Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIPIMO 8

Va pona ku dawa hi Hosi ya kubiha

Va pona ku dawa hi Hosi ya kubiha

MATEWU 2:13-23

  • JOSEFA, NA MARIYA, NA JESU VA TSUTSUMA VAYA GIBHITE

  • JOSEFA A RURA NI NGANGO WAKWE AYA NAZARETA

Ka wusiku go kari, Josefa i no vhuxa Mariya a mu byela mahungu ya cihatla. I wa lorile a ngilozi ya Jehovha yi mu byela lezvi: ‘Suka, u teka cihlangana ni mamani wa cona, u chavela Gibhite, u ya tshama kona ndzi kala ndzi ku byela; hakuva Herodhi i ta lava a cihlangana ku ci daya.’ — Matewu 2:13.

Josefa, na Mariya, ni n’wana wabye Jesu va no tekela ku tsutsuma ni wusiku. Va tsutsumile hi cikhati ca ci nene, hakuva Herodhi i wa zvi tivile ku a vagondzi va ti nyeleti va wa mu khohlisile. I wa va byelile ku va wuya hi laha ka yena, va mu leletela laha Jesu a nga hi kona. Hambulezvo, makunu va wa tlhelile kaya kabye hi ndlela yin’wani. Makunu Herodhi i wa kwatile a pswhuka ni matihlo. Kota lezvi a nga ha lava ku daya Jesu, i no laya lezvaku ku dawa zvivanana zvontlhe zva vafana zva malembe mambiri kuya hasi, zva le Bhetlehema ni matshamu man’wani ya lomu kusuhani. I wulile tanga leyi hi kuya hi lezvi zvi nga wulilwe hi vagondzi va tinyeleti va le Mutsuwuka-gambo.

A ku daya zvivanana zvontlhe zva vafana yive xapi ya hombe nguvhu! A hi na ku zvi tiva ku zvivanana zvingani zvi nga dawa. Kanilezvi a kurila ni kuketa ka vamamani lava va nga dayelwa vana vabye, ku wa tatisa lezvi zvi nga wuliwa hi Jeremiya, a muphrofeti wa Nungungulu. — Jeremiya 31:15.

A cikhati leci a zvivanana zvi nga dayelwa, Josefa ni ngango wakwe va wa tsutsumile. Va wa hi le Gibhite. Va tshamile seyo hi cikhati co kari. Ka wusiku go kari, Josefa i no lora a ngilozi ya Jehovha kambe, yi mu byela lezvi: ‘Suka, u teka cihlangana ni mamani wa cona, uya tikweni ga ka Izrayeli; hakuva va file lava va nga lava ku daya cihlangana.’ (Matewu 2:20) Makunu, Josefa i no tekela ku zvi wona ku va nga tlhela tikweni gabye  ga mabeleko. Ka cikhati leci va nga tlhela, ku no tatiseka a ciphrofeto cin’wani ca Bhibhiliya, leci ci nga wula lezvaku a N’wana wa Nungungulu i wa ta vitaniwa a huma le Gibhite. — Hoseya 11:1.

Zvi wonekisa ku khwatsi Josefa i wa lava ku yena ni ngango wakwe va ya tshama le Judha, kuzvilava kusuhani ni Bhetlehema, lomu va nga tshama kona na va nga se tsutsuma vaya Gibhite. Kanilezvi, i no tiva lezvaku le Judha ku fuma Arkelawu, a n’wana wa Herodhi, a Hosi yo biha ni ya xapi. Nungungulu i no tlharihisa Josefa, hi ku tirisa noro wun’wani. Hikwalaho, Josefa ni ngango wakwe va no engetela pfhuka vaya n’walungu le dhoropeni ga Nazareta, lomu Galileya. Leyo makunu ku wa hi kule ni le Jerusalema. Jesu i no ya kulela ka wutshamu lego. Lezvo zvi no tatisa a ciphrofeto cin’wani. Leci caku: ‘I ta vitaniwa ku muNazareta.’ — Matewu 2:23.