Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 A Biblia Ga Cica A Wutomi Ga Vanhu

Nzo lava lembe ginwe basi ga kuva ni kurula ni kutsaka

Nzo lava lembe ginwe basi ga kuva ni kurula ni kutsaka
  • LEMBE GA KUPSWALIWA: 1971

  • TIKO GA MABELEKO FRANÇA

  • MATIMU: I WA MAHA WUGEVENGA, WUBHAYI NI KU DZAHA TIMBANGI

KALE KA MINA:

A ngango wa hina wu wa tshama le Tellancourt, gi nga doropa ga le nwalungu wa França. Papai i wa hi wa le França, kanilezi mamani wa le Italia. Laha nzi nga hi ni 8 wa malembe hi loya ka xipanze xa handle ka doropa ga Roma xi nga tele hi vanhu va zisiwana va nga maha nguvu mitiro ya mandla, le Italia. A wutomi gi lo binza. A vapswali va mina va wa tshama hi kuholovisana hi kota ya zikarato zabye za timali.

Laha nzi nga hi ni 15 wa malembe mamani i lo nzi kuca ku suka laha kaya kasi nzi ti lavela vanghana. Hikwalaho, nzi lo sangula ku mbheta xikhati xo tala na nzi nga tshami laha kaya. Na zi nga seya kwihi nzi lova ni vanghana vo biha. Ka siku go kari, a wanuna wo kari a nga wonekisa ku khwatsi munghana i lota laha nzi nga hi kona. I lo nzi nyika mbangi, nzi lo vumela kasi ku komba lezaku a nzi nwanana. Nzi lo sangula ku nghena hi hloko ka zidzaha-dzaha ni ka wubhayi. Niku nzi wa pfinyiwa makhati yo tala. Nzi wa nga hi na mhaka ni kuhanya. Nzi wa tshama ni xiwunza ni ku nga rinzeli nchumu wutomini ga mina. Laha nzi nga hi ni 16 wa malembe, nzi lo zama ku ti sunga hi kunwa xindere zonake nzi ti wisela lomu tiveni. Kota wuyelo ga kona, nzi lo mbheta masiku manharu na nzi nga ti tivi.

Nzi lo sangula ku gi nyika lisima a wutomi, kanilezi nzi lo tlhela nzi maha xigevenga ni mukanganyisi. Nzi wa hlengela masango ni vanhu, nzi dzaha navo, nzi gumesa nzi va yivela zilo zabye za lisima. Nzi lo tiriswa hi hlengeletano yi nga hiko nayweni kasi nzi xavisa timbangi ta yona le Italia. Nzi wa tshamela kuva ni zikarato ni maphoyisa. A wutomi ga mina gi wa nga sizi nchumu. Hambulezo, nzi wa kholwa lezaku a nzi no halahala nzi kumeka. Nzi lo khongela ka Nungungulu lezaku a nzi nyika lembe ginwe basi ga kuva ni kurula ni kutsaka.

LEZI A BIBLIA GI NGA CICISA ZONA A WUTOMI GA MINA:

Laha nzi nga hi ni 24 wa malembe, nzi loya le Inglaterra. Kota lezi nzi nga hi muxavisi wa timbangi a wutomi ga mina gi wa tshama mhangweni. Na nzi nga se zi tsika, nzi lo enzela mamani, zonake nzi hlamaliswa hi lezi a wanuna wo kari waku hi Annunziato Lugarà a nga kari a wulawula naye xungetano hi Biblia. * Kota lezi nzi nga gi tiva khwatsi a wutomi gakwe, nzi lo chava nzi mu  wutisa lezaku i wa lava yini ke. I lo nzi hlawutela lezi a nga cicisa zona wutomi gakwe kasi a maha Mboni ya Jehova, niku i lo nzi kombela ku wulawula ni Timboni loku nzi tlhela le Inglaterra. Nzi lo vumela ku maha lezo. Hambulezo, laha nzi nga chikela, nzi lo tlhelela ka mahanyela ya mina ya kale.

