Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIGONDZO 11

Abrahama a ringwa kukholwa kakwe

Abrahama a ringwa kukholwa kakwe

Abrahama i no gondzisa n’wana wakwe Isaka ku randza Jehovha ni ku kholwa zvitsumbiso zvakwe. Kanilezvi, a cikhati leci Isaka a nga hi ni cipimo ca 25 wa malembe, Jehovha i no kombela Abrahama lezvaku a maha nchumu wo karata nguvhu. I nchumu muni?

Jehovha i no byela Abrahama aku: ‘Ndzi kombela ku uya citsungeni ci nga le Moriya, u ya ndzi mahela muphahlo hi n’wana wa wena wa mun’we’. Abrahama i wa nga zvi tivi a ku hikuyini Jehovha a mu kombelako ku maha lezvo. Kanilezvi i no ingisa.

Ka siku gi nga landzela, Abrahama i no vindzuka aya citsungeni ca Moriya na a hi na Isaka ni zvitiri zvimbiri. Loku va fambile masiku manharu, va no sangula ku wona citsunga hi le kulanyana zvonake Abrahama a byela zvitiri zvakwe lezvaku zvi sala kwalaho zvi mu nyimela kasi yena na Isaka va ya maha muphahlo. Abrahama i no mu rwexa tihunyi Isaka, yena a welela mukwana. Isaka i no wutisa papayi wakwe aku: ‘Papayi, yi kwihi yivhu leyi hi yako hi ya maha hi yona muphahlo’? Abrahama a mu hlamula aku: ‘N’wananga, Jehovha i ta hi nyika’.

Loku va chikele citsungeni, va no aka Alati. A cikhati leci va nga mbheta ku aka, Abrahama i no boha Isaka, a mu boha mawoko ni minenge zvonake a mu lata laha alatini.

Abrahama i no guma a khoma mukwana. Ka cikhati caleco, a ngilozi ya Jehovha yi no mu vitana na yi hi le tilweni, yiku: ‘Abrahama! U nga bayisi mufana! Makunu ndza zvi tiva lezvaku wa kholwa ka Nungungulu hakuva u wa ti  yimisele ku maha muphahlo hi n’wana wa wena’. Zvalezvo, Abrahama i no wona a yivhu na yi khwekele laha ka sinya hi timhondzo. I no tlhatlha Isaka hi kuhatlisa zvonake a maha muphahlo hi yivhu, a tsika Isaka.

Kusukela siku lego, Abrahama i no maha munghana wa Jehovha. Wa zvi tiva a ku hikuyini? Hi ku Abrahama i wa maha zvontlhe lezvi Jehovha a nga zvi lava hambu loku a nga zvi zwisisi a ku hikuyini Jehovha a mu kombelako ku maha lezvo.

Jehovha i tlhelile a phinda citsumbiso cakwe ka Abrahama, caku: ‘Ndzi ta ku katekisa, ndzi andzisa pswalo wa wena’. Jehovha kambe i no tsumbisa lezvaku i ta katekisa vanhu vontlhe va va nene hi ku tirisa lixaka la Abrahama.

‘Hakuva Nungungulu i no randza tiko kota lezvi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezvi ave ni wutomi ga pindzukelwa’. — Johani 3:16