Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Vumela ku kurumetwa hi ‘xinyikiwo xi nga wulekiko’ xa Nungungulu

Vumela ku kurumetwa hi ‘xinyikiwo xi nga wulekiko’ xa Nungungulu

A ku bongiwe Nungungulu hi kota ya xinyikiwo xakwe lexi xi nga wulekiko.” — 2 KOR. 9:15.

TISIMU: 53, 18

1, 2. a) A ‘xinyikiwo xi nga wulekiko’ xa Nungungulu xi patsa yini? b) Ziwutiso muni hi to wulawula hi zona ka nzima leyi?

A XIKHATI lexi Jehova a nga rumela N’wana wakwe a belekilweko yece misaveni, i nyikile a xinyikiwo xa liranzo xa hombe ka zontlhe! (Joh. 3:16; 1 Joh. 4:9, 10) Mupostoli Paule i xi vitanile lezaku ‘xinyikiwo xi nga wulekiko’ xa Nungungulu. (2 Kor. 9:15) Hikuyini a tirisileko magezu lawo?

2 Paule i wa zi tiva lezaku zontlhe zitsumbiso zo saseka za Nungungulu zi wa ta tatiseka hi kota ya muphahlo wo mbhelela wa Kristu. (Gonza 2 Va Le Korinte 1:20.) Hikwalaho, a ‘xinyikiwo lexo xi nga wulekiko’ xi wa ta patsa gontlhe wunene ni liranzo lo tsumbeka leli Jehova a nga lava ku li kombisa ka hina ha Jesu. Kunene, a xinyikiwo lexo xi hlawulekile nguvu laha ka kuza xi nga hlawuteleki hi magezu ya vanhu. Xana a xinyikiwo lexo xo hlawuleka xi fanele ku hi khumbisa kuyini? Niku xi fanele ku hi kuca ku maha yini a xikhati hi ti longiselako kasi ku wona a Xialakanyiso xa kufa ka Jesu hi Wazithathu wa 23 ka Março wa 2016?

 XINYIKIWO XO HLAWULEKA XA NUNGUNGULU

3, 4. a) U ti zwisa kuyini loku a munhu a ku nyika xinyikiwo? b) A xinyikiwo xo hlawuleka xi nga cicisa kuyini a mahanyela ya wena?

3 Loku u amukela xinyikiwo, handle ko kanakana wa xalala nguvu. Hambulezo, a zinyikiwo zo kari zi ngava zo hlawuleka nguvu kutani za lisima nguvu laha ka kuza zi cica a wutomi. Hi xikombiso, hi nga ti alakanyela na u lava ku dawa hi ku ngha u mahile wugevenga. Hi xitshuketi, ku huma munhu u nga mu tiviko a ti nyikela kasi ku rwala a nanzu wa wena. I ti yimisele ku dawa wutshanwini ga wena! Xi wa ta ku khumbisa kuyini a xinyikiwo lexo?

4 A ku mahelwa nchumu lowo wa liranzo handle ko kanakana zi wa ta ku susumeta ku hlola a mitiro ya wena u tlhela u cica lezi u hanyisako zona. Kuzilava zi wa ta ku kuca kuva munhu wa wuhana ni wa liranzo hi vanwani u tlhela u tsetselela ni wihi munhu a ku onhelako. Wutomini ga wena gontlhe, u wa ta tizwa na u hi ni mangava ka munhu loye a ti nyikeleko a dawa wutshanwini ga wena.

