YESU a vulavule hi xikhongelo makhambi ya manyingi naswona nkama lowu na a li lani misaveni vafundhisi va wukhongeli la Xiyuda a va talisa ku yendla swikhongelo “lomu tindlela tatikulu ti tlhanganaka kona leswaku va voniwa hi vanhu.” Vona a va yendla leswo leswaku va yendla vanhu va pimisa swaku vona a va xi rhandza Xikwembu. Vanyingi va vona a va yendla swikhongelo swa ku leha hintamu va tlhela va phindhaphindha marito ingi ku “vula marito ya manyingi” hi swona swi nga yendlaka swaku swikhongelo swi yingisiwa. (Matewu 6:5-8) Se loko Yesu a va vona na va yendla leswo a va byele hi ku kongoma leswaku leswi a va khongelisa xiswona a swi nga pfuni nchumu. Leswo a swi pfuna vanhu va timbilu tatinene ku vona leswi a va nga fanelanga va swi yendla loko va khongela. Kambe Yesu a nga yendlanga leswo ntsena, yena a tlhele a va djondzisa ndlela yayinene ya ku khongela.

Yesu a djondzise swaku ka swikhongelo swa hina hi fanele hi kombela swaku vito la Xikwembu li kwetsimisiwa, swaku Mfumu wa xona wu ta lani misaveni leswaku wu yendla ku rhandza ka xona funtshi a tlhele a hi djondzisa swaku i swinene kuva hi kombela ku pfuniwa hi Xikwembu ka swikarhatu swa hina. (Matewu 6:9-13; Luka 11:2-4) Funtshi hi ku tirhisa swikombiso a hi djondzise swaku hi fanele hi phikelela, hi va ni lipfumelo hi tlhela hi tiveka hansi leswaku swikhongelo swa hina swi yingisiwa. (Luka 11:5-13; 18:1-14) Naswona a hi vekele xikombiso ku va a hi komba leswaku leswi a a swi djondzisa a swi li swa lisima. — Matewu 14:23; Marka 1:35.

Ha tiyiseka swaku leswi Yesu a nga swi djondzisa swi pfune vadjondzisiwa va yena leswaku va yampsisa swikhongelo swa vona. Hambileswo, ku ve ka wusiku la wugamu na a li lani misaveni lani Yesu a nga va djondzisa nchumu wa lisima wa kona hi xikhongelo.

‘Ku Txintxa Kakukulu Ka Ndlela Leyi Hi Yendlaka Swikhongelo Hi Yona’

Ka wusiku la yena la wugamu na a nga se dlayiwa, Yesu a tiyise vadjondzisiwa va yena va ku tshembeka a tlhela a tirhisa nkama lowuyani swaku a va byela nchumu wa lisima hintamu. Yena a te: “Hi mina ndlela ni ntiyiso ni wutomi. A ku na munhu lweyi a nga yaka ka Papayi loko ku nga li hi mina.” Yesu a tlhele a va tshembisa swaku ‘xin’wani ni xin’wani lexi a va ta xi kombela hi vito la yena a a ta xi yendla swaku Papayi a dzunisiwa hi mhaka ya yena.’ Naswona loko mabulu ya yena ni vadjondzisiwa va yena ma ya ku heleni a va byele a ku: “Ku ta fikela swoswi, a mi se kombela nchumu ni xin’we hi vito la mina. Kombelani, mi ta nyikiwa, leswaku mi ta tsaka swinene.” — Yohani 14:6, 13, 14; 16:24.

Phela marito lawa ma hlamalisa! Buku lin’wani loko li tlhamusela marito lawa li vula swaku a swi kombisa “ku txintxa kakukulu ka ndlela leyi vanhu a va fanele va yendla swikhongelo hi yona.” Kambe ku nga va leswaku Yesu a a lava ku vula swaku a swikhongelo a swi fanele swi yisiwa ka yena ku nga li ka Xikwembu? Nada, phela yena a a lava ku hi komba ndlela ya nyuwani ya ku va hi tshinela ka Xikwembu.

Minkama hinkwayu Yehovha a a swi yingisa swikhongelo swa vanhu va yena. (1 Samuwele 1:9-19; Tipisalema 65:2) Kambe ku sukela nkama Vayisrayele va nga va tiko leli nga tinyiketela ka Xikwembu, leswaku swikhongelo swa munhu swi yingisiwa a swi lava ku sungula a kholwa swaku Yehovha a a lange Vayisrayele swaku va va tiko la yena. Naswona ka nkama wa Solomoni a swi lava swaku munhu a kholwa swaku tempele a ku li yona ndhawu leyi Yehovha a nga yi langa swaku ku yendliwa ka yona magandzelo. (Deteronoma 9:29; 2 Tikronika 6:32, 33) Hambileswo, ndlela leyi ya ku gandzela Yehovha a yi li ya nkamanyana. Hi vula leswo hikusa mupostolo Pawulo a vule swaku a Nawu wa Moxe ni magandzelo lawa a ma yendliwa atempeleni a ku li “ndzhuti ntsena wa swilo swaswinene leswa ha taka, kambe a wu swi kombisi hi ku helela.” (Vaheberu 10:1, 2) Leswo swi kombisa swaku a swilo leswi nga ndzhuti a swi fanele swi pfaletiwa hi swilo swaswinene. (Vakolosa 2:17) Se ku sukela hi lembe la 33 E.C., leswaku munhu a va ni wunghanu lalinene na Yehovha, a swa ha dependeri hi ku va a yingisa Nawu wa Moxe kambe swi dependera ntsena hi ku va munhu wa kona a yingisa Yesu. — Yohani 15:14-16; Vagalatiya 3:24, 25.

