Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Hikuyini a muKristu a faneleko ku bhabhatiswa?

Hikuyini a muKristu a faneleko ku bhabhatiswa?

Mati lawa ma mu hanyisako makunu hi kubhabhatiswa.’ — 1 PEDRO 3:21.

TISIMU: 7, 6

1, 2. a) A vapswali vo kari va ti zwisa kuyini loku a n’wana wabye aku i lava ku bhabhatiswa? b) Hikuyini lava va lavako ku bhabhatiswa va wutisiwako ku va ti hendleletile ka Jehovha ke? (Wona mufota laha hehla.)

MARIYA i yimile zvin’we ni vanhu van’wani va lavako ku bhabhatiswa. A mahlo ya vapswali vakwe a ma suki laha ka Mariya. A mukaneli i maha zviwutiso zvimbiri, Mariya a hlamula hi gezu go zwala ni go dlunyateka. Hi kulandzela, a bhabhatiswa.

2 A vapswali va Mariya va xalele nguvhu hi lezvi a n’wana wabye a nga hendleleta wutomi gakwe ka Jehovha a tlhela a bhabhatiswa. Kanilezvi, kusanguleni a mamani wakwe i wa karatekanyana. I wa ti wutisa ku: ‘Xana Mariya i na ni tanga yo ringana ku bhabhatiswa? Wa ku zwisisa a kubindza ka ciboho ca ku ti hendleleta ka Jehovha? A hi chukwana a rindzela kala a kulanyana?’ A vapswali vo tala va lirandzo va ti maha zviwutiso zvo fana ni lezvo loku a n’wana wabye aku i lava ku bhabhatiswa. (Mutshawuteli 5:5) Va zvi tiva ku a ku hendleleta wutomi ka Jehovha u bhabhatiswa, hi cona ciboho ca lisima nguvhu ka zvontlhe lezvi a munhu a zvi mahako wutomini.  — Wona a kwadru “ U ti hendleletile ka Jehovha ke?

3, 4. a) Mupostoli Pedro i kombisile kuyini lezvaku a ku bhabhatiswa zva lisima nguvhu? b) Hikuyini Pedro a nga fananisa a ku bhabhatiswa ni taru legi Nowa a nga aka?

3 Mupostoli Pedro i fananisile a ku bhabhatiswa ni taru legi Nowa a nga aka. I te a taru gi ‘fanana ni mati lawa makunu ma mu hanyisako hi ku bhabhatiswa’. (Gondza 1 Pedro 3:20, 21.) A taru gi wa komba vanhu van’wani lezvaku Nowa i lava ku maha kurandza ka Nungungulu hi mbilu yontlhe. Nowa i mahile khwatsi a ntiro lowu Jehovha a nga mu nyikile. A kukholwa kakwe ku mahile lezvaku Jehovha a mu ponisa zvin’we ni ngango wakwe a cikhati leci a Ntalo wu nga chikela. Kasi Pedro i wa lava ku hi gondzisa yini?

4 Hi ku wona a taru, a vanhu va wa zvi wona ku Nowa wa kholwa ka Nungungulu. Nyamutlha kambe, loku a vanhu va wona munhu na a bhabhatiswa, va zvi tiva ku i hendleletile wutomi gakwe ka Jehovha hakuva wa kholwa ka Kristu loyi a vhuxilweko hi ka vafileko. A ku fana na Nowa, lava va bhabhatiswako va ingisa Nungungulu, va maha a ntiro lowu a va nyikako. A ku fana ni lezvi Jehovha a nga ponisa Nowa cikhatini ca Ntalo, i ta ponisa malandza yakwe yo tsumbeka ma bhabhatisilweko a cikhati leci a to lovisa tiko legi go biha. (Marku 13:10; Kuvhululelwa 7:9, 10) Zvi te dlunya ku zva lisima nguvhu ku hendleleta wutomi ga hina ka Jehovha, hi bhabhatiswa. Hi lisine, loku a munhu a vhikavhika ku bhabhatiswa, a nga tshuka a luza thomo ga ku hanya kala kupindzuka.

