Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Xana Jakobe i mahile kokwani wa Mesiya hi lezvi a nga xava a wutewula ka Esawu?

Zviwutiso zva vagondzi

Zviwutiso zva vagondzi

Xana le Izrayeli wa kale a munhu i wa fanele kuva matewula kasi a maha kokwani wa Mesiya ke?

A bhuku lego gi wula lezvaku Esawu i ‘kanyisile’ zvilo zvo basa a xavisa “wutewula gakwe” ka Jakobe hi ngelo wun’we wa zvakuga. Hikwalaho, hi wa alakanya ku a cikhati leci Jakobe a nga amukela a “wutewula”, zvi wa patsa ni thomo ga kuva kokwani wa Mesiya. — Matewu 1:2, 16; Luka 3:23, 34.

Kanilezvi, loku hi hlolisisa matimu man’wani ya Bhibhiliya hi kuma ku zvi wa ngazi zvi lava ku a munhu ava matewula kasi a maha kokwani wa Mesiya. A hi woneni a yo kari ya matimu lawo:

A matewula ya Jakobe hi Rubheni, a nga mu pswala ni sati wakwe Leya. A n’wana wo sangula a nga pswala na na Rakeli hi Josefa. A cikhati leci Rubheni a nga maha wubhayi, i tekelwe wutewula gi nyikelwa ka Josefa. (Genesisi 29:31-35; 30:22-25; 35:22-26; 49:22-26; 1 Kronekele 5:1, 2) Hambulezvo, Mesiya a nga tangi hi ka Rubheni, ne a nga tangi hi ka Josefa. I tile hi ka Judha, a nga hi n’wana wa wumune wa Jakobe na Leya. — Genesisi 49:10.

Luka 3:32 i xaxameta ntlhanu wa vakokwani va Mesiya, lava va nge khwatsi vontlhe va wa hi matewula. Hi cikombiso, Bowazi i pswalile Obhedhi, Obhedhi a pswala Jese. — Rute 4:17, 20-22; 1 Kronekele 2:10-12.

Dhavhidha, a n’wana wa Jese, i wa nga hi matewula. Hi lisine i wa hi cigumandzeni laha ka ntlhanu wa vana ni vanharu. Hambulezvo, Mesiya i tile hi ka yena. (1 Samuweli 16:10, 11; 17:12; Matewu 1:5, 6) Solomoni, a nga yena a nga mu gama kuva kokwani wa Mesiya, yenawu i wa nga  hi yena matewula ya Dhavhidha. — 2 Samuweli 3:2-5.

Lezvo a zvi wuli ku a kuva matewula zvi wo kala zvi nga hi zva lisima. A n’wana wa matewula i wa kuma malungelo yaku a vana lava van’wani va wa nga ma kumi. A kutala ka zvikhati, hi yena a nga sala a maha hloko ya ngango loku a papayi wabye afa, niku i wa kuma zvipandze zvimbiri zva tshomba. — Genesisi 43:33; Dhewuteronome 21:17; Joxuwa 17:1.

Kanilezvi zvi wa koteka ku a tifanelo ta wutewula ti tekiwa ti nyikelwa ka mun’wani n’wana. A cikhati leci Abrahama a nga hlongola Ixmayeli, a tifanelo takwe ta wutewula ti tekilwe ti nyikelwa ka Isaka. (Genesisi 21:14-21; 22:2) Kota lezvi hi sinako hi zvi wonile, a tifanelo ta Rubheni ta kuva matewula ti nyikelwe ka Josefa.

Makunu, Pawule i wa lava ku wula yini laha ka Mahebheru 12:16? A vhesi lego gi li: ‘Ti woneleni lezvaku ku ngavi kona a cibhayi, hambu ni munhu a kanyisako, kota Esawu loyi a nga xavisa a wutewula gakwe hi ngelo mun’we wa zvakuga.’

Pawule i wa nga wulawuli hi vakokwani va Mesiya. I wo tlharihisa maKristu. A kuranga i te: ‘Lulametani a tindlela ta mikondzo ya n’wina’ kasi “ku ngavi kona munhu a kiyelelwako hi tipswalo ta Nungungulu”. Hi zvalezvo zvi nga wa ta maheka loku va maha wubhayi. (Mahebheru 12:12-16) Hi ndlela leyo, va wa ta fana na Esawu, loyi a nga ‘kanyisa’ a zvilo zvo basa hi ku lava ku tatisa kunavela kakwe basi.

Hi kuya hi mukhuwo wa masiku lawo, kuzvilava Esawu i wata na a kuma thomo ga ku mu hisela miphahlo Jehovha. (Genesisi 8:20, 21; 12:7, 8; Joba 1:4, 5) Kanilezvi Esawu i vhalilwe mahlo hi kunavela kakwe laha ka kuza a nyikela thomo lego hi ku lava ngelo wun’we basi wa zvakuga. Kuzvilava Esawu i wa lava ku potsa a tixanisa leti Jehovha a nga phrofetile ku a pswalo wa Abrahama wu wa ta kumana nato. (Genesisi 15:13) I kombile ku nga nyiki lisima zvilo zva moya kambe hi ku teka vasati vambiri vo kala va nga khozeli Jehovha, a va vangela hlomulo wa hombe a vapswali vakwe. (Genesisi 26:34, 35) Jakobe i wa hambene nguvhu na Esawu! Yena i mahile zvontlhe kasi kuva a tekana ni wasati a nga khozela a Nungungulu wa lisine. — Genesisi 28:6, 7; 29:10-12, 18.

A matimu lawa ya Bhibhiliya ma hi gondzisa yini hi vakokwani va Mesiya? Ma komba ku a vokari va wa hi matewula, kanilezvi a van’wani va wa nga hi matewula. A vaJudha va wa zvi zwisisa va tlhela va zvi kholwa lezvo. Hi zvi tivisa kuyini? Hi ku va wa kholwa ku Kristu i n’wana wa Dhavhidha, a cigumandzeni ca Jese. — Matewu 22:42.