Exeni ambe enga jataka

Segundu menu jimbo nirani

Jeobaeri testiguecha

Purépecha

¿Ambeksï eratsisïni iásï doktoricha iurhiri jatantskueri ambe?

¿Ambeksï eratsisïni iásï doktoricha iurhiri jatantskueri ambe?

Uánikua uéxurhini, Jeobaeri testiguechaksï kánikua arhinchanhasti, jimbokaksï no jiókuarhisïnga iurhiri jatantani. Nóksï jiókuarhisïndi jatantani, jimboka Biblia ísï juramusïnga (Ukuecha 15:29). Ménisï, doktorichaksï no de akuerdu jarhasïrendi ini ambe jingoni, jimbokaksï eratsisïrenga eskaksï tratamientuecha engaksï no úraenga iurhiri kánikuaksï peligrosuespka.

Peru, sánhani arhixatiksï uánini ambakiti doktoricha engaksï sési uandajka tratamientuecheri o imani amberi engaksï újka máteru doktoricha para no úrani iurhiri.

Primaberani 2013 jimbo, rebista Stanford Medicine Magazine, enga Escuela de Medicina de la Universidad de Stanford (Estados Unidos) újka, jukanharhispti informi espesiali ma enga iurhiriri ambe uandaenga. Máechakua artikulu arhinhasïrendi “Against the Flow—What’s Behind the Decline in Blood Transfusions” (En contra de la corriente. Por qué ya no se hacen tantas transfusiones de sangre). Sarah C. P. Williams, ima enga karaka, uandaspti: “Últimu diesi uéxurhinicharhu, uánikua inbestigasionicha engaksï únhaka, xarhatastiksï eska uánikua ospitalicharhu interu parhakpini, ima iurhiri úranhasïnga enga sánderu íntspinhajka ka no solu jiáni enga uétarhiaka, sea engaksï operarinhaaka o nómbe”.

Artikulu uandasïndi doktoraeri Patricia Ford, enga úka ka enga orhejtsïkujka Centro de Medicina y Cirugía sin Sangre del Hospital de Pensilvania (Estados Unidos). Doktora uandaspti: “I eratsikua eska enga pasienti no jataaka xáni iurhiri eska xáni uétarhinchajka, o eska solu iurhiri jatantaparini no uarhiaka, jindesti ma ambe engaksï doktoricha jorhendanhajka. [...] Ka nájkiruka ma repentku i ambe ísïjka, sáno méntkisï no ísïsïndi”. *

Doktora Ford, enga sáno setesientu Jeobaeri testiguechani atenderiuajka ma uéxurhini jimbo, ístu uandaspti: “Uánikua doktoricha engani jingoni uandontskuarhipka uénani jámani, eratsisïrendiksï ma ambe enga no ísïka, eska engaksï no jatsirpentapiringa iurhiri, uánikua pasientichaksï uarhipiringa. Jíjtuni sánisï ísï jakajkusïrenga. Peru sóntkuni exespka eska máru ambejku úparini enga no úkua jukaka, ma úsïnga úni eska iámindu ambe sési uéraaka imani pasienticha jingoni engaksï no jiókuarhijka jatantani iurhiri”.

Rebista Archives of Internal Medicine, agostueri de 2012, uandantaspti inbestigasioniri ma enga beintiochu uéxurhini jimbo úkuarhipka ospitalirhu ma, pasienticha jingoni engaksï úminhapka operasionichani mintsitaeri. Pasienticha engaksï Testiguepka sánderuksï sóntku ambakintaspti eska imecha engaksï jatsiranhantapka iurhiri. Ístu, menusi problemechanksï jatsiaspti engaksï ospitalirhu japka. Ka engaksï operarinhapkia sánderuksï sóntku tsinakuarhispti ka beinte uéxurhini tátsekua sánoksï májkueni sési jarhaspti eska imecha engaksï jatantapka iurhiri.

Artikulu ma enga The Wall Street Journal jimbo uérapka 8 de abrilini 2013, uandantaspti: “Operasioni enga no iurhiri jingonijka —iurhiri enga intsïmperakateka— uánikua uéxurhini marhuakuastia pasientichani engaksï no jiókuarhijka jatantani iurhiri relijioniri ambe jimbo. Ka iásï, sánderuksï únhasïndia i járhati operasionicha ospitalicharhu. [...] Doktoricha engaksï sési exejka uáni operasionicha no úraparini iurhiri, uandasïndiksï eska no solu jarhuajpisïnga menusi tumina úrani para piáni, patsani, prosesarini, analisarini ka jatsirpentani iurhiri, sino eska ístu úsïnga eskaksï no jauaka infeksionicha engaksï úkuarhijka enga nema jatantaaka iurhiri, ka ístu eskaksï no jauaka problemecha engaksï uáka eskaksï pasienticha sánderu ióni jauaka ospitalirhu”.

Nójtsïni ísku pakatasïndi jiájkani eska Joaquín Casanova, doktori enga orhejtsïkutika Hospital de Manises (Valencia, España), uandapiringa iásani: “I [járhati] operasionichani uáni kánikua marhuasïndi. Pasienti sánderu sóntku ambakintasïndi engaksï úrakuarhijka técnicas mínimamente invasivas engaksï újka eska sóntku sési pʼikuarherantaaka ka eska [menusi] tiempu jauaka ospitalirhu ka ístu eska menusi problemechani jatsiauaka eska imecha engaksï jatantajka iurhiri”. Ka Robert Lorenz, doktori enga orhejtsïkujka Clínica de Cleveland (Estados Unidos), uandaspti: “Ísïsti, engachi jatsirantajka iurhiri pasientini ma, ísïchi pʼikuarherasïnga eskachi sési úkuxaka [...]. Peruksï inbestigasionicha xarhatasïndi eskachi tiempu jingoni no sési úkuani jarhasïnga”.

^ párr. 5 Parajtsï sánderu sési kurhanguni ambe engaksï jakajkujka Jeobaeri testiguecha iurhiriri ambe, arhinta je artikuluni: “¿Andiksïsï Jeobaeri testiguecha no jiókuarhijki iurhiriri jatantani?”.