A Li Tshamise Ku Yini Kara Ni Muzimbha Wa Yesu?

CHAYA

Nhlamulu ya Bibele

A hi swi tivi swaku Yesu a a ni kara ni muzimbha wa ku tshamisa ku yini hikusa Bibele a li hi byeli. Se leswo swi kombisa swaku leswi Yesu a a tshamise xiswona a hi swona swa lisima hintamu. Kambe Bibele li vula swilo swin’wani swi nga hi pfunaka ku vona swaku Yesu a a tshamise ku yini.

Kara la yena: Yesu a a li Muyuda naswona swi nga yendleka a a fana ni vanhu va lixaka la mamani wa yena. (Vaheberu 7:14) Swi tikomba na Yesu a a nga hambananga ni vanhu van’wani hikusa ka khambi lin’wani a sukile hi Galileya a ya Yerusalema naswona a nga kona lweyi a nga swi tiva swaku a ku li yena. (Yohani 7:10, 11) Phela Yesu a a nga hambananga ni vapostolo va yena. Hi vula leswo hikusa nkama Yudasi Skariyota a nga famba ni vanhu swaku va ya khoma Yesu swi lave a va komba, leswi kombisaka swaku a a nga hambananga ni vanhu van’wani. — Matewu 26:47-49.
Misisi: Swi nga yendleka Yesu a a nga na misisi ya ku leha hikusa Bibele li vula swaku “loko wanuna a ni misisi ya ku leha swa mu xixa.” —1 Vakorinto 11:14.
Malepfu: Yesu a a fuya malepfu. Phela Yesu a a landzela nawu wa Xiyuda lowu a wu tsimbisa vavanuna swaku ‘va tsemeta malepfu ya vona hi le magamu.’ (Levhitika 19:27; Vagalatiya 4:4) Funtshi Bibele li vulavula hi malepfu ya Yesu ka wuprofeta leli vulavulaka hi ku hluphiwa loku a a ta kumana na kona. — Esaya 50:6.
Muzimbha: Swi tikomba na Yesu a a li ni matimba funtshi a a ni muzimbha wa ku tiya. Hi vula leswo hikusa nkama na a famba a chumayela a a yendza a ya ka tindhawu ta le kule swinene na a famba hi minenge. (Matewu 9:35) Ku ve ni makhambi mambirhi lawa a nga ya tempeleni a ya hangalasa mimeza ya lava a va xavisa ndzeni ka tempele. Funtshi ka khambi lin’wani a hangalase swiharhi leswi a swi xavisiwa ndzeni ka tempele hi ku tirhisa nhonga leyi nga yendliwa hi tingoti. (Luka 19:45, 46; Yohani 2:14, 15) A buku lin’wani la enciclopédia la McClintock na Strong li li: “A mabuku ya Matewu, Marka, Luka na Yohani ma kombisa swaku [Yesu] a a li munhu lweyi a a ni matimba funtshi a a ni wutomi la kahle.” — Vholumi 4, pajina 884.
Matshamelo ya yena: Yesu a a va rhandza vanhu naswona a a ni mhaka na vona funtshi ha tiyiseka swaku hambi hi kara la yena a li swi kombisa leswo. (Matewu 11:28, 29) Phela vanhu va ku hambanahambana a va lavetela Yesu swaku a va tiyisa a tlhela a va pfuna. (Luka 5:12, 13; 7:37, 38) Funtshi hambi swivanani a swi swi rhandza ku va kusuhi na yena. — Matewu 19:13-15; Marka 9:35-37.

Mavunhwa lawa vanhu va ma vulaka hi leswi Yesu a a tshamise xiswona

Mavunhwa: Van’wani va kholwa swaku Yesu a a fana ni valandi hi mhaka leswi buku la Nhlawutelo li vulaka swaku misisi ya yena yi fana ni mavoya ya nyempfu ni minenge ya yena yi fana ni “kobre yayinene leyi nga hisiwa ka ndzilu.” — Nhlawutelo 1:14, 15.

