Mahungu Ya Ku Tsakisa Ya Ku Tsaliwa Hi Luka 22:1-71
-
Vaprista va lava ndlela ya ku dlaya Yesu (1-6)
-
Ku lunghiselela Paxkwa la wugamu (7-13)
-
Ku vekiwa ka Xilalelo xa Hosi (14-20)
-
“Lweyi a nga ta ni xavisa a na mina kola mezeni” (21-23)
-
Vadjondzisiwa va holovisana hi swaku i mani wamukulu ka vona (24-27)
-
Yesu a yendla ntwananu wa mfumu (28-30)
-
Yesu a vula swaku Pedru a ta mu yala (31-34)
-
Lisima la ku tshama va lunghekile; swipada swimbirhi (35-38)
-
Xikhongelo xa Yesu ka Ntshava ya Mawolivhera (39-46)
-
Ku khomiwa ka Yesu (47-53)
-
Pedru a yala Yesu (54-62)
-
Yesu a poyiliwa (63-65)
-
Yesu a thethisiwa ka Tribunali Lalikulu la Vayuda (66-71)
22 A Fexta la Mapawu ya Ku Kala Fermentu,* leli vitaniwaka Paxkwa,+ a li li kusuhi.+
2 Naswona vaprista vavakulu ni vatsali a va lava ku dlaya Yesu, kambe a va lava ndlela ya kahle ya ku yendla leswo+ hikusa a va chava vanhu.+
3 Se Sathana a nghenela Yudasi, lweyi a vitaniwaka Skariyota, lweyi a a li mun’wani wa lava 12,+
4 kutani a famba a ya khuluma ni vaprista vavakulu ni lava a va vonelela tempele, hi ta ndlela leyi a nga mu xavisaka ka vona hi yona.+
5 Nkama va nga twa leswo, va tsaka va tlhela va twanana ku mu nyika male ya prata.+
6 Kutani Yudasi a pfumela, naswona a sungula ku lavetela nkama wa kahle wa ku mu xavisa ka vona na vanhu va nga swi tivi.
7 Kutani ku fika siku la ku sungula la Fexta la Mapawu ya Ku Kala Fermentu, ku nga siku leli a ku dlayiwa xifuyu lexi a xi ta dliwa ka Paxkwa;+
8 se Yesu a rhuma Pedru na Yohani a ku: “Fambani mi ya lunghiselela Paxkwa swaku hi ta dla.”+
9 Va mu vutisa va ku: “U lava hi ya yi lunghiselela kwini?”
10 A va hlamula a ku: “Nkama mi nga ta nghena ka doropa, mi ta tlhangana ni wanuna lweyi a nga rhwala khuwani la mati. Mu landzeni mi ya ka munti lowu a nga ta nghena ka wona,+
11 naswona byelani n’winyi wa munti mi ku: ‘Mudjondzisi a li: “Li kwini sala la vayendzi leli ni nga ta dlela ka lona Paxkwa ni vadjondzisiwa va mina ke?”’
12 Kutani a ta mi komba sala lalikulu la le henhla leli nga ni leswi lavekaka. Lunghiselani kolanu Paxkwa.”
13 Se va famba, kutani swilo swi yendlekisa leswi a nga va byelisa xiswona; se va lunghiselela Paxkwa.
14 Loko nkama wu fika, Yesu a tshama mezeni ni vapostolo va yena,+
15 kutani a ku: “Ni tsakile swinene hi ku dla Paxkwa leli na n’wina na ni nga se xanisiwa;
16 hikusa na mi byela: A ni nga ha ta tlhela ni li dla anze swilo hinkwaswu swi hetiseka ka Mfumu wa Xikwembu.”
17 Se a yamukela kopo, a khensa Xikwembu a gama a ku: “Tekani mi siyelisana
18 hikusa na mi byela: Ku sukela swoswi, a ni nge he tlheli ni nwa vhinyu anze ku fika Mfumu wa Xikwembu.”