5. Zvini hi to gondza ka ndzima leyi?

5 Lezvi makunu hi zvi tivako ku a ku bhabhatiswa  a hi mhaka ya ku hlakana, hi fanele ku tiva a hlamulo wa zviwutiso zvinharu: A Bhibhiliya gi hi gondzisa yini xungetano hi kubhabhatiswa? Zvini lezvi munhu a faneleko ku maha na a nga se bhabhatiswa? Hikuyini hi faneleko ku alakanya a lisima la ku bhabhatiswa a cikhati hi gondzisako vana va hina kutani zvigondzani zva Bhibhiliya?

A BHIBHILIYA GI HI GONDZISA YINI HI MHAKA YA KUBHABHATISWA?

6, 7. a) A kubhabhatisa ka Johani ku wa wula yini? b) Himani a nga bhabhatiswa hi cigelo co hambana ni ca van’wani, niku i wa bhabhatiselwa yini?

6 Lomu ka Bhibhiliya, a munhu wo sangula a wuliwako lezvaku i wa bhabhatisa van’wani hi Johani Mubhabhatisi. (Matewu 3:1-6) Hikuyini a vanhu va ngaya va ya bhabhatiswa? Va wa mahela ku komba lezvaku va ti sola ka zviwonho zvabye, ku nga ku vhumela lezvaku va tshovile Nayo wa Mosi niku va ti laya hi mbilu yontlhe. Kanilezvi a munhu wa lisima nguvhu loyi Johani a nga mu bhabhatisa i bhabhatisilwe hi cigelo co hambana nguvhu ni leco. Johani ive ni thomo ga hombe ga ku bhabhatisa Jesu, a N’wana wo mbhelela wa Nungungulu. (Matewu 3:13-17) Jesu a nga zangi a wonhile. Hikwalaho, zvi wa nga lavi ku a ti sola. (1 Pedro 2:22) Maku, i wa bhabhatiselwa yini? I wa bhabhatiselwa ku komba lezvaku i longile ku tirisa wutomi gakwe kasi ku maha kurandza ka Nungungulu. — Mahebheru 10:7.

7 Andzhako ka loku Jesu a sangulile ku chumayela, a vapizani vakwe va sangulile ku bhabhatisa van’wani. (Johani 3:22; 4:1, 2) A vanhu lavo vonawu va wa bhabhatiselwa ku komba lezvaku va ti sola ka zviwonho zvabye zva ku tshova a Nayo wa Mosi. Kanilezvi andzhako ka loku Jesu a file a tlhela a vhuxiwa, lava va nga lava ku maha vapizani vakwe va wa ta bhabhatiswa hi cigelo cin’wani.

8. a) Cileletelo muni leci Jesu a nga nyika na a ha hi ku vhuka hi ka vafileko? b) Hikuyini a maKristu ma faneleko ku bhabhatiswa?

8 Hi lembe ga 33, Jesu na a ha hi ku vhuka hi ka vafileko, i wulawulile ni 500 wa vanhu ni ku hundza: vavanuna ni vavasati, kuzvilava hambu vanana. Kuzvilava kuve ka khati galego a ngaku: ‘Fambani, mu va maha vapizani a matiko wontlhe, mu va bhabhatisa hi vito ga Dhadhani ni ga N’wana ni ga moya wa ku basa; mu va gondzisa a ku gonga zvontlhe lezvi ndzi mu layileko zvona.’ (Matewu 28:19, 20; 1 Va Le Korinte 15:6) Jesu i byelile valandzeli vakwe lezvaku va maha vapizani. Ni wihi loyi a lavako ku maha mupizani wakwe, kutani ku rwala “pingu” wakwe, i fanele ku bhabhatiswa. (Matewu 11:29, 30) Kasi ku tirela Nungungulu hi ndlela yi mu tsakisako, a munhu i fanele ku vhumela lezvaku Nungungulu i tirisa Jesu kasi ku maha kurandza kakwe. Hi kona kaku a munhu a nga bhabhatiswa hi ndlela yi amukelwako hi Nungungulu. A Bhibhiliya gi komba lezvaku a vapizani vo sangula va Jesu va wa zvi tiva ku a ku bhabhatiswa zva lisima. Va wa nga zvi maheli mihoni vaku hi ta bhabhatiswa hi masiku. — Mitiro 2:41; 9:18; 16:14, 15, 32, 33.

