Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIGONDZO 57

Jehovha a ruma Jeremiya lezvaku a ya chumayela

Jehovha a ruma Jeremiya lezvaku a ya chumayela

Jehovha i hlawulile Jeremiya lezvaku a phrofeta cikari ka vanhu va le Judha. I no mu ruma ku ya chumayela vanhu a tlhela a va byela lezvaku va fanele ku tsika ku maha zvilo zva kubiha. Jeremiya i no ti wona na a nga ringanelwi, a byela Jehovha aku: ‘Jehovha, phela mina ndza hi n’wanana. A ndzi zvi tivi ku wulawula lomu ka vanhu’. Jehovha aku: ‘U nga chavi. Ndzi ta ku byela lezvi u faneleko ku wula. Ndzi ta ku vhuna’.

Jehovha i no byela Jeremiya lezvaku a tlhanganisa madhota ya Judha zvonake a faya mbita ya wumba na ma zvi wona, a gumesa a ma byela lezvi: ‘Jerusalema gi ta fayiwa a ku fana ni mbita leyi’. Loku Jeremiya a mahile lezvi Jehovha a nga zvi wula, a madhota ma no kwata nguvhu. A mupristi wa ku hi Paxuri i no khoma Jeremiya a muba, a tlhela a mu boha mawoko ni minenge laha ka mapulangu. Jeremiya i no tshama wusiku gontlhe ne na a nga zvi koti ku ti henya. Ni mixo ya kona, Paxuri i no mu tlhatlha. Jeremiya aku: ‘Ndzi karele hi kuxaniseka. I chukwana ndzi tsika ku chumayela’. I zvi tsikile futsi? Ahihi. Loku Jeremiya a tshamile a ehleketanyana hi zvona, i no gumesa a wula lezvi: ‘A mahungu ya Jehovha ma fana ni ndzilo wu vhurako ndzeni ka mina. A ndzi zvi koti ku miyela ndzi nga chumayeli’. Jeremiya i no simama ku chumayela — a vhuna vanhu.

Ku no hundza malembe yo kari, zvonake lomu Judha ku sangula ku fuma hosi yin’wani. A mahungu lawa Jeremiya a nga chumayela ma wa nyenyiwa hi vapristi ni vaphrofeti va mawunwa. Va no byela tihosana vaku: ‘A wanuna loyi i fanele ku dawa’. Jeremiya aku: ‘Hambu loku mu ndzi daya, a ndzi na nandzu. Lezvi ndzi mu byelako zvita hi ka Jehovha, a hi zva mina’. A cikhati leci a tihosana ti ngazwa lezvo, ti no wula lezvi: ‘Hi nga mu dayeni a wanuna loyi’.

 Jeremiya i no simama ku chumayela. Hambulezvo, a tihosana ti no simama ti bayiseka nguvhu. Ti no ya kombela hosi lezvaku Jeremiya a dawa. A hosi yi no va byela lezvaku va nga maha ni cihi va ci lavako hi Jeremiya. Ti no teka Jeremiya ti mu hoxela lomu ka hlowo yo eta, yi nga hi ni madhaka, na ti rindzela lezvaku i ta fela lomo. Jeremiya i no njhikibela lomu ka madhaka.

A wanuna wa ku hi Ebhed-Meleki a nga tira lomu ndlwini ya wuhosi i no gumesa a ya byela hosi aku: ‘A tihosana ti hoxele Jeremiya lomu hloweni! Loku hi nga mu humesi, i tafa’. A hosi yi no ruma Ebhed-Meleki lezvaku a teka 30 wa vavanuna a famba navo va ya humesa Jeremiya lomu hloweni. A hi chukwana hinawu hi fana na Jeremiya, hi nga tsiki nchumu wu hi tsandzekisa ku chumayela ke?

“Mu ta vengiwa hi vanhu vontlhe hi kota ya vito ga mina; kanilezvi loyi a timiselako kala magumo, hi yena a ta nga hanyiswa.” — Matewu 10:22