5. Hikuyini a xinyikiwo xa Jehova xa nzhiho xi nga xa hombe nguvu ku hunza zontlhe zinyikiwo?

5 Hambulezo, a xinyikiwo lexi Jehova a hi nyikileko ha Kristu xa hombe nguvu ku hunza lexi xi hlawutelwako ka xikombiso lexi. (1 Ped. 3:18) Wona ku hikuyini. Hi kota ya xionho lexi hi thapelisilweko, hontlheni hi konelwe kufa. (Rom. 5:12) Hi ku hi ranza, Jehova i rumele Jesu misaveni kasi a ‘tazwa kufa hi kota ya vanhu vontlhe.’ (Maheb. 2:9) Jehova a nga ponisangi wutomi ga hina zalezi ntsena, kanilezi i tlhelile a zima xiseketelo xa ku fuvisa zontlhe lezi zi vangako kufa. (Isa. 25:7, 8; 1 Kor. 15:22, 26) Vontlhe lava va kholwako ka Jesu va ta kuma wutomi ga pinzukelwa. Va ta hanya laha misaveni hi kurula ni kutsaka hasi ka Mufumo wa Nungungulu wu rangelwako ha Kristu, kutani ku fuma zinwe na Kristu Mufunweni lowo, loku va hi maKristu ma totilweko. (Rom. 6:23; Kuv. 5:9, 10) Hi wahi manwani makatekwa ma patsekako ka xinyikiwo lexo xa Jehova?

6. a) Makatekwa muni ya xinyikiwo xa Jehova u ma rinzelako hi mahlo yo pswhuka? b) Wula zilo zinharu lezi a liranzo la Nungungulu li to hi kuca ku maha.

6 A xinyikiwo xa Jehova xi patsa ku hi hanyisa ka wontlhe mababyi ya hina, ku hunzula misava yiva paradise, ni ku vuxa vafileko. (Isa. 33:24; 35:5, 6; Joh. 5:28, 29) Handle ko kanakana ha mu ranza Jehova ni N’wana wakwe hi lezi va hi nyikileko ‘xinyikiwo lexo xi nga wulekiko.’ Hambulezo, a xiwutiso xi salako hi lexi: Zini lezi a liranzo la Nungungulu li hi kucako ku maha? A hi woneni lezi a liranzo la Nungungulu li hi kucisako zona 1) ku lanzela khwatsi a konzo wa Jesu, 2) ku ranza vamakabye va hina ni 3) ku tsetselela vanwani na zi sukela mbilwini.

“A LIRANZO LA KRISTU LA HI KURUMETA”

7, 8. Hi fanele ku ti zwisa kuyini hi liranzo la Kristu, niku li fanele ku hi kuca ku maha yini?

7 Xo ranga, li fanele ku hi kurumeta ku hanyela Kristu Jesu. Mupostoli Paule i tsalile lezi: “A liranzo la Kristu la hi kurumeta.” (Gonza 2 Va Le Korinte 5:14, 15.) Paule i wa zi zwisisa lezaku a hi nge amukeli a liranzo la hombe la Kristu, hi nga kurumeteki, kutani ku kuceka ku mu hanyela. A xikhati hi zwisisako khwatsi lezi Jehova a hi maheleko hi tlhela hi khumbiwa timbilu hi liranzo lakwe, hi telwa hi mixuvo yo lava ku hendleleta wutomi ga hina gontlhe ka Kristu Jesu. Hi nga ku kombisisa kuyini a kuxuva loko?

8 Lava va ranzako Jehova va kurumeteka ku pimanyisa xikombiso xa Kristu, va fambisa lezi a nga fambisa zona va tlhela va  lanzela a konzo wakwe. (1 Ped. 2:21; 1 Joh. 2:6) Hi kuingisa ka hina, hi komba lezaku ha mu ranza Nungungulu na Kristu. Jesu i te: “Loyi a nga ni milayo ya mina, a yi hlayisa, hi yena loyi a nzi ranzako; ni loyi a nzi ranzako, i ta ranziwa hi Dadani; na mina nzi ta mu ranza, nzi ta ti wonekisa ka yena.” — Joh. 14:21; 1 Joh. 5:3.

9. Mitshikelelo muni hi kumanako nayo?

9 Nzeni ka nguva ya Xialakanyiso, zi tava zi nene kuva hi ehleketisisa hi wutomi ga hina. Ti wutise lezi: ‘Hi kwihi lomu nzi lanzelako khwatsi a konzo wa Jesu? Hi kwihi lomu nzi faneleko ku chukwatisa?’ A ku ti hlola hi ndlela leyo za lisima, hakuva hi tshamela ku kuciwa ku lanzela a tindlela ta tiko legi. (Rom. 12:2) Loku hi nga ti woneli, hi ta maha vapizani va titlhari ta filozofia ta tiko legi kutani va vachayi va nduma ni vabeli va hombe. (Kol. 2:8; 1 Joh. 2:15-17) Hi nga yi hlulisa kuyini mitshikelelo leyo?

