Bibele li vula swaku “Yehovha a nge va tsoni minchumu yayinene lava fambaka hi ku tshembeka.” (Tipisalema 84:11) Kambe swi vula yini ku “famba hi ku tshembeka”? Swi vula ku va ni mahanyelo lawa ma kombisaka swaku wa swi hetisisa leswi u nga mu tshembisa swona Yehovha nkama u nga tinyiketela. (Ekleziyaxta 5:4, 5) Se u nga yendla yini swaku u tama u famba hi ku tshembeka leswi se u nga tsakamisiwa?

Ka nhlokomhaka leyi hi ta djondza hi leswi:

•  Tama u tiyisela hambiloko u kumana ni swikarhatu

•  Tama u hlula mindzingo

•  Tama u tikarhata

 Tama u tiyisela hambiloko u kumana ni swikarhatu

 Ndzimana ya Bibele: “Hi fanele hi kumana ni swikarhatu swa swinyingi leswaku hi nghena ka Mfumu wa Xikwembu.” — Mintirho 14:22.

 Leswi ndzimana leyi yi vulaka swona: Ku vula ntiyiso, Vakreste hinkwavu va ta kumana ni swikarhatu ka wutomi la vona. Swikarhatu swin’wani u nga ha kumana na swona hileswi u nga langa ku va Mukreste, swikarhatu leswo swi nga ha patsa ku kanetiwa ni ku poyileliwa. Kambe swikarhatu swin’wani swi khumba vanhu hinkwavu, ku nga na mhaka swaku i Vakreste kumbe nada. Swikarhatu swoleswo swi nga ha patsa mavabyi ni ku pfumala male.

 Leswi nga ha tshukaka swi yendleka: Minkama yin’wani xiyimu xa wutomi la wena xi nga ha txintxa naswona u nga ha kumana ni swikarhatu. A Bibele li vula leswaku a minchumu ya ku biha yi nga ha humelela vanhu hinkwavu, ku nga na mhaka swaku i Vakreste kumbe nada. — Ekleziyaxta 9:11.

 Leswi u nga swi yendlaka: Leswi se u swi tivaka swaku u ta kumana ni swikarhatu u nga tilunghiselela na ka ha li swoswi. Vona swikarhatu na ku li ndlela ya ku tiyisa lipfumelo la wena u tlhela u ya u mu tshemba hintamu Yehovha. (Yakobe 1:2, 3) Hi ku famba ka nkama u ta titwa ku fana na mupostolo Pawulo lweyi a nga te: “Ka hinkwaswu ni ni matimba hi mhaka ya lweyi a ni nyikaka matimba.” — Vafilipiya 4:13.

 Zama ku yendla leswi: Djondza hi xitoriya xa Yosefa. U nga ha lerha hi leswi swi nga mu yendlekela ka wutomi la yena ka buku la Genesa tindzima 37, 39, 40 ni 41. Pimisa hi leswi: Hi swihi swikarhatu swa ku kala a nga swi nyimelanga leswi swi nga humelela ka wutomi la yena, naswona a swi kotise ku yini ku swi hlula? Yehovha a mu pfunise ku yini Yosefa?

 Loko u lava ku tiva swin’wani

•   Lerha tinhlokomhaka leti:

   “U Nga Endla Yini Loko U Weriwe Hi Khombo?” (hi Xitsonga)

   “Xana Ndza Swi Kota Ku Tiyisela?” (hi Xitsonga)

   “Ndlela Yo Langutana Ni Ku Cinca Ka Swiyimo” (hi Xitsonga)

•   Baxara cartão leli:

   “O que podes fazer se o teu pai ou a tua mãe está doente?”

 Tama u hlula mindzingo

 Ndzimana ya Bibele: “Mun’wani ni mun’wani a ringiwa hi ku kokiwa ni ku wongiwa hi leswi a swi navelaka.” — Yakobe 1:14.

 Leswi ndzimana leyi yi vulaka swona: Minkama yin’wani hi nga ha navela ku yendla swilo swa ku biha, hi mhaka leyo i swa lisima kuva hi tikhoma leswaku hi nga yendli xidjoho.

 Leswi swi nga ha tshukaka swi yendleka: Hambiloko se u tsakamisiwile u ta tama u navela ku yendla swilo swa ku biha. (2 Pedru 2:18) Minkama yin’wani u nga ha ringeka ku famba masangu na u nga chadanga.