U NGA HLWELI KU BHABHATISWA

9, 10. Hi gondza yini ka kubhabhatiswa ka wanuna wa le Etiyopya ni ka Sawule?

9 Gondza Mitiro 8:35, 36. Ku wa hi ni wanuna wo kari wa le Etiyopya a nga kholwa lezvi a vaJudha va nga zvi kholwa. Ka siku go kari na a wuya hi kukhozeleni tempeleni ya Jerusalema, a ngilozi ya Jehovha yi byelile Filipu lezvaku a ya mu chumayela. Filipu i  no mu yela a ya mu gondzisa a ‘ivhangeli ya Jesu’. Laha a ngazwa mahungu lawo, a wanuna loye i zwisisile a lisima la ku vhumela lezvaku Jesu hi yena Hosi, niku i wa xuva ku maha lezvi Jehovha a zvi lavako ka maKristu. Hikwalaho, i no tekela ku bhabhatiswa.

10 A cikombiso cin’wani hi ci kuma ka wanuna wo kari wa muJudha waku hi Sawule. A tiko gontlhe ga Judha gi wa hendleletilwe ka Jehovha, kanilezvi Jehovha i wa va tsukulile hi ku kala va nga mu ingisi. Sawule i wa kholwa ku a vaJudha va ha tirela Nungungulu hi ndlela yi faneleko, hikwalaho i wa xanisa maKristu. Kanilezvi ka siku go kari, Jesu, loyi Sawule a nga alakanya ku wa ha file kuveni i vhukile hi ka vafileko, i no bhula naye hi le tilweni. Lezvo zvi mu khomisile kuyini Sawule? I vhumele ku vhuniwa hi mupizani wa muKristu waku hi Ananiyasi, a si tekela ku ‘vhuka a bhabhatiswa’. (Mitiro 9:17, 18; Va Le Galatiya 1:14) Hi kufamba ka masiku, i sangulile ku tiviwa lezvaku hi mupostoli Pawule. Wona lezvaku neti a nga zwisisa lezvaku Nungungulu i tirisa Jesu kasi ku maha kurandza Kakwe, Sawule i tekele ku bhabhatiswa. — Gondza Mitiro 22:12-16.

Laha a zvigondzani zva Bhibhiliya zvi gondzako lisine zvi li tsakela, zvi xuva ku bhabhatiswa

11. a) Cini ci mahako zvigondzani zva Bhibhiliya zvi boha ku bhabhatiswa? b) Hi ti zwisa kuyini loku a wokari a bhabhatiswa?

11 Nyamutlha kambe, a zvigondzani zvo tala zva Bhibhiliya zvi maha zvalezvo, a vaswa ni vahombe. Hi ku randza lezvi a Bhibhiliya gi gondzisako va tlhela va zvi tsumba, va xuva ku hendleleta wutomi gabye ka Jehovha, va bhabhatiswa. Hi lisine, a cikhati ca kanelo ya kubhabhatisa mitlhanganweni ya cipandze ni migotsovanyanweni cikhati co hlawuleka nguvhu. A Timboni ta Jehovha ta tsaka loku a zvigondzani zva Bhibhiliya zvi vhumela lisine zvi tlhela zvi boha ku bhabhatiswa. A vapswali vonawu va tsaka nguvhu loku a vana vabye va maha lezvo. Ka lembe ga ntiro ga 2017, ku bhabhatisilwe vanhu vo hundza 284 000 kasi ku komba lezvaku va hendleletile wutomi gabye ka Jehovha. (Mitiro 13:48) Zvi te dlunya ku a maKristu wontlhe ma fanele ku bhabhatiswa. Kanilezvi zvini lezvi a munhu a faneleko ku maha na a nga se bhabhatiswa?

