uandasïni imecha engaksï ánchikuarhikia Jeobaeri testiguecha jingoni Warwick?

¿Ambeksï uandasïni imecha engaksï ánchikuarhikia Jeobaeri testiguecha jingoni Warwick?

Uánikuechani ísku pakataaxati na engaksï uánikuecha aiakukuarheni jaka para ánchikuarhini konstruksionirhu Warwick. Empreseri enkargadu ma enga elebadorichani jatsikuapka, arhispti ánchikuarhirini ma: “Chári ekipu kʼéri ánchikuarhita ma úxati. Jimboka ini jurhiatikuechani, nóteru nema aiakukuarhesïngia para ísku ánchikuarhini”.

Enga i achati ka máteru kʼuiripuechaksï mitipka eska Jeobaeri testiguecheri sede mundiali jini Warwick (Nueva York), úkuarhipiringa boluntariuecha jimbo, ísïksï eranhaskaspti eskaksï Testiguechajku nipiringa engaksï jimajkisï anapueka ka eskaksï sábadu ka dominguechantku nipiringa. Joperuksï ísku pakaraspti engaksï exepka eskaksï uápurisï anapuecha niáraspka ka eskaksï máru asta jurajkuspka imecheri ánchikuarhitani paraksï nirani jima ánchikuarhini máru kutsï, o asta máru uéxurhini.

Enga 2015 kʼamarani jámaengia, sáno 23,000 boluntariuecha engaksï Testigueka, ánchikuarhisptiksïa Warwick, Estados Unidos anapu familia Beteli jingoni. Ka ístu, máteru 750 ánchikuarhiricha engaksï no Jeobaeri testigueka, jarhuajpistiksï para ánchikuarhita jiáni kʼamarakuarhini enga uandakata japkia. Ánchikuarhini Testiguecha jingoni, kánikua ísku pakataaxati uánikua ini ánchikuarhirichani engaksï no Testigueka.

Sési jánhaskuarhesïndi

Kompanieri enkargadu ma enga bentanechani ka bardechani uájka, karaspti: “Iámindu juchiti empreseri ánchikuarhiricha engaksï ixú ánchikuarhika, ískuksï pakarasti ambakiti jángua jimbo imecheri engaksï jingoni ánchikuarhika. Jimbochisï uéjka ixú seguirini”.

Tanimu ánchikuarhiricha empreseri ma, enga jarhuajpika uáni kʼérati estrukturechani edifisiuecheri para irekani, eratsitixaptiksïa seguirini Warwick ánchikuarhini. Ísï jimbo, enga kontratu imecheri empreseri kʼamakurhipkia, jurajkusptiksï imecheri ánchikuarhitani ka máteru empresarhuksï niraspti enga útasï jima ánchikuarhini japka.

Testiguecheri ambakiti jángua, kánikua jarhuataaspti máru ánchikuarhirichani. Por ejemplu, achati ma empresani ma ánchikuarhikusïrendi enga edifisiuecheri simientu jatsiauega. Enga na máru kutsï ánchikuarhipkia Warwick, imeri témba kuenta íntskukuarhispti na enga xáni mójtakurhipkia imeri jángua ka na enga uandontskuarhiengia imeri kʼumanchikuarhu. Ima kánikua tsípiparini uandaspti: “¡Kasi nóteruni mítintasïngia!”.

Asta nanaka Testiguechaksï juuati

Uánikua jarhuajpirichaksï nanakechespti. Nóksï solu autobusichani manejariuasïrendi, kuartuecharhu ambantskantani ka ofisinecharhu ánchikuarhini, sino ístuksï arhiasïrendi karruechani naniasï nirani, kʼérati mákinechanksï manejariuasïrendi, jatsikuasïrendiksï kablichani fibra óptikaeri, irhiparhakuasïrendiksï tubuechani, jatsikuasïrendiksï iesueri paredichani, ánchikuarhisïrendiksï plomeriarhu ka tsïkatasïrendiksï sementu. Uinhamuksï ánchikuarhisïrendi.