Ntiyiso: A buku la Nhlawutelo loko li vulavula hi misisi ni minenge ya Yesu li tirhisa marito ya ku fanekisela. (Nhlawutelo 1:1) A li vulavuli hi leswi Yesu a a tshamise xiswona nkama na a li lani misaveni kambe li vulavula hi wumunhu leli a a ta va na lona loko se a pfuxiwile a ku feni. Ka Nhlawutelo 1:14, Bibele li li: “Nhloko ni misisi ya [Yesu] a swi basile ingaku i voya la ku basa li ku baa, a swi fana ni gamboko” kumbe nevhi. Ka ndzimana leyi, Bibele li vulavula hi kori ya misisi ya Yesu ku nga li leswi misisi a yi tshamise xiswona, leswi vulaka swaku Yesu a a ta va munhu lweyi a nga ni wutlharhi ni wutivi ku fana ni munhu lweyi se a nga kula funtshi a nga ni misisi ya basa. — Nhlawutelo 3:14.

Bibele li tlhela li vula swaku a minenge ya Yesu a yi phatima ku fana ni “kobre yayinene leyi nga hisiwa ka ndzilu.” (Nhlawutelo 1:15) Naswona a kara la yena a li “fana ni dlambu loko li voninga hintamu.” (Nhlawutelo 1:16) Se leswi lani misaveni ku kalaka ku nga na munhu a nga tshamisa xileswo, swi hi yendla hi twisisa swaku leswi ku vulavuliwaka hi swona ka buku leli swi fanekisela leswi Yesu a a ta tshamisa xiswona loko se a pfuxiwile a ku feni. Yesu a a ta tshama ka “ndhawu leyi phatimaka leyi ku kalaka ku nga na munhu lweyi a nga tshinelaka ka yona,” leswi vulaka swaku a ku na munhu lani misaveni lweyi a nga ta swi kota ku mu vona. — 1 Timotiya 6:16.

Mavunhwa: Yesu a a nga na ntamu.

Ntiyiso: Yesu a a ni ntamu naswona a a nga chavi nchumu. Hi xikombiso, nkama masonchwa ma nga ya swaku ma ya mu khoma, Yesu hi yexe a tinyikelile. (Yohani 18:4-8) Naswona swi tikomba Yesu a a ni ntamu hikusa a a li karpinteru, ku nga ntirho lowu swi lavaka matimba swaku u wu yendla. — Marka 6:3.

Se hi mhaka muni a swi lava swaku Yesu a rhwaleliwa mhandzi leyi a a ta dlayiwa ka yona? Naswona hi mhaka muni a ve wa ku sungula ku fa ku tlula vavanuna vambirhi lava a va gongondzeliwile matlhelweni ka yena? (Luka 23:26; Yohani 19:31-33) Phela Yesu na a nga se dlayiwa a a karhalile hintamu funtshi a a vavisiwile. A a nga yetlelanga wusiku hinkwalu naswona a a karhateka hi leswi a a ta dlayisiwa xiswona. (Luka 22:42-44) Niwusiku a biwile a tlhela a hluphiwa hi Vayuda naswona hi mundzuku ka kona nimixo a biwile a tlhela a xanisiwa hi masonchwa ya Varoma. (Matewu 26:67, 68; Yohani 19:1-3) Se hinkwaswu leswo swi yendle swaku Yesu a karhala hintamu a tlhela a hantla a fa.

Mavunhwa: Yesu a a li munhu wa ku miyela funtshi a a tshama na a kwatile.

Ntiyiso: Yesu a li kombise hi ku helela wumunhu leli Papayi wa yena Yehovha a nga na lona lweyi Bibele li vulaka swaku i “Xikwembu lexi nga tsaka.” (1 Timotiya 1:11; Yohani 14:9) Funtshi Yesu a djondzise vanhu swaku va fanele va yendla yini swaku va tsaka ka wutomi la vona. (Matewu 5:3-9; Luka 11:28) Se leswo swi kombisa swaku Yesu a a tshama na a tsakile funtshi kara la yena a li swi kombisa leswo.