Mahungu Ya Ku Tsakisa Ya Ku Tsaliwa Hi Yohani 18:1-40
-
Yudasi a xavisa Yesu (1-9)
-
Pedru a tirhisa xipada (10, 11)
-
Yesu a yisiwa ka Anasi (12-14)
-
Pedru a yala Yesu ka ku sungula (15-18)
-
Yesu phambheni ka Anasi (19-24)
-
Pedru a yala Yesu ka wumbirhi ni ka wunharhu (25-27)
-
Yesu phambheni ka Pilatu (28-40)
-
“Mfumu wa mina a wu fani ni mimfumu ya misava leyi” (36)
-
18 Nkama Yesu a nga hlaya marito lawa, a hume ni vadjondzisiwa va yena va ya+ ka Nkova wa Kedroni+ lomu a ku ni jardim.
2 Na yena Yudasi lweyi a nga mu xavisa, a a yi tiva ndhawu leyi hikusa Yesu ni vadjondzisiwa va yena a va tlhangana ka yona minkama ya yinyingi.
3 Se Yudasi a ta ni masonchwa ni vavoneleli* lava nga rhumiwa hi vaprista vavakulu ni Vafarisi na va khome swa ku vona hi swona, tinhonga ni swipada.+
4 Leswi Yesu a a swi tiva hinkwaswu leswi a swi ta mu humelela, a va yelile a fika a va vutisa a ku: “Mi lava mani?”
5 Se va ku: “Yesu wa le Nazareta.”+ A ku: “Hi mina lweyi.” Na yena Yudasi lweyi a nga mu xavisa a a li na vona.+
6 Kambe nkama Yesu a nga ku: “Hi mina lweyi”, va hlehla hi ndzhaku va wa.+
7 Se a tlhela a va vutisa a ku: “Kasi mi lava mani?” Va mu hlamula va ku: “Yesu wa le Nazareta.”
8 Yesu a ku: “Se ni mi byelile swaku hi mina lweyi. Loko mi lava mina, tshikani lava va famba.”
9 A hlaye leswo swaku ku hetiseka leswi a nga swi vula nkama a nga ku: “A ni lahlekeliwanga ni hi mun’we wa lava u nga ni nyika vona.”+
10 Leswi Simoni Pedru a a ni xipada, a yo vhela a xi humesa a hlasela xitirhi xa muprista wamukulu a xi tsema ndleve ya xinene.+ Vito la xitirhi xolexo a ku li Malku.
11 Kambe Yesu a byela Pedru a ku: “Tlhelisa xipada xa wena ka ndhawu ya xona.+ A ni fanelanga ni nwa ka kopo leyi Papayi a nga ni nyika yona ke?”+
12 Se masonchwa, murhangeli wa masonchwa ni vavoneleli va Vayuda va khoma Yesu va mu boha.
13 Va rhange hi ku mu yisa ka Anasi hikusa Kayafasi+ lweyi a a li muprista wamukulu hi lembe lolelo+ a a li mukon’wani wa Anasi.
14 Kayafasi hi yena a nga tshama a khumbukisa Vayuda swaku swi ta pfuna vona kuva munhu mun’we a fela vanhu hinkwavu.+
15 Simoni Pedru ni mudjondzisiwa mun’wani a va landzelela Yesu.+ Se leswi mudjondzisiwa yelweyo a a tiviwa hi muprista wamukulu, a nghene na Yesu ka munti wa muprista wamukulu,
16 kambe Pedru a a nyime handle ka xipfalu. Se mudjondzisiwa lweyi a a tiviwa hi muprista wamukulu a huma a ya vulavula ni muvoneleli wa nyanghwa, kutani a nghenisa Pedru.
17 Mutirhi wa xisati lweyi a a vonelela nyanghwa a vutisa Pedru a ku: “Indjhe wena a wu mun’wani wa vadjondzisiwa va munhu lwiya ke?” Pedru a ku: “A ni yena.”+
18 A vatirhi ni vavoneleli a va nyime kolanu va worha ndzilu hikusa a ku titimela. Pedru na yena a a worha na vona.
19 Kutani muprista wamukulu a vutisa Yesu hi ta vadjondzisiwa va yena ni ta leswi a a swi djondzisa.
20 Yesu a mu hlamula a ku: “Ni vulavule phambheni ka vanhu. A ni tolovela ku djondzisa ka masinagoga* ni le tempeleni,+ lomu Vayuda hinkwavu va hlengeletanaka kona naswona a ni vulanga nchumu na ni nga twiwi hi munhu.