19 A tlhela a teka pawu,+ a khensa, a li khema a gama a va nyika lona a ku: “Pawu leli li fanekisela muzimbha wa mina+ lowu nga ta nyikeliwa hi mhaka ya n’wina.+ Tshamelani ku yendla leswi leswaku mi ni khumbuka.”+
20 Naswona loko se va dlile, a yendla swa ku fana ni hi kopo, a ku: “Kopo leyi yi fanekisela ntwananu wa nyuwani+ lowu tiyisekisiwaka hi ngati ya mina,+ leyi nga ta halatiwa swaku ku pfuneka n’wina.+
21 “Kambe swi tiveni swaku lweyi a nga ta ni xavisa a na mina kola mezeni.+
22 N’wana wa munhu wa famba hi ku landza leswi swi nga profetiwa;+ kambe khombo ka munhu lweyi a mu xavisaka!”+
23 Kutani va sungula ku vutisana swaku ku nga va mani lweyi a lavaka ku mu xavisa.+
24 Kambe va tlhela va sungula ku holovisana hi swaku i mani wamukulu ka vona.+
25 Kambe a ku: “Tihosi ta matiko ta va tikisela vanhu, naswona vafumi va nyikiwa mavito ya lisima.*+
26 Kambe n’wina a mi fanelanga mi fana na vona.+ Wamukulu xikarhi ka n’wina a a ve wamutsongo ka hinkwenu,+ kasi lweyi a mi rhangelaka a ku ve yena lweyi a mi tirhelaka.
27 Ka lweyi a nga ku dleni* ni lweyi a phamelaka,* i mani wamukulu ka vona? A hi lweyi a nga le ku dleni? Kambe mina ni phamela* n’wina.+
28 “Hi n’wina mi nga tiyisela na mina+ ka swikarhatu swa mina hinkwaswu;+
29 kutani ni yendla ntwananu na n’wina, ku fana ni leswi Papayi a nga yendla ntwananu wa mfumu na mina,+
30 leswaku mi dla ni ku phuza ka meza wa mina ka Mfumu wa mina,+ kutani mi tshama ka switshamu swa wuhosi+ swaku mi yavanyisa 12 wa tinxaka ta Israyele.+
31 “Simoni, Simoni, tivoneli! Sathana a lava ku mi hlela ku fana ni trigu.+
32 Kambe ni ku khongelelile swaku lipfumelo la wena li nga holi;+ kutani loko se u tisolile, tiyisa lipfumelo la vamakwenu.”+
33 A mu hlamula a ku: “Hosi, ni tinyimisele ku pfaleliwa na wena djele ni ku fa na wena.”+
34 Kambe Yesu a ku: “Pedru, na ku byela swaku na nkuku wu nge se yimba, u ta ni yala kanharhu.”+
35 A tlhela a ku: “Indjhe mi pfumale nchumu nkama ni nga mi rhuma na mi nga na xipachi, nkwama wa swakudla ni masandaliya?”+ Va mu hlamula va ku: “A hi pfumalanga nchumu!”
36 Se a ku: “Swoswi lweyi a nga ni xipachi a a xi teki, ni lweyi a nga ni nkwama wa swakudla a a wu teki, naswona lweyi a pfumalaka xipada a a xavisi nguvu ya yena a xi xava.
37 Hikusa na mi byela: Matsalwa lama vulaka leswi: ‘A tekiwe a li mudjohi,’ ma fanele ma hetiseka ka mina.+ Vhela swa hetiseka leswi faneleke swi hetiseka ka mina.”+
38 Kutani va ku: “Hosi, hi leswi swipada swimbirhi.” A ku: “Swa yenela.”
39 Kutani a famba a ya ka Ntshava ya Mawolivhera ku fana ni leswi a a tolovela ku swi yendlisa xiswona masiku man’wani, vadjondzisiwa va yena na vona va famba na yena.+
40 Nkama va nga fika ka ntshava a ku: “Tamani mi khongela swaku mi nga weli ndzingweni.”+
41 Se Yesu a suka a ya kulenyana, a fika a khizama a khongela
42 a ku: “Papayi, loko u swi lava, susa kopo leyi ka mina. Kambe ku nga yendleki ku rhandza ka mina, a ku yendleki ku rhandza ka wena.”+
43 Kutani ku ta ntsumi hi le tilweni yi fika yi mu tiyisa.+
44 Kambe a a tlhaveke mbilu swinene lakakuva a tama a khongela hi mbilu hinkwayu+ naswona nyuku wa yena lowu a wu thonela hansi a wu fana ni ngati.
