Ku nga va swaku wa chava loko u pimisa hi ku tinyiketela ka Yehovha u tlhela u tsakamisiwa? Loko leswo swi ku yendlekela, nhlokomhaka leyi yi ta ku pfuna swaku u hlula ku chava koloko.

Ka nhlokomhaka leyi hi ta djondza hi leswi:

•  Ku chava ku yendla xidjoho xaxikulu loko se ni tsakamisiwile

•  Loko ni chava ku yendla mintirho leyi yendliwaka hi munhu lweyi a nga tsakamisiwa

•  Loko ni pimisa swaku a ni faneleki ku mu tirhela Yehovha

•  Leswi majovhem man’wani ma swi vulaka

 Loko ni chava ku yendla xidjoho xaxikulu loko se ni tsakamisiwile

 Leswi ku yendlaka u chava: Swi nga yendleka u tiva munhu lweyi a nga yendla xidjoho xaxikulu a gama a susiwa bandleni. (1 Vakorinto 5:11-13) Leswo swi ku yendla u chava hi ku pimisa swaku na wena swi nga tshuka swi ku yendlekela.

 “Nkama na na ha pimisa hi ku tsakamisiwa, a ni karhateka ni tivutisa swaku loko no tshuka ni yendla xidjoho ke. A ni tshamela ku pimisa leswaku leswo a swi ta va danisa vapsali va mina.” — Rebekah.

 Ndzimana ya Bibele: ‘Lweyi a yendlaka swa ku biha a a tshiki mahanyelo ya yena . . . a a tlhelele ka Yehovha, lweyi a nga ta mu twela wusiwana, ka Xikwembu xa hina, hikusa xi ta rivalela hi mbilu hinkwayu.’ — Esaya 55:7.

 Pimisa hi leswi: I ntiyiso swaku loko munhu a yendla xidjoho a gama a nga tisoli wa susiwa bandleni. Kambe loko a tisola a pfumela ku layiwa, Yehovha wa mu rivalela. — Tipisalema 103:13, 14; 2 Vakorinto 7:11.

 Tlhela u pimisa hi leswi: Hambileswi u nga psaliwa ni xidjoho u nga swi kota ku hlula swilo swa ku biha hi ku pfuniwa hi Xikwembu. (1 Vakorinto 10:13) Khumbuka swaku hi wena u langaka leswi u nga ta swi yendlaka, ku nga li munhu mun’wani.

 “Mina a ni chava ku yendla xidjoho xaxikulu loko se ni tsakamisiwile. Kambe ni tsumbule swaku loko ni nga tsakamisiwi, a ni ta va na ni yendla xihoxo. Se ni swi vone swi li swinene kuva ni nga karhateki hi leswi a swi ta ni yendlekela ka nkama lowu taka, leswi a swi ta ni sivela ku yendla xiboho na ka ha li swoswi.” — Karen.

 Magamu ya mhaka: U nga swi kota ku yendla xiboho xa ku kala u nga yendli xidjoho xaxikulu, funtshi hi swona leswi vanhu va Yehovha va vanyingi va swi yendlaka. — Vafilipiya 2:12.

 Loko u lava ku tiva swin’wani: Vona nhlokomhaka leyi nge: “U Nga Yendla Yini Swaku U Nga Yendli Swilo Swa Ku Biha?”

 Loko ni chava ku yendla mintirho leyi yendliwaka hi munhu lweyi a nga tsakamisiwa

 Leswi ku yendlaka u chava: Hi xikombiso, swi nga yendleka u tiva majovhem lawa ma nga rhurha ma ya tshama kule ni maxaka ni vanghanu va wona swaku ma yengesela ntirho wa wona ka Yehovha. Se swi nga yendleka u chava swaku vanhu va ta nyimela leswi fanaka ka wena.

 “I ntiyiso swaku Mukreste lweyi a nga tsakamisiwa a nga ha kuma mintirho ya yinyingi ka nhlengeletanu, kambe vanhu van’wani a va se swi lunghekela ku tinyikela swaku va yendla swa ku tala; kumbe swi nga yendleka xiyimu xa vona xi nga va pfumeleli ku yendla leswo.” — Marie.

 Ndzimana ya Bibele: “Mun’wani ni mun’wani a a kambele mintirho ya yena, kutani a ta va ni xa ku tibuma hi xona na a nga tiringanisi ni munhu mun’wani.” — Vagalatiya 6:4.