10. Ziwutiso muni hi nga ti mahako nguveni leyi ya Xialakanyiso, niku a mihlamulo ya zona yi nga hi kuca ku maha yini? (Wona mufota kusanguleni ka nzima)

10 Hi nga ha tirisa a nguva leyi ya Xialakanyiso kota xikhati xo hlola a tinguwo ta hina, mafilmi, ni wucenje, a ku patsa ni lezi zi nga lomu ka tikomputadori ta hina, titelefone ni mithebleti. A xikhati u hlolako a tinguwo ta wena, ti wutise lezi: ‘Loku nzi woya ka wutshamu legi Jesu a tova kona na yenawu, nzi wa ta boha tinguwo leti na nzi tlhatlhekile ke?’ (Gonza 1 Timote 2:9, 10.) ‘Loku nzi boha a tinguwo leti, a vanhu vontlhe va nga tekela ku zi wona lezaku nzi mulanzeli wa Kristu ke?’ Hi nga ti wutisa zalezo kambe xungetano hi mafilmi ya hina ni wucenje. ‘Xana Jesu i wa ta tsaka hi ku hlalela filmi legi kutani ku ingisela a wucenje legi? Loku o lomba a fone ya mina kutani thebleti wa mina, nzi wa ta karateka hi lezi a to zi wona ke?’ Laha u ehleketako hi migemi ya wena, ti wutise lezi: ‘Zi wa ta nzi karatela ku tlhamusela Jesu a ku hikuyini nzi ranzako a gemi wo kari ke?’ A liranzo la hina ha Jehova li fanele ku hi kurumeta ku potsa ni xihi xi nga faneliko mupizani wa Jesu, na ku nga khataliseki a ntsengo wa xona. (Miti. 19:19, 20) A xikhati lexi hi nga ti hendleleta hi tsumbisile lezaku hi nga ta ha ti hanyela kanilezi hi ta hanyela Kristu. Hikwalaho, a hi faneli ku namarela ka ni xihi lexi xi to hi valela ku lanzela a konzo wa Kristu. — Mat. 5:29, 30; Fil. 4:8.

11. a) A liranzo la hina ha Jehova na Jesu li hi kuca ku maha yini ntirweni wa kuxumayela? b) A liranzo la hina li nga hi kucisa kuyini ku vuna vanwani bandleni?

11 A liranzo la hina ha Jesu la hi kuca kambe lezaku hi ti nyikela hi mbilu yontlhe ntirweni wa kuxumayela ni ku maha vapizani. (Mat. 28:19, 20; Luka 4:43) Nguveni ya Xialakanyiso, hi tava ni lungelo go tira kota maphayona yo vunetela, laha hi to mbheta a 30 kutani 50 wa tihora ntirweni wa kuxumayela. U ta ti longisela kasi ku maha lezo? A makabye wo kari wa 84 wa malembe, a felweko hi sati, i wa ti wonisa ku khwatsi a nge zi koti ku tira kota phayona go vunetela hi kota ya tanga yakwe ni lihanyo lakwe. Hambulezo, a maphayona ya xipanzeni xakwe ma lo patsana kasi ma mu vuna. Va lo mu vuna hi mafambela, va tlhela va hlawula khwatsi a xipanze xa kuva a tirela ka xona, kasi a zi kota ku tlhanganyisa a 30 wa tihora. U nga zi kota ku vuna munhu a lavako xivuno bandleni ga wena kasi yenawu azwa litsako la ku tira kota phayona go vunetela nguveni ya Xialakanyiso ke? Lisine ku a hi nge zi koti hontlheni ku maha maphayona yo vunetela. Hambulezo, hi nga tirisa ni xihi xikhati ni ntamu hi nga nawo kasi ku engetela muphahlo wa hina wa ku dumisa Jehova. Hi ku maha lezo, hi komba lezaku ha kuciwa hi liranzo la Kristu, a ku fana na Paule.  Zini zinwani lezi a liranzo la Nungungulu li hi kucako ku maha?