45 Nkama a nga gama ku khongela, a tlhelele ka vadjondzisiwa va yena, kambe a va kuma na va yetlelile hi mhaka ya ku karhateka.*+
46 Se a ku: “Hi mhaka muni mi yetlela? Pfukani, tamani mi khongela swaku mi nga weli ndzingweni.”+
47 Na a ha khuluma, ku humelela xitshungu lexi a xi rhangeliwa hi Yudasi, mun’we wa lava 12, kutani a ya ka Yesu a fika a mu bejara.*+
48 Kambe Yesu a ku: “Yudasi, ho xavisa N’wana wa munhu hi ku mu bejara?”
49 Nkama lava a va li na Yesu va nga vona leswi a swi ta yendleka va ku: “Hosi, hi nga va hlasela hi xipada?”
50 Se mun’wani wa vadjondzisiwa a hlasela xitirhi xa muprista wamukulu a xi tsema ndleve ya xinene.+
51 Kambe Yesu a ku: “Mi nga yendleni leswo.” Se a khumba ndleve ya xitirhi a xi hanyisa.
52 Kutani Yesu a byela vaprista vavakulu ni lava a va vonelela tempele ni madoda lama nga ta leswaku ma ta mu khoma, a ku: “No va xigevenga ke, mi zaka mi ni tela ni swipada ni tinhonga leswaku mi ta ni khoma?+
53 Ma swi tiva swaku siku ni siku+ a ni tshama na n’wina tempeleni, se hi mhaka muni mi nga ni khomanga?+ Kambe lowu i nkama wa n’wina ni wa ku fuma ka munyama.”+
54 Se va mu khoma va famba na yena,+ va mu yisa ka yindlo ya muprista wamukulu; kambe Pedru a mu landzela hi le kulenyana.+
55 Va fike va tshivela ndzilu phambheni ka yindlo ya muprista wamukulu va tshama, se na yena Pedru a tshama na vona.+
56 Kambe mutirhi mun’wani wa xisati a mu vona na a tshamile a worha ndzilu, se a mu txuvukisisa a ku: “Wanuna lweyi a a li na yena.”
57 Kambe a yala a ku: “Wansati ndziwena, a ni mu tivi munhu lwiya.”
58 Loko ku hundze nkamanyana, mun’wani a mu vona a gama a ku: “Na wena u mun’wani wa vona.” Kambe Pedru a ku: “He nduwe, a ni yena.”+
59 Kutani loko se ku hundze kolomuyani ka wora, wanuna mun’wani a sungula ku tiyisa mhaka a ku: “Vhela wanuna lweyi a a na yena, hikusa na yena i Mugalileya!”
60 Kambe Pedru a ku: “He nduwe, a ni swi tivi leswi u vulavulaka hi swona.” Kutani loko a ha vulavula, nkuku wu yimba.
61 Kutani Hosi yi ndzuluka yi txuvuka Pedru, se a khumbuka marito ya Hosi loko yi mu byela yi ku: “Na nkuku wu nge se yimba namuntlha, u ta ni yala kanharhu.”+
62 Se a huma handle a fika a rila hi xiviti.
63 Kutani vavanuna lava nga khoma Yesu va sungula ku mu poyila+ ni ku mu ba;+
64 va tlhela va mu mbhonya nghohe* va ku: “Profeta ka! I mani lweyi a nga ku ba?”
65 Se va vula marito ya manyingi ya ku mu rhuketela.
66 Nkama li nga xa, ntlawa wa madoda ya tiko, vaprista vavakulu ni vatsali va hlengeletana,+ se va mu yisa ka Tribunali Lalikulu la Vayuda* va ku:
67 “Hi byeli loko u li Kreste.”+ Kambe a ku: “Hambi no mi byela, a mi nga ta kholwa.
68 Naswona loko no mi vutisa, a mi nge ni hlamuli.
69 Kambe ku sukela swoswi N’wana wa munhu+ a ta tshama ka voko la xinene la Xikwembu leli nga ni matimba.”+
70 Kutani va ku: “Se swi vula swaku u N’wana wa Xikwembu?” A va hlamula a ku: “N’wina hi n’wexe mi vula swaku ni yena.”
71 Kutani va ku: “Ha ha va lavela yini vafakazi van’wani? Hi swi twile loko a tivulela hi nomo wa yena.”+