 Pimisa hi leswi: U nga tshameli ku tifananisa ni vanhu van’wani, kambe khumbuka marito lawa ma nga ka Marka 12:30, lawa ma nge: “U fanele u rhandza Yehovha Xikwembu xa wena hi mbilu ya wena hinkwayu.”

 A ndzimana leyi yi li u fanele u tirhela Yehovha hi mbilu ya wena hinkwayu, ku nga li hi mbilu ya munhu mun’wani. Se loko u mu rhandza Yehovha u ta lavetela tindlela ta ku mu tirhela hilani u nga kotaka hi kona.

 “Xiboho xa ku tsakamisiwa i xa lisima, naswona a xi nga ta ku tikisela wutomi. Loko u ni vanghanu vavanene va ta ku pfuna. Se zama ku fikelela mintirho hi katsongokatsongo; leswo swi ta ku yendla u tsaka. Loko u tshamela ku baleka ku tsakamisiwa, a wu nga ta tsaka.” — Julia.

 Magamu ya mhaka: Khensa lirhandzu leli Yehovha a ku kombaka lona. Leswo swi ta ku yendla u lava ku mu yendlela hinkwaswu leswi u nga swi kotaka. — 1 Yohani 4:19.

 Loko u lava ku tiva swin’wani: Vona nhlokomhaka leyi nge: “Ndzi Byi Byarha Njhani Vutihlamuleri Bya Mina?” (hi Xitsonga).

 Loko ni pimisa swaku a ni faneleki ku mu tirhela Yehovha

 Leswi ku yendlaka u chava: Phela Yehovha a tlakukile amisaveni hinkwayu, funtshi loko hi pimanisiwa na yena, hina a hi va nchumu. Se swi nga yendleka u tivutisa leswi: ‘Indjhe Yehovha wa swi tiva swaku ni kona?’

 “Leswi vapsali va mina va nga Timboni ta Yehovha, a ni karhateka hileswaku a no va munghanu wa Yehovha hileswi vapsali va mina a va li Timboni. Se a ni tshamela ku tivutisa swaku i Yehovha a nga ni kokela ka nhlengeletanu ya yena, kumbe a ku li hi mhaka ya vapsali va mina.” — Natalie.

 Ndzimana ya Bibele: “A ku na munhu lweyi a nga taka ka mina loko a nga tisiwanga hi Papayi lweyi a nga ni rhuma.” — Yohani 6:44.

 Pimisa hi leswi: Ntsena hi ku va u pimisa hi ku tsakamisiwa swi nga ha kombisa leswaku Yehovha a ku kokele ka yena. Yena a swi lava hintamu leswaku u va munghanu wa yena. Se swi ngo yini u pfumela xirhambu lexi Yehovha a ku nyikaka xona? Phela loko u yamukela xirhambu lexo u ta va na u yendla xiboho xaxinene.

 Khumbuka swaku Yehovha hi yena a yendlaka xiboho xa leswaku i mani lweyi a nga ta va munghanu wa yena, ku nga li wena n’winyi kumbe munhu mun’wani. Funtshi ka Bibele Yehovha a tshembisa swaku loko u ‘tshinela ka yena na yena a ta tshinela ka wena.’ — Yakobo 4:8.

 “Ku va u tiva Yehovha ni ku va a ku kokile swaku u va munghanu wa yena swi kombisa swaku wa ku rhandza. Se loko u tshuka u tikanganyisa u pimisa swaku a wu faneleki ku mu tirhela, khumbuka swaku Yehovha a nga pfumelelani na swona leswo funtshi leswi Yena a ku vonisaka xiswona hi swona swi nga swa ntiyiso.” — Selina.

 Magamu ya mhaka: Loko swi ku hi ku ya hi Bibele wa faneleka swaku u tsakamisiwa, leswo swi kombisa swaku wa faneleka ku gandzela Yehovha. Naswona khumbuka swaku xa lisima hintamu hileswaku swa mu fanela Yehovha ku gandzeliwa hi wena. — Nhlawutelo 4:11.

 Loko u lava ku tiva swin’wani: Vona nhlokomhaka leyi nge: “Hi Mhaka Muni Ni Fanele Ni Khongela?”