21 Se u vutisa mina hi mhaka muni? Vutisa lava nga swi twa leswi ni nga va byela swona. Va swi tiva leswi ni nga swi vula.”
22 Nkama Yesu a nga vula leswo, muvoneleli mun’we lweyi a a nyime kusuhi na yena a mu ba mpama+ a ku: “I ndlela ya ku hlamula muprista wamukulu leyo?”
23 Yesu a ku: “Loko ku li swaku ni phazamile, ni byeli xihoxo xa mina; kambe loko ni nga wonhanga nchumu se u ni bela yini?”
24 Se Anasi a rhumela Yesu na a bohiwile ka Kayafasi muprista wamukulu.+
25 Simoni Pedru a a nyime kolanu na a worha ndzilu. Se va ku: “Indjhe na wena a wu mun’we wa vadjondzisiwa va yena ke?” A yala a ku: “A ni yena.”+
26 Mun’wani wa vatirhi va muprista wamukulu lweyi a a li xaka la wanuna lweyi Pedru a nga mu tsema ndleve+ a ku: “A hi wena ni nga ku vona ka jardim na u li na yena ke?”
27 Kambe Pedru a tlhela a yala, se nkuku wu yimba hi nkama wolowo.+
28 Kutani va suka na Yesu ka Kayafasi va mu yisa ka yindlo ya govhernadori.+ A ka ha li mpundzu swinene. Kambe vona a va nghenanga leswaku va nga chakisiwi+ hikusa a va ta dla Paxkwa.
29 Se Pilatu a huma handle a ku: “A wonhe yini wanuna lweyi?”
30 Va mu hlamula va ku: “Loko wanuna lweyi a a nga li xigevenga a hi nga ta mu tisa ka wena.”
31 Kutani Pilatu a ku: “Mu tekeni mi ya mu yavanyisa hi ku landza nawu wa n’wina.”+ Se Vayuda va ku: “Nawu wa hina a wu hi pfumeleli ku dlaya munhu.”+
32 Leswi a swi hetisisa leswi Yesu a nga swi hlaya nkama a nga kombisa leswi a a ta fisa xiswona ku nga li khale.+
33 Kutani Pilatu a tlhela a nghena ka yindlo ya govhernadori a gama a vitana Yesu a ku: “U Hosi ya Vayuda ke?”+
34 Yesu a ku: “Indjhe u ni vutisa hileswi u lavaka ku swi tiva kumbe hileswi u nga twa xanchumu hi mina?”
35 Pilatu a hlamula a ku: “U swi tiva kahle swaku a ni Muyuda. Vanhu va tiko la wena ni vaprista vavakulu hi vona va nga ku tisa la ka mina. U yo wonha yini?”
36 Yesu a hlamula a ku:+ “Mfumu wa mina a wu fani ni mimfumu ya misava leyi.+ Loko a wo fana ni mimfumu ya misava leyi, valandzeli va mina a va ta va va ni lwelile swaku ni nga khomiwi hi Vayuda.+ Kambe ntiyiso hi leswaku Mfumu wa mina a hi wa misava leyi.”
37 Kutani Pilatu a ku: “Se hi nga ni byela, u hosi ke?” Yesu a hlamula a ku: “Wena hi wexe u vula swona.+ Leswi ni nga psaleliwa swona ni leswi ni nga tela swona la misaveni i ku ta vula ntiyiso.+ Lweyi a hanyaka hi ntiyiso a yingisa rito la mina.”
38 Pilatu a ku: “I ntxini ntiyiso?”
Nkama a nga hlaya leswo, a tlhele a huma a ya ka Vayuda a fika a ku: “A ni voni nandzu ka munhu lweyi.+
39 Mi tolovele ku va ni mi chunsela munhu hi Paxkwa.+ Mi lava swaku ni mi chunsela Hosi ya Vayuda ke?”
40 Se va huwelela va ku: “Hi chunseli Barabasi hayi wanuna lweyi!” Barabasi a a li xigevenga.+
