Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Loku u hi ni mababyi ya hombe

Loku u hi ni mababyi ya hombe

“A cikhati leci dhokodhela a nga ndzi byela ku ndzi na ni cancro lomu ka mahahu ni lomu ka marumbu, ndzi no tekela ku ti byela ku ndzi file basi. Kanilezvi, laha ndzi nga chikela kaya, ndzi no ehleketanyana, ndzi guma ndziku: ‘Oo, ci ndzi kumile basi! A hi zvona ndzi nga zvi rindzele. Hambulezvo, ndzi fanele ku lavetela ndlela ya ku timisela cikarato leci.’” — Ku wulile Linda a nga ni 71 wa malembe.

“Ndzi ni mababyi ya misiha lomu nghoheni hi tlhelo ga cibhabha. Siku ni siku gi cako maya ma ndzi wonha. Zvikhati zvin’wani, zvi bayisa laha ka ku ndzi nga ha lavi nchumu. A kutala ka zvikhati, ndzizwa ciwundza laha ka kuza ndzi lava ni ku ti daya.”  — Ku wulile Elise a nga ni 49 wa malembe.

LOKU wena kutani munhu u mu randzako a khomilwe mababyi ya ku kuzvilava i tafa, wa zvi tiva khwatsi lezvi zvi bayisisako zvona. Ahandle ka mababyi ya kona, u fanele ku lwisana hi ciyimo ca kona kambe. A kuchava ni kukarateka zvi nga engetela hi makonsulta lawa ma faneleko ku mahiwa, loku zvi karata ku kuma ndlela ya ku tiriwa kutani mali ya kona, kutani zvikarato zvi vangiwako hi mimuri ya kona. A kukarateka ku vangiwako hi mababyi ya hombe ku nga tshuka ku rera.

Hi nga ci kuma kwihi civhuno? A kutala ka vanhu va wonile lezvaku va vhuniwa nguvhu hi ku tsutsumela ka Nungungulu hi mukombelo ni ku lera zvipandze zvo chavelela lomu ka Bhibhiliya. A cin’wani ci nga hi tiyisako ku randziwa ni ku vhuniwa hi vamakabye ni vanghana.

 LEZVI ZVI VHUNILEKO VAN’WANI

Robert, a nga ni 58 wa malembe, i nyikile wusungukati legi: “Kholwa ka Nungungulu. I ta ku vhuna ku timisela mababyi ya wena. Wulawula na Jehovha hi mukombelo. Mu byele lezvi u ti zwisako zvona. Mu kombele a moya wo basa. Mu kombele ku a ku tiyisa kasi u nga ma tsemi hlana a maxaka ya wena u tlhela u nga karateki nguvhu laha u lwisanako ni mababyi ya wena.”

Robert i tlhavinyeta aku: “Loku a maxaka ya wena ma tshama ma longile ku ku vhuna ni loku ma ku chavelela zva vhuna nguvhu. Siku ni siku ku ni mun’we kutani vambiri va ndzi fonelako vaku: ‘Wo yini nyamutlha?’ Ku ni vanghana va matshamu yo hambanahambana kambe va ndzi tiyisako. Va ndzi tiyisa nguvhu. Lezvo zvi ndzi vhuna ku nga rereki.”

Loku uya vhuxela munghana wa wena a babyako, zwana wusungukati ga Linda: “A lisine hi ku loyi a babyako i lava ku hanya wutomi go fana ni vanghana hi laha zvi kotekako hi kona, niku zva koteka ku a nga zvi lavi a ku tshama hi ku wulawula hi wubabyi gakwe. Hikwalaho, bhula hi zvilo lezvi mu nga tolovela ku bhula hi zvona.”

A ntamu wu tako hi ka Nungungulu, ni ku vhuniwa hi maxaka ni vanghana va ku hi randza, zvi nga hi vhuna ku wona ku a kufa a zvi lulamisi cikarato; kanilezvi i chukwana hi simama hi hanya futsi — hambu loku hi hi ni mababyi ya hombe.