Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

Papilo ga Hubye yi Fumako

Papilo ga Hubye yi Fumako

Vamakabye va hina vo ranzeka:

A Murinzeli wa vanhu laha va yileko, loyi a humesiwako hi tirimi to tala matikweni yo tala, ita na a humesa tinzima ti nga ni hloko ya mhaka “Pimanyisa a kukholwa kabye,” hi malembe yo kari. A tinzima leti ti mahelwe ku vuna a mugonzi wa masikwini ya hina a ku wona lezaku a vanhu lava ku wulawuliwako hi vona lomu ka Biblia va lisine futsi; ti hi vuna a ku alakanyela a wutomi ga vavanuna ni vavasati va zikhatini za kutsaliwa ka Biblia, ni ku hi komba a lixaka la kukholwa loku va ku kombisileko a xikhati lexi va nga yimisana ni zikarato ni minzhingo. Xana a tinzima leti ta tsakelwa?

Anzhako ka ku gonza a nzima yi nga wulawula hi Marta, a mugonzi wo kari i tsalile lezi: “Nzi hlekile nguvu a xikhati nzi nga lera a nzima yi wulawulako hi Marta, hakuva nza fana naye — xontlhe xikhati nzi xuva ku amukela khwatsi a vapfhumba va mina, hikwalaho nza khomeka nguvu, niku nza tshuka nzi rivakelwa a xilaveko xa ku nyimanyana nzi ti buza hi ku hlakana ni vanghana lavo.” A muswa wo kari wa 15 wa malembe i chikelele a magumo lawa yo tsakisa anzhako ka ku gonza a matimu ya Estere: “Nzi wonile lezaku za olova nguvu ku maha khumbi ya timoda. Lisine lezaku hi fanele ku ambala khwatsi; hambulezo, a hi faneli ku hunzeleta.” I tlhelile aku: “Jehova i cuwuka nguvu lezi hi nga zona mbilwini.” Xungetano hi nzima leyi yi nga wulawula hi mupostoli Pedro, a muKristu wo kari wa xisati i wulile lezi hi kuhiseka: “Laha nzi nga gonza a mahungu lawo nzi lo khumbeka nguvu a ku khwatsi nzi wova kona a xikhati lexi ma nga maheka. Nzi tirisile kupima ka mina kasi ku zwisisa lezi zi tsalilweko.”

A valeri lava — ni vanwani va tsanza-vahlayi va hi tsaleleko kasi ku bonga a tinzima leti — va tiyisa lezi mupostoli Paule a tsalileko malembe yo tala ma hunzileko: A “timhaka tontlhe ti nga tsaliwa kale ti tsalelwe a ku gonzisa hina.” (Rom. 15:4) Kunene, Jehova i patsile a mitlhatlhambutelo leyi lomu ka Biblia kasi ku hi gonzisa a zigonzo za lisima nguvu. Hontlheni, na ku nga khataliseki a malembe lawa hi nga nawo lisineni, hi nga gonza zokari ka yona.

Ha ku kuca hi matsenya a ku gonza a bhuku legi neti u kuma mole wa ku maha lezo. Gi mahe xipanze xa Wukhozeli ga wena ga Ngango — a vana va wena va ta gi tsakela nguvu! A xikhati lexi gi to gonziwa mabandleni ka Xigonzo xa Biblia xa Bandla, u nga tshuki uxwa ne ni viki ginwe! Ti nyike xikhati; gi gonze na u nga tsutsumi. Tirisa a wuzikoti ga wena ga ku alakanyela; ti wone na u hi kwaseyo. Zama kuzwa lezi zi zwilweko hi vanhu lava ku wulawuliwako hi vona lomu ka Biblia, ni ku wona lezi va zi wonileko. Ecanyisa lezi va mahileko ka ziyimo zo kari ni lezi wena u nga wa ta ngha u zi mahile.

Litsako la hombe nguvu a ku humesa a bhuku legi. Ngha hakunene giva makatekwa ka wena ni ka ngango wa wena kambe. Ha ku ranza nguvu niku hi ku xuvela za zi nene,

Hubye yi Fumako ya Timboni ta Jehova