12. A zvigondzani zva Bhibhiliya zvi fanele ku maha yini na zvi nga se bhabhatiswa?

12 Na a nga se bhabhatiswa, a munhu i fanele ku ranga hi ku gondza lisine xungetano hi Nungungulu, kungo gakwe hi vanhu ni misava, ni lezvi a nga maha kasi ku hanyisa vanhu. (1 Timote 2:3-6) Andzhako ka lezvo, i fanele ku aka kukholwa, loku ku to mu vhuna ku ingisa milayo ya Nungungulu ni ku tsika ku maha zvilo lezvi a zvi vengako. (Mitiro 3:19) Lezvo zva lisima, hakuva Jehovha a nga ta amukela munhu a nge wa ti hendleleta kakwe kuveni i simama a maha lezvi Yena a zvi vengako. (1 Va Le Korinte 6:9, 10) Kanilezvi, a hi lezvo basi. Lava va lavako ku ti hendleleta ka Jehovha va fanele kuya mitlhanganweni ya bandla va tlhela va chumayela mahungu yo saseka ni ku gondzisa van’wani hi kukhandzakanya. Ni wihi loyi a lavako kuva mulandzeli wa Kristu i fanele ku maha lezvo. (Mitiro 1:8) A cigondzani ci fanele ku maha zvontlhe lezvo, hi kona kaku ci  nga ti mahela mukhongelo wa ku ti hendleleta ka Jehovha ci guma ci bhabhatiswa.

VHUNA ZVIGONDZANI ZVA BHIBHLIYA LEZVAKU ZVI BHABHATISWA

A cikhati u gondzisako van’wani, wa hlota tindlela ta ku va vhuna ku zwisisa lezvaku a ku bhabhatiswa zva lisima nguvhu ke? (Wona ndzimana 13)

13. A cikhati hi gondzisako van’wani, hikuyini hi faneleko ku alakanya lezvaku kasi va maha maKristu ya lisine va fanele ku bhabhatiswa?

13 A cikhati hi vhunako vana va hina ni zvigondzani zvin’wani zva Bhibhiliya lezvaku va cica lezvi zvi lavekako, hi fanele ku alakanya lezvaku lava va lavako kuva valandzeli va lisine va Jesu va fanele ku bhabhatiswa. Hi ndlela leyo, hi nga ta chava ku va byela hi cikhati ci faneleko lezvaku a ku ti hendleleta ni ku bhabhatiswa zva lisima. Hi lava lezvaku a vana va hina ni zvigondzani zvin’wani zva Bhibhiliya va simama va kula kala va bhabhatiswa!

14. Hikuyini hi nga faneliko ku kurumeta munhu lezvaku a bhabhatiswa?

14 Kanilezvi a hi faneli ku kurumeta n’wanana kutani cigondzani ca Bhibhiliya lezvaku ci bhabhatiswa. Jehovha a nga kurumeti munhu lezvaku a mu tirela. (1 Johani 4:8) A cikhati hi gondzisako van’wani, hi fanele ku va vhuna ku zwisisa a lisima la ku ti karatela kuva ni wuxaka gi nene na Jehovha. Maku, loku hakunene a cigondzani ca Bhibhiliya ci xalala hi ku tiva lisine xungetano hi Nungungulu ci tlhela ci lava ku maha zvontlhe lezvi zvi lavekako ka maKristu ya lisine, ci ta bhabhatiswa. — 2 Va Le Korinte 5:14, 15.

