Hunza uya ka timhaka ta kona

Tlhela ka xaxameto wa tihloko ta mhaka

Timboni ta Jehovha

Select language ciTshwa

 CIPIMO 54

Jesu “cibaba ca wutomi”

Jesu “cibaba ca wutomi”

JOHANI 6:25-48

  • JESU “CIBABA CI RELELEKO HI LE TILWENI”

A cikhati leci Jesu a nga hi le Mutsuwuka-gambo wa Galileya, i mahile cihlamaliso kuga vanhu vo tala va xura a gumesa a nyemuka laha va nga lava ku mu maha hosi. Ni wusiku ga kona, i no famba hi le hehla ka mati a tlhela a ponisa Pedro, a cikhati a nga dzuka a sangula ku rikha na a fambawu hi le hehla ka mati. I ponisile a vapizani vakwe kambe, kuzvilava na va lava ku mbombomela ni ngalava.

Jesu i no gumesa a tlhela Kapernawume, le Mupela-gambo wa bimbi. Lava a nga mahile cihlamaliso vaga va xura, va no ta mu kuma, vaku: “Rabi, [kasi] u tile rini laha?” Jesu i no va kawuka hi ku va byela lezvaku va mu landzisela hi ku lava kuga kambe. I no guma a va kuca aku: “Mu nga tireli a zvakuga lezvi zvi mbhelako, kanilezvi tirelani a zvakuga lezvi zvi simamisako wutomini ga pindzukelwa”. Va se mu wutisa vaku: “Hi fanele ku maha yini, kasi hi tira mitiro ya Nungungulu ke?” — Johani 6:25-28.

Kuzvilava va wa pimisa ku i wula ku maha lezvi zvi nga hi lomu Nayweni wa Mosi. Kanilezvi Jesu i wa nga wuli mitiro leyo, i wa wula nchumu wa lisima nguvhu. I te: “A ntiro wa Nungungulu hi lowu, lezvaku mu kholwa ka yena loyi a mu rumileko.” A vanhu va wa nga kholwi ka Jesu, hambu lezvi va nga wona zvontlhe lezvi a nga kari a maha. Va no tlhela va mu byela ku a maha cihlamaliso, vaku hi kona va to kholwa ka yena. Va waku: ‘Ciwoniso muni u ci mahako wena? . . . A vakokwani va hina va waga manna le ciwuleni, kota lezvi ku tsalilweko ku ngalo: I lo va nyika zvibaba zvita hi le tilweni, a kuva vaga.’ — Johani 6:29-31; Lisimu 78:24.

Lezvi va nga kombela ciwoniso, Jesu i no tlhamusela zvi ku dlunya a ku hi mani Loyi a nga ni ntamu wa ku maha cihlamaliso a nyika vanhu zvontlhe zvi lavekako ka vona. I te: “Ku wa nga hi Mosi a nga mu nyika cibaba ca le tilweni; kanilezvi a . . . [Papayi wa mina] wa mu nyika a cibaba leʼci nene ci tako hi le tilweni. Hakuva a cibaba ca Nungungulu hi cona leci ci relelako hi le tilweni, ci nyikako tiko wutomi.” A va zvi zwisisangi lezvi Jesu a nga wula. Hikwalaho va te: “Hosi, hi nyike cibaba leco contlhe cikhati.” (Johani 6:32-34) Kasi “cibaba” muni leci Jesu a nga ci wula?

I no tlhamusela aku: ‘Mina ndzi cibaba ca wutomi. Loyi a tako ka mina a nga tazwa ndlala, ni loyi a kholwako ka mina, cima a nga tazwa tora. Kanilezvi ndzi sina ndzi mu byelile lezvaku, mu ndzi wonile, hambulezvo a mu kholwangi. . . . Hakuva ndzi relele hi le tilweni, na ku nga hi lezvaku ndzi maha kurandza ka mina, kanilezvi ku maha kurandza ka loyi a ndzi rumileko. A kurandza ka loyi a ndzi rumileko hi lezvaku ndzi nga lahli ni mun’we wa vontlhe lava a ndzi nyikileko, kanilezvi ndzi fela ku va vhuxa hi siku go gumesa. Hakuva kurandza ka Papayi lezvaku ni wihi loyi a cuwukako N’wana, a kholwa ka yena, ava ni wutomi ga pindzukelwa’. — Johani 6:35-40.

A vaJudha va no zangara, va sangula ku ngurangura vaku: Hi kuyini a nge “mina ndzi cibaba ci releleko hi le tilweni”? (Johani 6:41) Loku va wona Jesu, va wo wona munhu a pswalilweko kwalaha misaveni basi, loyi a vapswali va yena va nga hi le Galileya, dhoropeni ga Nazareta. Hikwalaho, va no wutisa vaku: “Xana loyi, a hi yena Jesu, n’wana Josefa,” loyi a papayi wakwe ni mamani wakwe hi va tivako ke? — Johani 6:42.

Jesu i no va kawuka aku: “Tsikani ku ngurangura timbilwini ta n’wina. A ku na munhu a zvi kotako kuta ka mina, loku a nga kokiwi hi Papayi loyi a ndzi rumileko, niku ndzi ta mu vhuxa hi siku go gumesa. Lomu ka Vaphrofeti ku tsalilwe ku: ‘Vontlhe va ta gondzisiwa hi Jehovha.’ Ni wihi a ingisako Papayi, a gondza kakwe, ita ka mina. A ku na munhu a wonileko Papayi; loyi a tako hi ka Nungungulu, hi yena yece a wonileko Papayi. Ndza mu byela lisine ndziku: Ni wihi a kholwako, i na ni wutomi ga pindzukelwa.” — Johani 6:43-47, NM; Isaya 54:13.

Jesu na a nga se wula magezu lawa, i kumbukile wutomi ga pindzukelwa a cikhati a nga bhula na Nikodhemusi, a gi yelanisa ni ku a vanhu va kholwa ka N’wana wa munhu. I zvi wulisile lezvi: “Ni wihi loyi a kholwako ka [N’wana a belekilweko yece wa Nungungulu]  a nga lovi, kanilezvi ave ni wutomi ga pindzukelwa.” (Johani 3:15, 16) Kanilezvi ka khati legi, Jesu i wa byela vanhu vo tala. I no va byela lezvaku i na ni ntiro wa lisima nguvhu kasi va kuma wutomi ga pindzukelwa, legi ga ku va wa nga ta gi kuma hi kuga manna kutani ni pawa yihi ya lomu Galileya. Jesu i no tlhela a phinda lezvi a nga wulile, kasi ku va komba leci ci nga va nyikako wutomi ga pindzukelwa, aku: “Mina ndzi cibaba ca wutomi.” — Johani 6:48.

A mhaka leyi ya cibaba ca le tilweni, va wulawulisene nguvhu hi yona laha ka kuza yi ya vhuxa cikarato a cikhati leci Jesu a nga kari a gondzisa ka sinagoga go kari le Kapernawume.