 Leswi u nga swi yendlaka: Na ka ha li swoswi pimisa hi leswi u nga ta swi yendla na ndzingo wu nga se fika, loko u yendla leswo a wu nga ta pfumelela ku navela ka wena ku ku yendla u wela ka xidjoho. Khumbuka swaku Yesu a te: “A ku na munhu lweyi a nga tirhelaka tihosi timbirhi.” (Matewu 6:24) Se swi le ka wena ku langa swaku i mani lweyi a nga ta va hosi ya wena. Pfumelela Yehovha a va Hosi ya wena. Ku nga na mhaka swaku ku navela ka wena i kukulu kandjhani, u nga swi kota ku kala u nga yendli swilo hi ku ya hi ku navela koloko. — Vagalatiya 5:16.

 Zama ku yendla leswi: Tiva swiyimu leswi u kotaka ku tikhoma ka swona ni leswi u tsandzekaka ka swona. Langa vanghanu lava nga ta ku pfuna ku vona wumunhu lalinene leli u nga na lona. U nga ve kusuhi ni vanhu, tindhawu kumbe swiyimu leswi nga ku yendlaka u tsandzeka ku yendla swilo swaswinene. — Tipisalema 26:4, 5.

 Loko u lava ku tiva swin’wani

•   Lerha tinhlokomhaka leti:

   “U Nga Yendla Yini Swaku U Nga Yendli Swilo Swa Ku Biha?”

   “Como parar de pensar em sexo?”

   “Ndlela Yo Lwisana Ni Ntshikelelo Wa Tintanga” (hi Xitsonga)

   “Xana U Ehleketa Miehleketo Ya Yehovha?” (hi Xitsonga)

 Tama u tikarhata

 Ndzimana ya Bibele: ‘Tamani mi hiseka ku fana ni ku sunguleni . . . leswaku mi nga lolohi’. — Vaheberu 6:11, 12.

 Leswi ndzimana leyi yi vulaka swona: Munhu lweyi a kalaka a nga hiseki kumbe a nga tikarhati ka ntirho wa yena, a nga ha godola naswona hi wugamu a nga ha loloha.

 Leswi nga ha tshukaka swi yendleka: Nkama u nga tsakamisiwa swi nga yendleka u tsake hintamu funtshi a wu mu rhandza hintamu Yehovha u tlhela u mu tirhela hi ku hiseka. Kambe hi ku famba ka nkama swi nga yendleka swi ku karhatelile ku mu yingisa Yehovha ka swilo hinkwaswu, se leswo swi nga ha ku heta ntamu swi tlhela swi ku yendla u nga ha swi hisekeli ku tirhela Yehovha. — Vagalatiya 5:7.

 Leswi u nga swi yendlaka: Tama u yendla leswi nga swinene hambiloko minkama yin’wani swi ku godolisa. (1 Vakorinto 9:27) Loko u tshuka u godola u nga tshiki ku tshinela ka Yehovha Papayi wa wena wa le tilweni hi ku va u zama ku mu tiva kahle ni ku vulavula na yena minkama hinkwayu hi xikhongelo. Handle ka leswo tama u va ni vanghanu lava swi rhandzaka hintamu ku tirhela Yehovha.

 Zama ku yendla leswi: Khumbuka swaku Yehovha wa ku rhandza hintamu funtshi a lunghekele ku ku pfuna. Se loko u tshuka u hela ntamu u nga pimisi swaku Yehovha a ku kwatelile. A Bibele li li: ‘A nyika matimba lweyi a nga karhala; lava kalaka va nga na matimba a va yengetela ntamu.’ (Esaya 40:29) Hi ku famba ka nkama Yehovha a ta katekisa minzamu leyi u yi yendlaka leswaku u tama u mu tirhela hi ku hiseka.

 Loko u lava ku tiva swin’wani

•   Lerha tinhlokomhaka leti:

   “Vantshwa—“Hambetani Mi Tirhela Ku Ponisiwa Ka Nwina” (hi Xitsonga)

   “Como Posso Sentir Prazer Em Adorar A Deus?”

•   Sixtira vhidiyo leli nge:

   Leswi Majovhem Man’wani Ma Swi Vulaka — Wutomi La Ku Tsakisa

 Magamu ya mhaka: Loko u famba hi ku tshembeka u ta tsakisa mbilu ya Yehovha. (Swivuriso 27:11) U ta tsaka hi ku tiva swaku u yendla swilo leswi tsakisaka Yehovha, naswona Yehovha a ta ku pfuna minkama hinkwayu a tlhela a ku vhikela swaku u nga weli ka mintlhamu ya Sathana.