Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIPIMO 59

Kasi a N’wana wa munhu hi yena mani?

Kasi a N’wana wa munhu hi yena mani?

MATEWU 16:13-27 MARKU 8:22-38 LUKA 9:18-26

  • JESU A HANYISA CIKHUMU

  • JESU AKU PEDRO I TA NYIKIWA TIPFHUNGULO TA MUFUMO

  • A PHROFETA LEZVAKU I TA DAWA A TLHELA A VHUXIWA

Jesu ni vapizani vakwe va noya Bhetsaidha. Loku va chikele, a vanhu va nota ni wanuna a nga hi cikhumu va ta khongotela Jesu lezvaku a mu henya kasi a mu hanyisa.

Jesu i no khoma wanuna loye hi woko, a famba naye le handle ka dhoropa. I noya mu phelela matihlo zvonake a mu wutisa lezvi: “Wa wona nchumu ke?” A wanuna loye aku: “Ndzi wona vanhu, ndzo va wona kota tisinya ti fambako.” (Marku 8:23, 24) Jesu i no khumba matihlo ya wanuna loye, a mahlo yakwe ma se vhululeka a sangula ku wona. Laha makunu a nga kari a wona, i no mu byela ku aya kaya, kanilezvi a nga hundzi hi lomu dhoropeni.

Jesu ni vapizani vakwe va no gumesa va kongoma n’walungu vaya Khezariya wa Filipi. A dhoropa lego gi wa hi hehla ka citsunga. Ku wa hi ku kwela cipimo ca 40 wa tikilometro. Makunu ku wa hi pfhuka wo leha. Hi le kule ku wa woneka a Citsunga ca Hermoni na ci tele hi gelo. Kuzvilava a lipfhumba lelo li wa teka cipimo ca masiku mambiri.

Laha va nga kari va famba, Jesu i no hambukanyana kasi a ya khongela na a hi yece. Ka cikhati leco ku wo kiyela 9 kutani 10 wa tihweti kasi a dawa, niku laha a nga hi kona i wa karateka hi kota ya vapizani vakwe. A kutala ka vona va wa tsikile ku mu landzela, niku ko khwatsi a vokari va wa swirekile, a van’wani va wa nga ha ci tivi ni ca ci nene. Kuzvilava va wo karateka va ti wutisa ku kasi hikuyini a nga ala a ku va mu yimisa kota hosi, a tlhela a ala ku maha cihlamaliso kasi a vanhu va nga ha kanakani a ku hi yena mani khwatsi-khwatsi.

A cikhati leci a vapizani vakwe va ngaya laha a nga hi kona, Jesu i no va wutisa lezvi: “A vanhu ve ngalo, hi yena mani a N’wana wa munhu?” Va no hlamula vaku: ‘A van’wani ve ngalo hi Johani Mubhabhatisi; a van’wani vali hi Elija; ni van’wani vali hi Jeremiya, kutani mun’we wa vaphrofeti.’ A vanhu va wa alakanya lezvaku Jesu mun’we wa vavanuna lavo, a nga vhukile hi ka vafileko. Jesu i no lava ku tiva lezvi a vapizani vakwe va nga kari va zvi pimisa, a se va wutisa lezvi: “N’wina ke mu ngalo hi mina mani?” Pedro i no tekela ku hlamula aku: “Wena u Kristu, N’wana wa Nungungulu a hanyako.” — Matewu 16:13-16.

Jesu i no wula lezvaku Pedro i na ni cigelo ca ku tsaka hi lezvi Nungungulu a mu vhunileko ku zvi tiva lezvo. I no engeta aku: “Wena u Pedro, a hehla ka ribye legi ndzi ta aka bandla ga mina; a tinyangwa ta Hayidhesi ti nga ta gi hlula.” I wa wula lezvaku yena Jesu futsi i ta aka bandla niku lava va wumbako bandla lego loku va hanya laha misaveni hi ku tsumbeka kala vafa, va nga ta tshama Cilahleni kala kupindzuka. I no guma a tsumbisa Pedro, aku: “Ndzi ta ku nyika a tipfhungulo ta Mufumo wa tilo”. — Matewu 16:18, 19.

A hi ku khwatsi Jesu i wo kulisa Pedro lezvaku ava wahombe cikari ka vapostoli lava van’wani. Ne i wa nga mu yimisi kota ciseketelo ca bandla ga wuKristu. Jesu hi yena Ribye legi a bandla gakwe gi nga wa ta akiwa hehla ka gona. (1 Va Le Korinte 3:11; Va Le Efesusi 2:20) Hambulezvo, Pedro i wa ta amukela tipfhungulo  tinharu. I wa tava ni thomo ga ku a vhulula ndlela ya ku a vanhu vo kari va kuma makatekwa ya ku nghena Mufun’weni wa tilo.

Pedro i tirisile a pfhungulo yo sangula hi Pentekosta wa 33 Nguveni ya Kristu, laha a nga komba vaJudha lava va nga ti sola ni vaprozelita lezvi va nga fanele ku maha kasi va hanyisiwa. Leyi ya wumbiri, i yi tirisele ku va vhululela ndlela a vaSamariya va nga kholwa ka Jesu kasi va kuma thomo ga ku nghena Mufun’weni wa Nungungulu. Makunu hi 36 Nguveni ya Kristu, i tirisile a pfhungulo ya wunharu kasi ku mu vhululela ndlela Korneliyu, ni Vamatiko van’wani. — Mitiro 2:37, 38; 8:14-17; 10:44-48.

Laha Jesu a nga kari a wulawula hi zvilo lezvo, a vapostoli vakwe va no karateka loku va muzwa na a va byela lezvi zvi nga hi kusuhani ni ku mu mahekela le Jerusalema — lezvaku i wa ta xaniseka a tlhela a dawa. Kota lezvi Pedro a nga kala a nga zvi zwisisi ku Jesu i wa ta gumesa a vhuxiwa a ya hanya le tilweni, i no koka Jesu a mu kawuka aku: “Hosi, u nga ti vitaneli khombo hi wece. Lezvo zvi nga ta tshuka zvi maheka ka wena.” Kanilezvi, Jesu i no fularela Pedro aku: “Suka ka mina, Sathani! Wena u cikhunguvanyiso ka mina, hakuva lezvo u zvi pimisako a hi zva Nungungulu; zva vanhu.” — Matewu 16:22, 23NM.

Jesu i no vitana vanhu lava van’wani a ta tlhamusela lezvaku a kuva mupizani wakwe a zvi olovi. I te: “Loku munhu a lava ku ndzi landzela i wa ti tsike, a rwala a mhandze yakwe ya xanisa a simama ku ndzi landzela. Hakuva ni wihi a lavako ku ponisa wutomi gakwe i ta gi luza. Kanilezvi, loyi a luzako wutomi gakwe hi kota ya mina ni hi kota ya mahungu yo saseka, i ta gi ponisa.” — Marku 8:34, 35NM.

Hi zvezvo futsi, kasi a vapizani va Jesu va tsakelwa hi yena, va fanele ku tiya hlana va tlhela va ti karata nguvhu. I te: ‘Loyi a nga ni tingana ha mina ni timhaka ta mina cizukulwaneni leci ca wubhayi ni kuwonha, a N’wana wa munhu yenawu i tava ni tingana ha yena, laha a ta nga wuya hi kungangamela ka Papayi wakwe, zvin’we ni tingilozi to basa.’ (Marku 8:38) Kunene, loku Jesu a ta wuya, “i tata . . . [a] ta chachazela mun’we ni mun’wani kotisa mitiro yakwe.” — Matewu 16:27.