Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 XIWUTISO 7

Nzi kuyini loku a wokari a nzi kuca ku etlela naye?

Nzi kuyini loku a wokari a nzi kuca ku etlela naye?

HIKUYINI ZI NGA ZA LISIMA?

A xiboho u to xi maha mhakeni ya kuhlengela masango xi ta khumba wutomini ga wena gontlhe.

LOKU KU WA HI WENA, U WA TA MAHA YINI?

Ehleketa hi xiyimo lexi: Ko hunza tihweti timbiri basi Helena na a sangulile ku ranzana na Mika. Kanilezi, zi mahisa ku khwatsi hi loku a mu tiva hi kale. Xontlhe xikhati va rumelana timesaji. Zikhati zinwani va bhula nguvu va hlwela hi fone. Niku loku a munwe a sangula ku wulawula, loyi munwani i tekela ku zi tiva lezi a to wula hi kulanzela!

Ka tihweti ti nga hunza, lezi Mika na Helena va mahako, ku famba na va khomene mawoko ni ku pswopswananyana basi. Zezi, Mika i lava zo hunza lezo. Kanilezi, Helena a nga zi lavi. Hambulezo, a nga zi lavi ku luza Mika kambe, niku a nga ha woni jaha ginwani. Hi gona goce a gi wonako na gi mu ranza khwatsi. Helena i tlhela a ti byela lezi: ‘Phelasi mina na Mika ho ranzana futsi . . . ’

Loku ku wa hi wena Helena, na u hi wa hombe ku ringana ku gangisana ni wokari, u wa ta maha yini?

NYIMA U PIMISA!

A kuhlengela masango i nchumu wa lisima lowu Nungungulu a vumeletako lava va chadileko basi. Loku u zi maha na u nga se chada, wo chipisa xinyikiwo lexi. Zi fana ni ku teka nguwo yo saseka u nyikilweko hi wokari, u yi tirisa ku susa hi yona lithuri

Loku wo tlula hi lomu hehla ka sinya u zama ku puruma a ku fana ni xinyanyani, u wa ta tshovela kubava. Lezo zi fana ni loku u tshova milayo ya mahanyela, yo fana ni lowu wu nge: “Tsika wubhayi.” — 1 Va Le Tesalonika 4:3.

Mihanzu muni yo bava hi tshovelako hi ku nga ingisi a nayo lowu? A Biblia gi wula lezi: “Loyi a bhayako i onhisa a miri wakwe.” (1 Va Le Korinte 6:18) I onha miri wakwe hi ndlela muni?

 A titlhari ti polile lezaku a kutala ka vaswa lava va hlengeleko masango khati ginwe kutani ku hunza, va tshovela mihanzu leyi yo bava:

  • KUKARATEKA. A kutala ka vaswa lava va hlengeleko masango na ga hi mixo va wula lezaku va gumesile va ti laya nguvu hi zona.

  • KU NGA HA TSUMBANI. Anzhako ka kuva va etlele zinwe, munwe ni munwani wabye i sangula ku karateka a ti wutisa lezi: ‘Ku ni munwani a tshukileko a etlela naye?’

  • KUSWIREKA. Hi lisine, a vanhanyana vo tala va tsakela munhu a nga wa ta va vikela, na ku nga hi munhu wa ku va xakela. Niku a kutala ka vafana va tala ku nga hafi hi nhanyana loyi a vumeleko ku kalavelwa a etlela navo.

  • A mhaka yo tiya hi leyi: Loku wo vumela ku hlengela masango na ga hi mixo, wo ti chipisa ha wece hi kuva u tsika nchumu wa lisima nguvu u nga nawo wu xakelwa — ku nga ku kala u nga se etlela ni wanuna kutani wasati! (Va Le Roma 1:24) A miri wa wena wa lisima nguvu — u nga vumeli ku wu chipisa!

Komba lezaku u munhu wo tiva, a nga ni ntamu wa ku “tsika wubhayi.” (1 Va Le Tesalonika 4:3) Loku u tshuka u chada hi kufamba ka xikhati, u ta hlengela masango makunu. U ta maha lezo na u xalele, na u nga chavi nchumu, u nga ti layi, ne u nga hi na kukarateka loku va tolovelako kuva nako lava va hlengelako masango na va nga se chada. — Mavingu 7:22, 23; 1 Va Le Korinte 7:3.

U ZI WONISA KUYINI?

  • A munhu a ku ranzako futsi i wa ta ku vangela zikarato mirini a tlhela a ku vangela kukarateka ke?

  • A munhu a khatalako hi wena futsi i wa ta ku maha u onha wuxaka ga wena na Nungungulu ke? — Maheberu 13:4.