Achati ma enga no Testigueka ka enga tejaduechani jatsikuauenga, kuenta íntskukuarhispti eska engaksï temungurhiricha kétsienga autobusirhu, máruksï jupijperatini nirasïrenga asta jima engaksï ánchikuarhienga. Inde ambe kánikua sési pʼikuastaspti. Ístu exespti eskaksï uarhiiticha kánikua ánchikuarhisïrenga. Uandaspti: “Uénakuarhu, ísï xarharasïrendi enajkiksï nomasi nireni uámbechani pámbitaani. Peru engaksï uénenguia ánchikuarhini... ¡no nema úsïrendi anhaxustaani! Uánikua konstruksionicharhu jámaska Nueva York ka no méni exespka i jásï ambe”.

Kánikua úkua jukaspti inbiernu 2014-2015 jimbo. No jamberi uéranchakuarhisïrendi para nirani ánchikuarhini, jimboka kánikua tsʼirakuarhisïrenga. Testigu ma enga Jeremy arhinhajka, enga exeni járhenga ánchikuarhitani, uandantasïndi: “Ménisï, enga sánderu tsʼirakuarhienga, enkargadu imecheri engaksï simientuechani jatsiauenga, kurhamarhisïrendirini:

—¿Pauanksï juua nanakecha?

—Jo.

—¿Asta ima engaksï karruechani arhiani jarhajka naniasï nirani?

—Jo.

“Ísï tátsekua, uandantaspti eska arhiaspka imeri ánchikuarhirichani eskaksï jatsispka para jurhani ánchikuarhini, jimbokaksï asta nanaka Testiguecha jupiringa”.

Autobusiri choferichaksï tsitisïrendi imecheri ánchikuarhitani

Pauani pauani, uétarhisïrendi juaani boluntariuechani Warwick, jima uératini engaksï pakarenga ka ménderu pántaani. Jimboksïsï jukari treintaisinku autobusiri chofericha kontratarinhapti.

Antesi de paani, choferi ma jauaraspti, eratiaspti ka arhiani: “Tsitisïngaksïni páni, ísï jimbo, kurhachisïngaksïni eskajtsï axakuaka korreu ma juchiti patronini paraksïni chánksïni jámani páni. Uánikua ambe jorhenguarhiskia Bibliaeri chánksïni jimbo. Jimboka ante deksïni mítini, no mítispka néna arhinhasïreni Tata Diosï, ni eska Echeri Paraisu máeuaka. Ístu, nóteru chérhisïnga uarhikuani. Ambakiti experiensia máesti para ji. Jiáni engani no ánchikuarhiaka, Kʼumanchikua Reinuerirhu májtsïni exeaka”.

Damiana, testigu ma enga Warwick ánchikuarhika, uandaspti: “Ma jurhiani engani jatapkia autobusirhu, juchari choferijtsïni uékaspti arhini máru ambe. Uandaspti eska juaaspka ka paani 4,000 testiguechani imani edifisiuecharhu engachi Nueva York jatsiaka, ka uandaspti: ‘Kʼuiripu mámaru jásïsti, joperujtsï cha jánguarhisïnga sési péntaani chári problemechani, ka májku kʼérijtsï ánchikuarhini. Inde ambe kánikua sési jarhasti’. Ístu uandaspti eska kánikua tsitisïrenga uandontskuarhini juchantsïni jingoni.

“Enga kʼamarapkia uandani, pirenchi ma arhispti: ‘¿Tsitisïntsï eskachi jucha pireaka?’.

“Choferi tsípiparini mókuspti ka arhini: ‘Jo, ¿uáchi pirekua 134 jingoni uénani?’”. *

^ párr. 23 Pirekua 134 enga librurhu Cantemos a Jehová jaka, arhinhasïndi “¿Te ves en el nuevo mundo?” ka uandasïndi na engaksï xáni sési pʼikuarheraaka iámindu engaksï jimbanhi parhakpinirhu irekaaka enga Tata Diosï uáka.