“Vito Leli Nga Henhla Ka Mavito Hinkwawu”

Yesu a yendle leswaku hi tshinela ka Yehovha hi ndlela ya ku a swi nga se tshama swi yendleka. Ku fana ni munghanu lweyi a nga ni matimba yamakulu, yena a pfula ndlela leswaku swikhongelo swa hina swi yingisiwa swi tlhela swi hlamuliwa hi Yehovha. Kambe i mpsini leswi Yesu a nga swi yendla leswaku leswo swi koteka?

Leswi hinkwerhu hi nga psaliwa ni xidjoho, a ku na ntirho kumbe gandzelo leli hi nga li yendlaka leli nga yendlaka swaku hi rivaleliwa swidjoho swa hina kumbe leli nga hi yendlaka hi va ni wunghanu la le kusuhi hintamu ni Xikwembu xa hina xa ku kwetsima ku nga Yehovha. (Varoma 3:20, 24; Vaheberu 1:3, 4) Kambe leswaku leswo swi koteka, Yesu lweyi a a nga na xidjoho a nyikele hi wutomi la yena leswaku vanhu hinkwavu va rivaleliwa swidjoho swa vona. (Varoma 5:12, 18, 19) Se lava lavaka swaku swidjoho swa vona swi rivaleliwa va fanele va kombisa lipfumelo ka gandzelo la nkutsulu la Yesu ni ku va va khongela na va tirhisa vito la yena. Leswo swi ta yendla swaku swi koteka ku va va vulavula na Yehovha ‘na va chunsekile’ va tlhela va va ni lipfalu la ku basa. — Vaefeza 3:11, 12.

Nkama lowu hi khongelaka na hi tirhisa vito la Yesu hi va na hi kombisa lipfumelo ka swilo swinharhu leswi hi pfunaka ku vona mintirho ya lisima leyi Yesu a nga na yona leswaku xikongomelo xa Yehovha xi hetiseka: 1) Yesu i “Xinyempfani xa Xikwembu,” funtshi lifu la yena li yendle swaku swidjoho swa vanhu hinkwavu lani misaveni swi rivaleliwa. 2) Yesu a pfuxiwe hi Yehovha a ku feni funtshi swoswi i “muprista wamukulu” lweyi a yendlaka swaku hi va ni minkateko ya ku hambanahambana leyi tisiwaka hi nkutsulu. 3) Yesu i “ndlela,” leswi yendlaka swaku swi koteka ku vulavula na Yehovha hi ku tirhisa xikhongelo. — Yohani 1:29; 14:6; Vaheberu 4:14, 15.

Loko hi khongela hi vito la Yesu hi va hi kombisa leswaku ha mu hlonipha, funtshi swa fanela ku va hi mu hlonipha hikusa Yehovha a lava leswaku “hinkwavu . . . va khizama hi vito la Yesu, naswona vanhu va tirimi hinkwatu va fanele va pfumela leswaku Yesu Kreste i Hosi, leswaku ku dzunisiwa Xikwembu Papayi.” (Vafilipiya 2:10, 11) Xa lisima hintamu hi leswaku loko hi khongela hi vito la Yesu hi va hi dzunisa Yehovha lweyi a nga nyikela hi N’wana wa yena kuva hi ponisiwa. — Yohani 3:16.

Bibele li tirhisa mavito ya ku hambanahambana loko li vulavula hi Yesu swaku li hi komba ntirho wa lisima lowu yena a nga na wona namuntlha. Funtshi mavito lawa ma hi pfuna ku vona minkateko leyi hi yi kumaka hi leswi yena se a nga swi yendla, leswi a swi yendlaka swoswi ni leswi a nga ta swi yendla ka nkama lowu taka. (Vona kwadru leli nge “ Ntirho Wa Lisima Lowu Yesu A Nga Na Wona”.) Phela Yesu a nyikiwe “vito leli nga henhla ka mavito hinkwawu,” a funtshi a nyikiwe matimba ya ku fuma matilweni ni misaveni. — Vafilipiya 2:9; Matewu 28:18.

Hi Swi Vula Na Swi Sukela Mbilwini

Loko hi lava leswaku Yehovha a hlamula swikhongelo swa hina hi fanele hi khongela na hi tirhisa vito la Yesu. (Yohani 14:13, 14) Kambe hi fanele hi yendla leswo na swi sukela mbilwini ku nga li leswaku hi hetisisa nawu.

Pimisa hi xikombiso lexi: Hi ntolovelo, loko hi tsalela emprezariyu a karta hi gama hi ku tsala marito lawa ma kombisaka xihlonipho ni ku khensa. Kambe ku nga va swaku hi tsala marito lawo hileswi hi mu hloniphaka ni hileswi hi mu khensaka munhu wa kona? Nada, ku vula ntiyiso, hi tsala marito lawo hileswi hi landzelaka nawu wa matsalelo ya makarta wolawo. Kambe leswo swi hambanile ni xikhongelo hikusa Bibele li hi byela swaku hi fanele hi ‘khongela minkama hinkwayu’ ni swaku hi fanele hi tirhisa vito la Yesu nkama hi khongelaka. Kambe a hi lavi ku yendla leswo swaku hi hetisisa nawu ntsena, ku hambana ni leswo hi lava ku khongela ‘hi mbilu hinkwayu.’ — 1 Vatesalonika 5:17; Tipisalema 119:145.