Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIGONDZO 84

Jesu a famba hi le hehla ka mati

Jesu a famba hi le hehla ka mati

Jesu i wa zvi kota ku hanyisa vababyi a tlhela a vhuxa lava va nga file; kanilezvi zvi wa nga gumelwi laho. I wa hi ni ntamu wa ku fumela moya ni vhula kambe. Loku a mbhetile ku maha mukombelo le citsungeni, Jesu i no cuwuka lomu Bimbini ga Galileya a wona moya wa hombe. A vapostoli vakwe va wa hi lomu ngalaveni na va zama kulwa ni moya kasi a ngalava yi nga kokiwi. Jesu i no relela a sangula ku famba hi le hehla ka mati aya le ngalaveni. A cikhati leci a vapostoli va nga wona wokari na a famba hi lehehla ka mati, va no sangula ku chava. Kanilezvi Jesu i no va byela lezvi: ‘Hi mina. Mu nga chavi.’

Pedro aku: ‘Hosi, loku ku hi wena, ndzi byele ndzita seyo u nga kona’. Jesu i no byela Pedro aku: ‘Ngone’. Laha a moya wu nga kari wuba nguvhu, Pedro i no huma hi lomu ngalaveni a famba hi lehehla ka mati aya ka Jesu. Kanilezvi laha a nga kari a chikela ka Jesu, Pedro i no cuwuka moya a sangula ku chava. I no sangula ku ti wona na a mbombomela. Pedro i no keta aku: ‘Hosi, ndzi ponisi’! Jesu i no mu khoma hi woko aku: ‘Hikuyini u nga sangula ku kanakana? Ku kwihi a kukholwa ka wena’?

Jesu na Pedro va no nghena lomu ngalaveni, a moya wu tekela ku nyima. U alakanya ku a vapostoli va ti zwisile kuyini? Va wulile lezvi: ‘Hakunene, wena u N’wana wa Nungungulu’!

Legi a hi gona goce a khati Jesu a nga nyimisa moya. Ka khati gin’wani na a tsemakanya bimbi ni vapostoli vakwe, Jesu i no etlela lendzhako ka ngalava. Ku noba moya wa hombe nguvhu na a etlele. A mati ma no tlakuka nguvhu maba ngalava ma tlhela ma nghena ma tala. A vapostoli va no vhuxa Jesu, va keta vaku: ‘Hosi, hafa! Hi vhune’! Jesu i no vhuka, a kawuka bimbi aku: ‘Miyela!’ A moya ni bimbi zvi no tekela ku rula. Jesu a wutisa vapostoli vakwe aku: ‘Ku kwihi a kukholwa ka n’wina’? Va no byelana lezvi: ‘Hambu moya ni bimbi zva mu ingisa’. A vapostoli va no gondza lezvaku loku va tsumba Jesu hi mbilu yontlhe, a va faneli ku chava nchumu.

“Loku mu wa hi ni kukholwa ku kotisa a mbewu ya cinapi, . . . a ku na nchumu ci wa ta nga mu tsandza.” — Matewu 17:20