Sandra uinhachaspti: “¡Kurhupexati, kurhupexati! Imeri suegruecheri kʼumanchikuarhu almorsarixapti enga exepka eska chpiri puertarhu kétsekua ísï uéraxapka, kabania ma uératini enga jima ma ladu japka. Sandra ka imeri achati Thomas, sóntkuksï úspti ambe ma. Enga jamberi Sandra extintorini nípka pʼirani, Thomas niraspti exeni ambe úkuarhixapi. Sóntku, Sandra íntskuspti extintorini imeri achatini ka ima pátaspti chpiri. Sandra uandantasïndi: “Engachi no ma ambe úpiringa, kabania iámu kurhipirindi”.

¿Ambe jarhuataaspi Thomasini ka Sandrani paraksï no chéni ka sóntkuksï úni ambe ma? Imaksï ka máteru milisï, engaksï Jeobaeri testiguecheri sukursalirhu ánchikuarhijka jini Selters (Alemania), jorhendanhastiksï ambe úni enga ma repentku kurhupeni jauaka.

Sukursali enga Selters jaka 30 ektarea jukasti (70 acres), ka a parti deksï ofisinecha jarhani ka kuartuecha, labanderia ma jarhasti, imprenta ma ka uánikua taiericha, jimbosï peligru jati eska kurhupeaka. Ísï jimbo, sukursali anapu Departamento de Seguridad ka Medioambiente, ústi programa ma para mítini ambe úni enga ma repentku kurhupeaka. Orheta, Equipo de Emergencias, nirasïndi bomberuecha jingoni engaksï iretarhu anapueka, paraksï jorhenguarhini ambe úni. Ka tátsekua, sukursali anapu boluntariuecha ari ambeksï úsïndi:

• Simulakruechanksï uásïndi para mítini néna uérani.

• Jorhendanhasïndiksï néna pátani chpirini paraksï no ma ambe úkuarhinchani.

• Jorhendanhasïndiksï néna pátani chpirini enga apenasi uénani jauaka kurhupeni.

Ísï úparini, boluntariuechaksï jorhenguarhisïndi ambe enga uétarhijka úni enga no sési ambe úkuarhini jarhajka.

Imani jorhenguarhikuarhu, jorhenguarhisïndiksï néna pátani enga kurhupeni jauaka paraksï no ma ambe úkuarhinchani. Ju je exeni ambe enga Christin uandantajka. Últimu xanhari engaksï jorhendapka ambe úni enga kurhupeni japiringa, primariauespti. Ima uandantasïndi ambe enga úpka enga simulakru ma japka sukursalirhu. Uandasïndi: “Pʼíkuspka extintorini, pʼikuntaspka seguruni ka jimesï andarheraspka chpirini nani enga tarhiata no ixúanisï kʼuanikupiringa. Tátsekua, jandiajkuni pátaspka. Ístuni jorhenguarhispka néna pátani tʼámu o sinku kʼuiripu jingoni”.

Daniel, enga jorhentpijka ambe úni enga kurhupeni jauaka, uandasïndi eska úni ambe engaksï jorhenguarhijka jarhuataasïnga paraksï “nóteru chérhinia chpirini”. Ístu uandasïndi eska “kʼuiripu no jánhaskasïnga ambe úni enga chpiri exejka. Chésïndi ka kurhamarhikuarhini: ‘¿Iásï ambe uáia? ¿Néna úrakuarhisïni extintori ma?’. Peru engaksï mítiaka ambe úni, jarhuajpiatiksï para sánititu chpiri no kánini ka iámu kurhupeni”. Ima uandasïndi eskaksï “jorhenguarhisïnga néna úrani extintorini enga emerjensia ma jauaka ka ístu néna pátani chpirini. Sánderuksï seguru pʼikuarherasïndi ka nóteruksï chésïndia úni ambe enga uétarhiaka”.