HI KURUMETWA KU RANZANA

12. A liranzo la Nungungulu li hi kuca ku maha yini?

12 Xa wumbiri, a liranzo la Nungungulu li wa ta hi kurumeta ku ranza vamakabye va hina. Mupostoli Johani i wa zi zwisisa lezo. I tsalile lezi: “Varanzekako, loku Nungungulu a hi ranzisile lezo, hinawu hi fanele ku ranzana.” (1 Joh. 4:7-11) Kunene, loku hi amukela a liranzo la Nungungulu hi kufaneleko, hi ta kurumeteka ku ranza vamakabye va hina. (1 Joh. 3:16) Hi nga kombisisa kuyini liranzo lelo?

13. Xikombiso muni lexi Jesu a hi vekeleko xungetano hi ku ranza vanwani?

13 Ehleketa hi xikombiso xa Jesu. Wutirelini gakwe ga laha misaveni, i wa khatala nguvu hi vanhu va nyalidede. I lo vuna lava va nga babya — a zilema, a zikhumu, ziwiri, ni lava vo kala ku wulawula. (Mat. 11:4, 5) Jesu i wa zi ranza ku gonzisa lava va nga hi ni ndlala ya moya, lava va nga woniwa hi varangeli va wukhongeli va vaJuda kota vanhu va ‘rukatelweko.’ (Joh. 7:49) I wa ranza vanhu lavo va nyalidede a tlhela a va tirela hi kuhiseka. — Mat. 20:28.

U nga vuna makabye a kulileko ntirweni wa kuxumayela ke? (Wona nzimana 14)

14. Zini u nga mahako kasi ku kombisa liranzo hi vamakabye va wena?

14 A nguva ya Xialakanyiso yi ku vululela ndlela ya ku pimanyisa Jesu hi ku ti nyika xikhati xa ku ehleketa hi vamakabye va bandla ga wena. Hi ku maha lezo, handle ko kanakana u ta wona lezaku a vokari va ta vuneka hi liranzo la wena. Kuzilava ku na ni vamakabye va kulileko lava va lavako xivuno. U nga va enzela vamakabye lavo vo ranzeka? U nga va nehela zakuga, u va vuna hi mitiro ya laha kaya, u famba navo mitlhanganweni, kutani ku va ramba lezaku u huma navo simu? (Gonza Luka 14:12-14.) Hi fanele ku tsika liranzo la Nungungulu li hi kuca ku kombisa lezaku ha va ranza vamakabye va hina.

MAHELA WUXINJI VAMAKABYE VA WENA

15. Zini lezi hi faneleko ku zi alakanya?

15 Xa wunharu, a liranzo la Jehova li fanele ku hi kurumeta ku tsetselela vamakabye va hina. Kota vana va wanuna wo sangula Adamu, hontlheni hi thapelwe hi xionho ni tsayiselelo wa xona, ku nga kufa. A nga kona ni munwe ka hina a nga wulako ku, “A nzi na xilaveko xa nzhiho.” Hambu a nanza ga Nungungulu go tsumbeka ka wontlhe gi khegela hi kumbhelela ka tipswalo leti Jehova a hi  mahelako ha Kristu. A munwe ni munwani wa hina i fanele ku alakanya lezaku hi tsetselelwe mangava ya hombe nguvu. Hikuyini lezo zi nga za lisima? A hlamulo hi wu kuma ka wunwe wa mifananiso ya Jesu.

16, 17. a) Hi gonza yini ka mufananiso wa Jesu wa hosi ni malanza ya yona? b) Anzhako ka ku ehleketa hi mufananiso wa Jesu, zini u ti yimiseleko ku maha?

