Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIGONDZO 61

Va alile ku khizamela cifananiso

Va alile ku khizamela cifananiso

Andzhako ka cikhati co kari Hosi Nebhukadnezare na a lorile cifananiso, i no maha cifananiso ca hombe hi ndzalama. I no ci veka le nkoveni wa Dhura zvonake a vitana vanhu vo tala va lisima va lomu tikweni — a ku patsa na Xadrake, Mexake, na Abhed-nego — lezvaku va ta tlhangana laha ka cona. A hosi yi no laya yiku: ‘Zvalezvi mu tozwa mipundzu, zvitende ni tingoma, khizamelani cifananiso! Ni wihi a to kala a nga khizami i ta hoxiwa lomu nkeleni wa ndzilo’. Xana a vaHebheru lava va vanharu va wa ta khizamela cifananiso leco, kutani va wa ta khozela Jehovha basi?

Loku va tlhangene, a hosi yi no laya lezvaku va chaya wucenje. Vontlhe va no khizama va khozela cifananiso leco. Kanilezvi, Xadrake, Mexake na Abhed-nego a va khizamangi. A vavanuna vo kari va no va wona zvonake va ya byela hosi vaku: ‘A vaHebheru lavayani va vanharu va ala ku khozela cifananiso ca wena’. Nebhukadnezare i no va ruma ku ya va byela lezvi: ‘Ndza mu nyika khati legi kambe kasi mu khozela cifananiso. Loku mu nga ci khozeli, ndzi ta mu hoxa lomu nkeleni wa ndzilo. A ku na Nungungulu a to zvi kota ku mu ponisa ka mina’. Vona vaku: ‘U ngazi u hi nyika khati gin’wani. Nungungulu wa hina a nga zvi kota ku hi ponisa. Hambu loku a nga hi ponisi, wena hosi tiva lezvaku hi nga ta khozela cifananiso ca wena’.

Nebhukadnezare i no zangara nguvhu zvonake a byela vavanuna vakwe aku: ‘Hlanganyetani ndzilo lomu nkeleni wu hisa 7 wa makhati ku hundza lezvi wu nga ha zvona’! I no guma a ruma masochwa yakwe aku: ‘Va boheni mu va hoxela lomo’! A nkele  wa ndzilo wu wa hisa nguvhu laha ka ku ni masochwa ma tekela kufa a cikhati leci ma nga tshinela kusuhani. A vaHebheru lava va vanharu va no wela lomu ndzilweni. Kanilezvi, a cikhati leci Nebhukadnezare a nga hlomela lomu nkeleni wa ndzilo, i no wona vavanuna na va fambafamba. Va wa nga hi vanharu basi. Va wa hi 4 wa vona! I no chava nguvhu zvonake a wutisa vavanuna vakwe aku: ‘Kasi a hi hoxelangi vavanuna vanharu lomu ndzilweni ke? Ndzi wona 4 wa vona. Loyi mun’wani i fana ni ngilozi’!

Nebhukadnezare i no tshinela kusuhani, a vitana aku: ‘Malandza ya Nungungulu a Hundzeleleko Kutlakuka, humani’! Vontlhe va no hlamala hi ku wona Xadrake, Mexake na Abhed-nego na va huma hi lomu nkeleni wa ndzilo na va nga swangi. A miri wabye, misisi yabye, ni tinguwo tabye zvi wa nga swangi ne ku nuha musi.

Nebhukadnezare aku: ‘A Nungungulu wa Xadrake, Mexake na Abhed-nego wa hombe. I rumele ngilozi yakwe yi ta va ponisa. A ku na nungungulu wo fana ni loyi wabye’.

A ku fana ni vaHebheru lava va vanharu, wenawu u ti yimisele ku tsumbeka ka Jehovha hambu loku ku humelela ni cihi ke?

“Khozela Jehovha Nungungulu wa wena, hi yena yece u faneleko ku mu tirela”. — Matewu 4:10NM