Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIGONDZO 44

Tempeli ya Jehovha

Tempeli ya Jehovha

Loku Solomoni a yimisilwe kota hosi ya Izrayeli, Jehovha i no mu wutisa lezvi: ‘U lava ku ndzi ku nyika yini’? Solomoni aku: ‘Ndza hi n’wanana, a ndzi zvi tivi lezvi ndzi faneleko ku maha. Ndzi nyike wutlhari kasi ndzi rangela vanhu va wena’. Jehovha aku: ‘Kota lezvi u nga kombela wutlhari, u tava ni wutlhari go hundza vontlhe laha misaveni. Ndzi ta ku nyika titshomba to tala kambe; niku loku u ndzi ingisa, u ta hanya cikhati co leha’.

Solomoni i no sangula ku aka tempeli. I tirisile ndzalama ya yi nene nguvhu, silivha, mapulangu ni maribye ya kona kambe. A tempeli yi akilwe hi vavanuna ni vavasati vo tala nguvhu va wutivi go eta. Loku ku hundzile a 7 wa malembe na va aka, a tempeli yi no mbhela yi tlhela yi longiselwa kasi yi hendleletiwa ka Jehovha. Ka siku legi yi nga hendleletwa, laha alatini ku wa hi ni minyikelo yo hiswa. Solomoni i no khizama mahlweni ka alati a maha mukombelo aku: ‘Jehovha, ha zvi tiva ku a wu eneli lomu ka tempeli leyi hakuva yi tsongwani. A yi sasekangi nguvhu kambe; kanilezvi, hi kombela ku u amukela wukhozeli ga hina u tlhela uzwa mikombelo ya hina’. Xana Jehovha i ti zwisile kuyini hi tempeli ni mukombelo wa Solomoni? Zvalezvi Solomoni a nga mbheta ku maha mukombelo, ku nota ndzilo hi le tilweni wu ta hisa minyikelo laha alatini. Lezvo zvi wa komba lezvaku Jehovha i yi tsakele a tempeli. A cikhati leci a vaIzrayeli va nga zvi wona, va no tsaka nguvhu.

Hosi Solomoni i no tiveka nguvhu lomu Izrayeli hi wutlhari gakwe. I wa tiveka ni ka matshamu ya le kule kambe. A vanhu va wata ka Solomoni va ta mu kombela ku a va vhuna ku lulamisa zvikarato zvabye. Hambu hosi ya cisati ya le Xebha, yi nota mu ringa hi ku mu maha zviwutiso zvo karata. A cikhati leci yi ngazwa mihlamulo ya Solomoni, yi te: ‘Ndzi wa nga kholwi lezvi va nga ndzi byela hi wena. Kanilezvi, zvezvi ndza zvi wona ku u na ni wutlhari go hundza ni lezvi va nga wula. Jehovha, Nungungulu wa wena i ku katekisile’. Ka cikhati leco, a vanhu le Izrayeli va wa hanya wutomi ga gi nene va tlhela va tsaka. Kanilezvi, a zvilo zvi wa ta gumesa zvi cica.

“Kasi a wahombe ku hundza Solomoni i kona laha.” — Matewu 12:42