Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 XIGONZO 3

Xana a mahungu yo saseka mata hi ka Nungungulu hakunene?

Xana a mahungu yo saseka mata hi ka Nungungulu hakunene?

1. Himani a Mutumbuluxi wa Biblia?

A mahungu yo saseka ya lezaku a vanhu va ta hanya kala kupinzuka misaveni ma tsalilwe lomu ka Biblia. (Tisimu 37:29) A Biblia gi wumbiwa hi 66 wa mabhuku ya matsongwani. Nungungulu i tirisile xipimo xa 40 wa vavanuna vo tsumbeka lezaku a tsala mabhuku lawo. A mabhuku lawa yo sangula ya ntlhanu ma tsalilwe hi Mosi kwalomo ka 3.500 wa malembe ma hunzileko. A bhuku go gumesa gi tsalilwe hi mupostoli Johani ka malembe ya ku hunza 1.900 ma hunzileko. Maalakanyo ya mani ma tsalilweko hi vatsali va Biblia? Nungungulu i wa wulawula ni vatsali va Biblia hi ku tirisa a moya wakwe wa ku basa. (2 Samueli 23:2) Vona va lo tsala maalakanyo ya Nungungulu, na ku nga hi maalakanyo yabye. Hikwalaho Jehova hi yena Mutumbuluxi wa Biblia. — Gonza 2 Timote 3:16; 2 Pedro 1:20, 21.

Wona vhidhyu Himani mutumbuluxi wa Bhibhiliya?

2. Hi nga tiyisekisa kuyini lezaku a Biblia gi wula lisine?

Ha zi tiva lezaku a Biblia gita hi ka Nungungulu hakuva ga nyika mitlhamuselo ya lisine xungetano hi wumanziko. A ku na munhu a zi kotako ku maha lezo. (Joxua 23:14) Ntsena Nungungulu Nyamintamu hi yena a zi kotako ku wona a wumanziko ga vanhu na ka ha hi mahlweni. — Gonza Isaya 42:9; 46:10.

Hi wa ta rinzela ku a bhuku gi tako hi ka Nungungulu giva go hlawuleka, niku a Biblia gi hlawulekile futsi. Ka avelwa tibiliyoni ta maBiblia hi mazanazana ya tirimi. Hambu lezi gi nga ga kale, a Biblia ga zwanana ni siensia. A vatsali va Biblia vonawu a va kanetanangi. * A ku hunza lezo, a Biblia gi wulawula hi liranzo lo tiya la Nungungulu, niku ga ha hi ni ntamu wa ku chukwatisa a wutomi ga vanhu. A timhaka  leti ta kholwisa timiliyoni ta vanhu lezaku a Biblia i Mhaka ya Nungungulu. — Gonza 1 Va Le Tesalonika 2:13.

Wona vhidhyu Hi nga tiyisekisa kuyini lezaku a Biblia gi wula lisine?

3. Xana a Biblia gi wulawula hi yini?

A yinwe ya timhaka-tshinya ta Biblia hi mahungu yo saseka ya lezaku Nungungulu i na ni kungo ga liranzo xungetano hi vanhu. A Mitsalo yi tlhamusela lezi a lungelo ga vanhu ga ku hanya paradiseni misaveni gi luzisilweko zona kusanguleni ka matimu ya vanhu ni lezi a paradise gi to vuxiswa zona. — Gonza Kuvululelwa 21:4, 5.

A Mhaka ya Nungungulu kambe yi na ni milayo, matshinya ya milayo, ni wusungukati. A ku hunza lezo, a Biblia gi hlawutela a matimu ya kutirisana ka Nungungulu ni vanhu—ma nga matimu ma kombisako a wumunhu ga Nungungulu. Hikwalaho, a Biblia gi nga ku vuna ku tiva Nungungulu. Gi tlhamusela lezi u nga zi kotisako zona kuva munghana wakwe. — Gonza Tisimu 19:7, 11; Jakobe 2:23; 4:8.

4. U nga zi kotisa kuyini ku zwisisa a Biblia?

A broxura legi gi ta ku vuna ku zwisisa a Biblia hi ku tirisa a ndlela leyi Jesu a yi tirisileko. Yena i kumbukile mitsalo yo hambanahambana ya Biblia a tlhela a yi “tlhamusela.” — Gonza Luka 24:27, 45.

Zilo zi tsongwani zi tsakisako nguvu a ku fana ni mahungu yo saseka ma tako hi ka Nungungulu. Hambulezo, a vanhu vo kari a va khatali hi wona, niku a vanwani va tlhela va swiriwa hi wona. U nga mbheli ntamu. A kutsumba ka wena ka ku kuma wutomi ga pinzukelwa ku khegela ka kuva u tiva Nungungulu. — Gonza Johani 17:3.

 

^ nzi. 3 Wona a broxura Um Livro Para Todas as Pessoas.