16 Jesu i wulawulile hi hosi yi nga tsetselela a nanza ga yona gi nga hi ni mangava ya 10.000 wa titalenta, kutani 60.000.000 wa macheleni. Hambulezo, a nanza lego gi tsetselelweko nguvu a gi lavangi ku tsetselela nanza-kulobye gi nga hi ni mangava ma tsongwani ya 100 wa macheleni basi. A hosi yi lo zangara laha yi nga tiva a kunonoha ka mbilu ya nanza legi yi nga gi tsetselele hi wuxinji. A hosi yi lo wula lezi: “Nanza go biha, nzi ku rivalele wontlhe nanzu wa wena, hi lezi u nga nzi khongotela; xana u wa nga fanelangi a kuva ni wuxinji ka nanza-kuloni, kota lezi mina nzi nga ku mahela wuxinji ke?” (Mat. 18:23-35) Kunene, a tipswalo ta hombe ta hosi leyo ti wa fanele ku kurumeta nanza lego a kuva gi tsetselela nanza-kulobye. Hi kufanana, zini lezi a liranzo la Jehova ni tipswalo takwe zi faneleko ku hi kurumeta ku maha?

17 A nguva ya Xialakanyiso yi hi nyika xikhati xa ku ti hlola hi wona lezaku a hi na xiviti hi vamakabye va hina ke. Loku hi hi naxo, xi tava xikhati xi nene xa ku pimanyisa Jehova, loyi a “longileko ku tsetselela.” (Neh. 9:17; Tis. 86:5) Loku hi nyika lisima lezi Jehova a hi mahelako hi ku vinya a mangava ya hina ya hombe, hi ta lava ku tsetselela vanwani hi mbilu yontlhe. A hi nge amukeli a liranzo ni kutsetselela ka Nungungulu loku hi nga ranzi vanwani hi tlhela hi va tsetselela. (Mat. 6:14, 15) Lisine lezaku a kutsetselela a ku nga ta cica lezi hi mahileko kale, kanilezi ku ta cica a za manziko.

18. A liranzo la Nungungulu li vunisile kuyini a makabye wo kari lezaku a timisela a kungambheleli ka makabye munwani?

18 A kutala ka hina zi nga hi karatela a ku ‘honiselana’ ni vamakabye va hina siku ni siku. (Gonza Va Le Kolosi 3:13, 14; Efesusi 4:32.) Hi xikombiso, a makabye wo kari wa xisati a nga chadangiko a vitwako Lilia i wa vuna noni yi vitwako Carolina. [1] Lilia i wa mu khileta mova Carolina, a mu vuna ku xava ni zihi a nga zi lava, a tlhela a mu kombisa wunene hi tindlela tinwani to tala. Hambu lezi Lilia a nga mu mahela zontlhe lezo, Carolina i wa tshamela ku solasola niku i wa karata ku tirisana naye. Hambulezo, Lilia i lo veka kupima ka matshamela ma nene ya Carolina. I lo simama ku mu vuna hi malembe yo tala kala laha Carolina a nga babya nguvu afa. Lilia i wula lezi: “Hambulezo, nza xuva ku mu wona Carolina kuvukeni ka vafileko. Nzi lava ku mu tiva laha a to ngha a mbhelele.” Kunene, a liranzo la Nungungulu li nga hi kurumeta ku tsetselela vamakabye va hina, hi tlhela hi langutela a xikhati lexi a kungambheleli ku to ngha ku fuvile.

19. A ‘xinyikiwo xi nga wulekiko’ xa Nungungulu xi ta ku kuca ku maha yini?

19 Hakunene hi amukele ‘xinyikiwo xi nga wulekiko’ ka Jehova. Hi nga tshuki hi rivala a lisima la xinyikiwo lexo. Wutshanwini ga lezo, ngha hi ehleketa hi zontlhe lezi Jehova na Jesu va hi maheleko, nguvunguvu ka nguva ya Xialakanyiso. Ngha a liranzo labye li hi kurumeta ku lanzela khwatsi a konzo wa Jesu, hi ranza vamakabye va hina, ni ku tsetselela vanwani na zi sukela mbilwini.

^ [1] (nzimana 18) A mavito yo kari ka nzima leyi ma cicilwe.