Uánikuaksï agradeserisïndi ini programani. Christin, engachi antesi uandaka, uandasïndi: “Ima primeru xanharispti engani extintori ma úrapka. Ji exejka eskaksï iáminduecha jatsipiringa para ísï jorhendanhani”. Nadja, boluntaria ma enga ma tiempujku ánchikuarhini jaka sukursalirhu ka ístu enga aeropuerturhu ma ánchikuarhijka, uandasïndi: “Desde ase diesi uéxurhini, aeropuerturhujtsïni solu arhisïndi ambe úni enga kurhupeni jauaka. Peru na engachi práktikarijka sukursalirhu, jarhuatastirini parani sánderu segura pʼikuarherani. Enga kurhupeni japiringa, mítipiringa ambe úni”.

Sandra eratsisïndi eska ima kapasitasioni enga sukursalirhu intsïnhaka, jarhuataspka sóntku úni ambe ma enga imeri suegruecheri kʼumanchikuarhu japka. Ima uandasïndi: “Nóteruni xáni chésïngia extintori ma úrani”. Ka ístu uandasïndi: “Sésiisti kapasitasioni intsïnhani mándani uéxurhini. Merureni jarhuatasïndi”.

Bomberuechaksï nirasïndi sukursalirhu paraksï práktikarini. Bomberuecheri kapitani, Theo Neckermann, uandasïndi andi: “Kuidarisïngachi Seltersiri munisipiuni, ireta sapichu ma. Sáno méntkisï, jucha enkargarikuarhisïnga enga kʼumanchikua ma o departamenturhu ma kurhupeni jauaka. Ixuisï, sukursali ménderuenisti, jimboka echeri káneska, edifisiuechaksï kʼérasti ka ísïsti komu fábrika ma. Jatsiskachi para sési preparadu jarhani parachi mítini ambe úni enga emerjensia ma jauaka. Ísï jimbo, agradesiduchi jarhaska engachi újka ixú práktikarini”.

Jukari sienistiksï engaksï sukursalirhu anapu Equipo de Emergencias jimbo jaka, ka bomberuecha jingoni, simulakruechanksï uásïndi ka jorhenguarhisïndiksï néna salbariuani máteruechani. Tata Neckermann uandasïndi: “Admirarisïnga chári Equipo de Emergenciasini. Enga no cháepiringa, nójtsïni xáni sési nichepirindi engachi simulakruechani uápiringa ka engachi jorhenguarhini japiringa néna salbariuani máteruechani”.

Ma chúri, febreruni 2014 jimbo, bomberuechaksï ka Equipo de Emergencias xarhatasptiksï ambe engaksï újka úni. Edifisiurhu ma nani enga irekanhaka, uinispti sïraata departamenturhu ma. Daniel, engachi antesi uandapka, uandasïndi: “Xáni uinispti sïraata engachi jamberi no ma ambe uénga exeni”. Ístu uandasïndi: “Sóntkuchi uandajpaaspka bomberuechani ka uénaspkachi petani kʼuiripuni 88 departamentuecharhu uératini. Engaksï bomberuecha niárapkia, tʼuinksï iáminduecha uérasptia”. Tata Neckermann uandasïndi: “No úsïngani eranhaskani nénaksï xáni sóntku úspi petani kʼuiripuni, xáni kʼéri edifisiurhu ma uératini, iretarhu ma komueska Frankfurt. ¡Úspkajtsï ambe engaksïni arhipka ka chári Equipo de Emergencias kánikua sési úspti!”. Bomberuechaksï exespti ambe enga úkuarhini japka ka arreglarisptiksï. Iáminduechaksï sési jarhaspti ka edifisiujtu no kánikua ambe úspti.

Iáminduecha engaksï Seltersiri sukursalirhu jaka, erokuarhisïndiksï eska no méni kurhupeaka. Peru enga ma repentku ísï úkuarhipiringa, boluntariuechaksï jorhenguarhistia ambe úni enga kurhupeni jauaka.