15, 16. a) A ku bhabhatiswa zviya hi tanga ke? Tlhamusela. b) Hikuyini a cigondzani ca Bhibhiliya ci faneleko ku bhabhatiswa kota Mboni ya Jehovha hambu loku ci bhabhatisilwe ka wukhongeli gin’wani?

15 A ku bhabhatiswa a zviyi hi tanga. Hina vanhu hi hambene. Ku na ni zvigondzani zvi hatlisako nguvhu ku kula ni zvin’wani zvi nonokako. A votala va bhabhatiswa na va ha hi vanana, va tlhela va simama va tsumbeka ka Jehovha a cikhati va kulako. A van’wani  va gondza lisine va tlhela va bhabhatiswa na va hi va hombe. A vokari va gondza na va hi ni 100 wa malembe ni ku hundza!

16 A wasati wo kari i wa sina a bhabhatisilwe ka tichichi to hambanahambana a cikhati a nga gondza Bhibhiliya. Hikwalaho, i wutisile mugondzisi wakwe wa Bhibhiliya ku zva laveka futsi ku a tlhela a bhabhatiswa kambe ke. A mugondzisi wakwe i no mu komba mavhesi yo kari ya Bhibhiliya ma nga hlamula ciwutiso cakwe. Neti a nga zwisisa lezvi a Bhibhiliya gi zvi lavako, i no bhabhatiswa hambu lezvi a nga hi kwalomo ka 80 wa malembe. Hi gondza yini ka cikombiso leci? Hi gondza lezvaku Jehovha i vhumela ku hi bhabhatisilwe ntsena loku hi maha lezvo na hi tiva a lisine xungetano hi kurandza kakwe. Hikwalaho hambu loku a munhu a bhabhatisilwe ka wukhongeli gin’wani, i fanele ku bhabhatiswa kota Mboni ya Jehovha.— Gondza Mitiro 19:3-5.

17. Zvini lezvi a munhu a faneleko ku ehleketa hi zvona ka siku legi a bhabhatiswako hi gona?

17 A siku legi a munhu a bhabhatiswako hi gona i siku ga kutsaka ka hombe. Cikhati ca ku ehleketa nguvhu kambe xungetano hi lezvi zvi patsekako laha ka ku ti hendleleta ni ku bhabhatiswa. A ku maha zvontlhe lezvi zvi rindzelwako ka maKristu ya lisine a zvi olovi. A vapizani va Jesu va fanele va tsika ku ti hanyela, ‘va hanyela loyi a ngafa a tlhela a vhuka hi kota ya vona’. — 2 Va Le Korinte 5:15; Matewu 16:24.

18. Zviwutiso muni hi to bhula hi zvona ka ndzima yi landzelako?

18 Kota lezvi hi nga zvi wona ka ndzima leyi, a ku bhabhatiswa kota muKristu wa lisine a hi ciboho ca ku hlakana. Hi caleco ci nga maha ku a mamani wa Mariya a ti maha zviwutiso lezvi hi nga zvi wona le kusanguleni. Loku u hi mupswali, kuzvilava wa ti wutisa ku: ‘Xana a n’wana wa mina i longile ku bhabhatiswa hakunene? Wa mu tiva khwatsi Jehovha laha ka kuza zvi ringana ku a ti hendleleta kakwe? Xana a n’wana wa mina i fanele ku ranga hi ku gondza zvikola zvo tlakuka a guma a ti lavela ntiro na a nga se bhabhatiswa? Kona loku a maha ciwonho ca hombe andzhako ka ku bhabhatiswa ke?’ A zviwutiso lezvi hi ta bhula hi zvona ka ndzima yi landzelako. Hi ta tlhela hi wona lezvi zvi to vhuna vapswali lezvaku vava ni mawonela ma nene xungetano hi mhaka ya ku bhabhatiswa.