Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 XIPANZE 3

Malulamisela ya zikarato

Malulamisela ya zikarato

“Pinyamelani kuranzana, hakuva a liranzo li khubhunyeta zionho zinyingi.”1 Pedro 4:8

Laha wena ni munghana wa wena wa wukati mu sangulako ku hanya zinwe, ku ta humelela zikarato zo hambanahambana. Zi nga ha humelela hi kota ya kuhambana loku mu nga nako ka mapimo, kutizwa, ni mawundlelwa. Kutani ku nga hata zikarato hi le handle ka wukati ni hi ka zimaho zi nga rinzelwangiko.

Mu nga ha ringwa ku lava ku tsika ku zi lulamisa, kanilezi a Biblia gi hi kuca a ku lulamisa zikarato za hina. (Mateu 5:23, 24) Mu ta kuma tindlela ta chukwana ta ku lulamisa a zikarato za nwina hi ku lanzela a milayo ya Biblia.

 1 WULAWULANI HI XIKARATO XA NWINA

LEZI A BIBLIA GI WULAKO: “Ku nani . . . xikhati xa ku wulawula.” (Mutshawuteli 3:1, 7) Ti karateleni ku mbheta xikhati na mu wulawula hi xikarato xa nwina. Mu chululele a mbilu ya wena yontlhe a munghana wa wena wa wukati mhakeni leyo u tlhela u mu byela a mawonela ya wena xungetano hi malulamisela ya kona. Xontlhe xikhati “wulawula lisine” ka munghana wa wena wa wukati. (Va Le Efesusi 4:25, Tradução do Novo Mundo, NM) Hambu loku zi hi zilo zi mu kwatisako nguvu, ti khomeni, mu ngalwi. Loku mu hlamulana hi kurula mu nga taza mu holova.Mavingu 15:4; 26:20.

Hambu loku u nga vumeli lezi zi wuliwako hi munghana, ti khome, u nga tshuki u tsika ku kombisa liranzo ni xichawo ka munghana wa wena wa wukati. (Va Le Kolosi 4:6) Zamani ku lulamisa a xikarato xa nwina hi xihatla, niku mu nga tshuki mu miyelelana.Va Le Efesusi 4:26.

LEZI U NGA MAHAKO:

  • Hlawula xikhati xa xi nene kasi ku wulawula hi xikarato xa nwina

  • Loku xi hi xikhati xa wena xa ku ingisela, ti khome, u nga tsemarisi munghana wa wena. U tava ni khati ga wenawu go wulawula

 2 INGISELA U TLHELA U ZWISISA

LEZI A BIBLIA GI WULAKO: “Ranzanani hi liranzo la wumakabye; loyi ni loyi a dzunza munwani ku hunza wutsumbu.” (Va Le Roma 12:10) Lezi u ingiselisako zona za lisima nguvu. Ti karateleni ku zwisisa a mawonela ya munwe ni munwani wa nwina hi ku “zwelana, . . . mu ti koramisa.” (1 Pedro 3:8; Jakobe 1:19) U nga mahi ku khwatsi wo ingisela kuveni a mapimo ya wena ma enzile. Loku zi koteka, tsika lezi u mahako lezaku u ingisela khwatsi lezi munghana wa wena a wulako, kutani ku kombela ku bhula hi xinwani xikhati. Loku u wona a munghana wa wena wa wukati kota munghana loyi u faneleko ku tirisana naye ka kungo ginwe wutshanwini ga ku mu wona kota nala, u nga ta “hatlisela ku zangara.”Mutshawuteli 7:9.

LEZI U NGA MAHAKO:

  • Simama ku ingisela hi mbilu yontlhe, hambu loku u khunguvanyiswa hi lezi u zi zwako

  • Zama ku zwisisa a mongo wa lezi zi wuliwako. Zwisisa lezi a kutihenyahenya ni gezu ga munghana wa wena zi wulako zona

3 MAHA XIPANZE XA WENA

LEZI A BIBLIA GI WULAKO: “A ntiro munwe ni munwani wu na ni nchachazelo; kanilezi a kuwulawula ka milomu ntsena ku yisa wusiwaneni.” (Mavingu 14:23) A zi eneli a ku zwanana lezaku mu ta lulamisisa kuyini a mhaka yo kari. Mu fanele ku tlhela mu maha a zilo lezo mu zi bohileko hi wumbiri ga nwina. Lezo zi nga ha lava a kutikarata ka hombe, kanilezi za bhinzula. (Mavingu 10:4) Loku mu tirisana, mu tava ni “nchachazelo wu nene.”Mutshawuteli 4:9.

LEZI U NGA MAHAKO:

  • Bohani ku zini lezi a munwe ni munwani wa nwina a to maha kasi ku lulamisa a xikarato xa nwina

  • Tanani na mu hlola lezaku xana ma chukwatisa laha ku lavekako ke