Ka siku go kari nzi lo kumana ni Mboni yi nga kari yi nyikela marevista A Murinzeli ni Despertai! ka ruwa ga le Londres gi tshamako na gi tele hi vanhu. Hi ku alakanya lezi nzi nga tsumbisile Annunziato, nzi lo kombela Mboni leyo lezaku yi nzi fambisela xigonzo xa Biblia.

Lezi nzi zi gonzileko lomu ka Biblia zi lo nzi hlamalisa nguvu. Hi xikombiso, nzi lo khumbiwa nguvu hi magezu ma nga ka 1 Johani 1:9, ma wulako lezi xungetano hi Nungungulu: “Loku hi vumela a zionho za hina, Nungungulu i tsumbekile ni kululama, lezaku a hi tsetselela a zionho za hina, ni ku hi hlaza.” A vesi legi gi nzi khumbile nguvu, hakuva nzi wa ti wona na nzi hi ni noda ya hombe nguvu hi mahanyela ya mina ya kale. Nzi lo sangula kuya mitlhanganweni Salawini ya Mufumo ya Timboni ta Jehova. Va lo nzi amukela hi liranzo la hombe nguvu. Laha nzi nga wona a wunghana gabye ga hombe — ku nga lezi nzi nga zi lava hi kale — nzi lo lava ku lumba a ngango wabye, ku nga bandla.

Hambu lezi zi nga kala ku nzi karatela nguvu a ku tsika kudzaha ni mahanyela ya mina ya wubhayi, a ku cica matshamela ya mina zi nzi karatele. Nzi lo wona lezaku nzi wa fanele ku khatala hi vanwani ni ku va komba xichawo. Niku kala zezi nza halwa ni matshamela yo kari yo biha. Kanilezi hi kuvuniwa hi Jehova, nza chukwatisa. Nzeni ka 6 wa tihweti na nzi sangulile ku gonza Biblia, nzi lo bapatizwa kota Mboni ya Jehova, hi 1997.

LEZI NZI NGA VUNEKISA ZONA:

Anzhako ka kubapatizwa ka mina, nzi lo chada ni nhanyana waku hi Barbara, loyi yenawu ku nga hunza xikhati xitsongwani na a hi Mboni ya Jehova. Laha a munwe wa vanghana va mina va kale a nga wona lezi nzi nga cicisile zona, i lo sangula ku gonza Biblia. Hi kufamba ka xikhati i lo maha Mboni, ziva tano ni nhonzo yakwe ya wasati. Zonake a makabye wa kokwani wa mina wa wasati wa kupswala mamani, loyi a nga hi ni 80 wa malembe, i lo sangula ku gonza a Biblia a gumesa a bapatizwa. Xikhatanyana nzhako ka lezo i lofa.

Zezi nzi dota laha bandleni ga hina, niku mina ni sati wa mina hi maphayona ya xikhati xontlhe, hi xumayela vanhu va wulawulako a xiItaliano le Londres. Nza tshuka nzi karateka hi kota ya mahanyela ya mina ya kale, kanilezi Barbara i nzi vuna nguvu. Zezi nzi na ni ngango wo tiya ni Dadani wa liranzo, zi nga zilo nzi nga zi xuva hi malembe. Nzi lo kombela Nungungulu lezaku a nzi nyika lembe ginwe basi ga kuva ni kurula ni kutsaka, kanilezi i lo nzi nyika zo hunza lezo!

Zezi nzi na ni ngango wo tiya ni Dadani wa liranzo, zi nga zilo nzi nga zi xuva hi malembe

^ nzi. 10 Wona a nzima “A Biblia ga cica a wutomi ga vanhu — Ni kwihi nzi ngaya kona, nzi wa famba ni xibhamu xa mina,” ma hlawutelwa hi Annunziato Lugarà, ka Murinzeli wa 1 ka Julho wa 2014, maphajina 8-9.