Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIGONDZO 54

Jehovha ive ni lihlazva-mbilu ha Jona

Jehovha ive ni lihlazva-mbilu ha Jona

A vanhu va le dhoropeni ga Asiriya le Ninivha va wa hi ni mahanyela yo biha nguvhu. Hikwalaho, Jehovha i no byela muphrofeti wakwe Jona lezvaku a famba Ninivha a ya va byela ku va fanele ku cica mahanyela yabye. Kanilezvi, Jona i no tsutsuma aya ka tlhelo gin’wani. I no nghena lomu ka ngalava yi ngaya Tarxixi, a tsutsuma.

A cikhati leci a ngalava yi nga hi lomu bimbini, ku noba moya wa hombe, lava va nga fambisa ngalava va sangula ku chava. Va no maha mikombelo ka vanungungulu vabye, va wutisa vaku: ‘Hikuyini lezvi zvi humelelako’? Jona i no gumesa a va byela lezvi: ‘Hi mina ndzi nga ni nandzu. Ndzo tsutsuma ku maha lezvi Jehovha a nga zvi ruma. Ndzi hoxeni lomu bimbini, a moya wu ta nyima’. Lava va nga fambisa ngalava va wa nga zvi lavi ku hoxa Jona lomu matini. Kanilezvi, Jona i no simama ku va kurumeta. A cikhati leci va nga mu hoxa lomu bimbini, a moya wu no nyima.

Jona i wa alakanya lezvaku i tafa. Laha a nga kari a mbombomela lomu matini, i no maha mukombelo ka Jehovha. Jehovha i no gumesa a rumela njhanjhi ya hombe nguvhu yi ta mita Jona. Kanilezvi, a nga fangi. Jona i no maha mukombelo na hi lomu ndzeni ka njhanjhi, aku: ‘Jehovha, ndzi ta ku ingisa contlhe cikhati’. Jehovha i no vhikela Jona lomu ndzeni ka njhanjhi hi masiku manharu, yi gumesa yi ya mu kavhula laha ka misava yo woma.

Lezvi Jehovha a nga ponisa Jona, zvi wula ku makunu zvi wa hundzile, i wa nga ha faneli kuya Ninivha? Ahihi. Jehovha i no byela Jona kambe lezvaku aya Ninivha. Ka khati legi, Jona i no ingisa. I no famba a ya byela  vanhu lavo vo biha aku: ‘Ndzeni ka 40 wa masiku, Ninivha i ta lovisiwa’. Ku no humelela zvilo zvo hlamalisa nguvhu — a vaNinivha va no ingisa, va cica mahanyela yabye. A hosi ya Ninivha yi no byela vanhu va yona yiku: ‘Rilelani Nungungulu, mu ti sola. Kuzvilava a nga ta hi lovisa’. A cikhati leci Jehovha a nga wona lezvaku a vanhu va ti solile, a nga ha lovisangi dhoropa ga Ninivha.

Jona i no zangara hi lezvi a dhoropa gi nga kala ku lovisiwa. Hi nga ehleketa hi mhaka leyi: Jehovha ive ni lihlazva-mbilu hi Jona a tlhela a mu zwela wusiwana. Kanilezvi, yena makunu i wa nga va zweli wusiwana a vanhu va Ninivha! Wutshan’wini ga lezvo, i no ya tshama le handle ka dhoropa laha ka ndzhuti wa sinya yi vitaniwako ku i khungu, a tsuva. A sinya yi nofa, zvonake Jona a zangara. Jehovha i no byela Jona aku: ‘Hikuyini u karatekako hi kota ya sinya leyi yi ngafa, kanilezvi u nga hi na mhaka ni vaNinivha? A wu zvi woni ku ndzi va zwele wusiwana kasi va ngafi’! Kasi Jehovha i wa lava ku wula yini? I wa komba lezvaku a vanhu va Ninivha va wa hi va lisima nguvhu ku hundza tisinya tontlhe.

“A Hosi . . . yi timisela ha n’wina, hakuva a yi randzi lezvaku ku lova ni mun’we, kanilezvi yi randza lezvaku vontlhe va hundzuluka.” — 2 Pedro 3:9