Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 HLOKO YA MHAKA YA KAPA | A BIBLIA GITA HI KA NUNGUNGULU HAKUNENE?

A Biblia — Gi ‘pimisilwe hi Nungungulu’ hakunene?

A Biblia — Gi ‘pimisilwe hi Nungungulu’ hakunene?

WA KHOLWA lezaku a Biblia gita hi ka Nungungulu? Kutani u alakanya lezaku i bhuku gi teleko hi maalakanyo ya vanhu?

Hambu lava va ti wulako lezaku maKristu va kanetisana hi mhaka leyi. Hi xikombiso, hi 2014 a xibuka xo kari xa ku haxa mahungu xa le Estados Unidos, xi vitaniwako ku i Gallup, xi wulile lezaku a kutala ka lava va ti wulako lezaku maKristu va wa kholwa lezaku “a Biblia gi na ni kuyelana ko kari ni Nungungulu.” Hi tlhelo ginwani, xikari ka ntlhanu wa vanhu, a munwe i wa wona a Biblia kota bhuku ga “mitsheketo ya xikale, ga tikaringani, ga matimu, ni ga milayo yi tsalilweko hi vanhu.” Lezo zi komba ku a vanhu vo tala va djudjeka kupima xungetano hi lomu a Biblia gi tako hi kona hambu lezi a Biblia gi nge: ‘Yontlhelele mitsalo yi pimisilwe hi Nungungulu.’ Kasi ku sangula a hi woneni a tlhamuselo wa magezu ‘yontlhelele mitsalo yi pimisilwe hi Nungungulu.’ — 2 Timote 3:16.

A MAGEZU ‘YONTLHELELE MITSALO YI PIMISILWE HI NUNGUNGULU’ MA WULA YINI?

A Biblia gi wumbiwa hi 66 wa mabhuku ya matsongwani ma tsalilweko hi xipimo xa 40 wa vavanuna hi xipimo xa 1 600 wa malembe. Makunu loku ku hi ku a Biblia gi tsalilwe hi vanhu, gi ‘pimisilwe hi Nungungulu’ hi ndlela muni? Hi ndlela yo olova, a magezu gi ‘pimisilwe hi Nungungulu’ ma komba lezaku Nungungulu hi yena Xibuka xa mahungu ma tsalilweko hi vatsali va Biblia. A Biblia gi zi tlhamuselisa lezi: ‘A vanhu na va susumetilwe hi Moya wa ku Basa va lo kanela lezi zi nyikilweko vona hi Nungungulu.’ (2 Pedro 1:21) Hi wulela ginwani, Nungungulu i tirisile a ntamu wakwe wu nga wonekiko, ku nga moya wa ku basa, kasi ku tlhamusela mahungu yakwe ka vatsali va Biblia. Lezo zi fana ni loku a kokwani wo kari a kombela zukulu wakwe lezaku a mu tsalela papilo. A papilo lego a hi ga loyi a tsalako, kanilezi ga loyi a wulako lezi zi faneleko ku tsaliwa ka gona, ku nga kokwani.

A vatsali vo kari va Biblia va amukele mahungu ya Nungungulu hi ka ngelosi. A vanwani va wonile miwoniso hi ka Nungungulu. Ka ziyimo zinwani, Nungungulu i va tlhamusele mahungu yakwe hi ku tirisa miloro. Hambu lezi Nungungulu a nga vumelela ku a vatsali va Biblia va tirisa magezu yabye kasi ku tsala a mahungu yakwe, ka zikhati zo kari i wo va byela magezu ma nga laveka. Ni ka xihi xiyimo, a vatsali va Biblia va wa tsala maalakanyo ya Nungungulu na ku nga hi ya vona venyi.

Xini xi nga hi tiyisekisako lezaku a vatsali va Biblia va pimiselwe hi Nungungulu? Wona zikombiso zinharu zi tiyisako lezaku a Biblia gita hi ka Nungungulu.