Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 XIWUTISO 1

Nzi munhu wa tshamela muni?

Nzi munhu wa tshamela muni?

HIKUYINI ZI NGA ZA LISIMA?

A ku ti tiva ni ku tiva mahanyela lawa u ma nyikako lisima zi ta ku vuna ku maha a ziboho za zi nene loku u tshuka u kurumetwa ku maha zo biha.

LOKU KU WA HI WENA, U WA TA MAHA YINI?

Ehleketa hi xiyimo lexi: Katia wa ha hi ku chikela mubuzweni wo kari, hi xitshuketi i anguliwa hi munhu a mu tivako, a nga le nzhako kakwe.

“Hikuyini u yimako laha uku tse?”

Katia i hunzuluka a cuwuka nzhako, zonake a wona munghana wakwe Marta a khomileko mabotori mambiri ya byala go titimela khwatsi. Marta i mu nyika botori ginwe na aku, “Kambe wena a wu nwanana laha ka kuza u nga ti tsakisinyana, a hi zona?”

Katia a nga zi lavi kunwa byala, kanilezi Marta munghana wakwe. Niku a nga lavi ku Marta a alakanya ku wa ti karatisa. A xinwani kambe, Marta munhu wa mu nene. Hikwalaho, Katia i alakanya ku loku Marta a tiya kunwa, zi komba lezaku a kunwa a zi bihangi. I ti byela lezi: ‘Kunwa byala basi. A zi fani ni ku dzaha timbangi.’

Loku ku wa hi wena Katia, u wa ta maha yini?

NYIMA U PIMISA!

Kasi u maha xiboho xa xi nene ka xiyimo xo khwatsi hi lexi, u fanele ku tiva lezaku u munhu wa tshamela muni. A ku tiva lezaku u munhu wa tshamela muni, zi wula ku tiva mahanyela lawa u ma nyikako lisima ni lezi u zi kholwako. Laha u tivako lezo, u ka xiyimo xi nene xa ku ti mahela ziboho za zi nene ha wece wutomini ga wena, wutshanwini ga ku tsika vanwani va ku mahela ziboho. — 1 Va Le Korinte 9:26, 27.

U nga zi kotisa kuyini ku ti mahela ziboho za zi nene ha wece? A ku hlamula a ziwutiso lezi zi lanzelako zi ta ku vuna.

1 MATSHAMELA MUNI YA MA NENE NZI NGA NAWO?

A ku tiva lezi u zi kotako ku maha khwatsi ni matshamela ya wena ya ma nene, zi ta ku vuna ku tiya hlana.

XIKOMBISO XA LOMU KA BIBLIA: Mupostoli Paule ite: “Hambu loku nzi nga zi koti ku wulawula khwatsi, handle ko kanakana nzi na ni wutivi.” (2 Va Le Korinte 11:6, NM) Kota lezi Paule a nga yi zwisisa khwatsi a Mitsalo, i zi kotile ku yima a tiya aku nde hambu loku a vanwani va wulawula ku biha hi yena. A nga tsikangi a magezu yabye ya hava ma hehla a kutiya kakwe. — 2 Va Le Korinte 10:10; 11:5.

TI HLOLE: Ka linya leyi lahasi, tsala nchumu u wu kotako ku maha khwatsi.

Ka leti ti lanzelako, tsala tshamela go kari ga gi nene u nga nago. (Hi xikombiso, xana u munhu wo khatala hi vanwani? U munhu wo hana? U munhu wo tsumbeka? Kutani u munhu a nga ranziko ku celwa?)

2 HI GIHI GOME GA MINA?

A ku fana ni lezi a mukhokho wu welako lomu wu nga byekelela kona, a wumunhu ga wena gi nga cica giva go biha loku u tsika a gome ga wena gi ku fumela.

XIKOMBISO XA LOMU KA BIBLIA: Paule i wa gi tiva a gome gakwe. I tsalile lezi: “Hakuva nza tsakela a nayo wa Nungungulu hi munhu loyi a nga xikari ka mina. Kanilezi nza wona munwani nayo zirweni za mina, lowu wu lwako ni nayo wa kupima ka mina, wu nzi kokela wukhumbini ga nayo wa kuonha lowu wu nga kona zirweni za mina.” — Va Le Roma 7:22, 23.

TI HLOLE: I gome muni nzi nga nago legi nzi faneleko ku lwisana nago?

 3 HI YIHI MIXUVO YA MINA?

Hi nga ti alakanyela na u lava kuya ka wutshamu go kari zonake u khilela mudjiwe kasi ku famba hi wona, xana u wa ta chikela? Ahihi. U wa to djiwela kala u karala na u nga yangi ka kuya. Lezo zi wa tava wupumbu, niku zi wa nga ta ku vuna nchumu!

Makunu hi gonza yini? A ku ti vekela mixuvo zi ku vuna ku nga tshami kwalaha ka kale wutomini ga wena. A mixuvo yi ku komba lomu u faneleko kuya kona ni lezi u to fambisa zona.

XIKOMBISO XA LOMU KA BIBLIA: Paule i tsalile lezi: “Mina nza tsutsuma na ku nga hi nyamutsutsume.” (1 Va Le Korinte 9:26) Wutshanwini ga kuva kangahanya basi, Paule i ti vekele mixuvo a tlhela a zama ku yi tatisa. — Va Le Filipi 3:12-14.

TI HLOLE: Ka tilinya leti lahasi, tsala zilo zinharu u xuvako ku maha lembe gi tako.

4 ZINI NZI ZI KHOLWAKO?

Loku u tiya uku nde u yimela mahanyela lawa u ma nyikako lisima ni lezi u zi kholwako, u fana ni sinya yi zimileko khwatsi timitsu yi tiya, leyi yi nga wiko hambu loku kuba xingulo

Loku u nga hi na lezi u zi kholwako, u nga ta zi kota ku maha ziboho, u ta tshama hi ku ti cicacica, a ku fana ni luvani, kasi u ranziwa hi vanghana va wena — niku a ku maha lezo xikombiso xo ndlunyateka xa lezaku a wu ti tivi.

Kanilezi, loku u tiya uku nde u maha lezi u zi kholwako hi mbilu yontlhe, u nga ta cica lezi u nga zona, na ku nga khataliseki lezi a vanwani va zi mahako.

XIKOMBISO XA LOMU KA BIBLIA: Na a ha hi muswa, muprofeti Danieli i ti mahele xiboho “mbilwini yakwe” xa ku ingisa milayo ya Nungungulu hambu lezi a nga hi kule ni vapswali vakwe. (Danieli 1:8) Hi kuva a mahile lezo, Danieli i zi kotile ku tiya a nga cici mahanyela yakwe. I simamile a tiyile ka lezi a nga zi kholwa.

TI HLOLE: Zini lezi u zi kholwako? Hi xikombiso: Wa kholwa lezaku Nungungulu i kona? Loku u kholwa ku i kona, xini xi ku kholwisako lezaku hakunene i kona?

Wa kholwa lezaku a ku hanya hi milayo ya Nungungulu zi vuna wena? Loku uku “ina,” xini xi ku kholwisako?

U lava ku fana ni tluka legi gi hahahako neti kuku swaswaswa zimoyana kutani u lava ku fana ni sinya yi tiyileko, leyi yi nga wiko hambu loku kuba zingulo ke? Loku u tiya uku nde ka mahanyela lawa u ma tivako ma hi ma nene, u ta fana ni sinya leyo yo tiya, niku u ta zi kota ku hlamula xiwutiso lexi xaku: Nzi munhu wa tshamela muni?